ឥណ្ឌូណេស៊ី សង្ឃឹមថា អាស៊ាន នឹងមិនក្លាយជាចំណាប់ខ្មាំង ដោយសារតែ​វិបត្តិ មីយ៉ាន់ម៉ា នោះទេ

ប្រធានាធិបតីឥណ្ឌូណេស៊ីលោក Joko Widodo បាននិយាយកាលពីថ្ងៃព្រហស្បតិ៍ថា អាស៊ាននឹងមិនក្លាយជាចំណាប់ខ្មាំង ដោយសារតែវិបត្តិមីយ៉ាន់ម៉ានោះទេ ហើយលោកថែមទាំងបានជំរុញឲ្យមេដឹកនាំទាំងអស់មិនត្រូវធ្លាក់ចូលទៅក្នុងចរន្តនៃប្រកួតប្រជែងពីមហាអំណាចឡើយ ចំពេលមានភាពតានតឹងផ្នែកភូមិសាស្ត្រនយោបាយ ។

លោក Widodo បានប្រាប់សន្និសីទសារព័ត៌មាននៅឯពិធីបិទកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ ដែលបានធ្វើឡើងចាប់ពីថ្ងៃទី៥-៧ ខែកញ្ញាថា “យើងត្រូវតែបន្តប្រយុទ្ធ ហើយអាស៊ាននឹងមិនធ្វើជាចំណាប់ខ្មាំង ដោយសារបញ្ហាមីយ៉ាន់ម៉ានោះទេ ហើយអាស៊ាននឹងបន្តបង្កើតសន្តិភាព ស្ថិរភាព និងវិបុលភាព” ។

លោក Widodo បានលើកឡើងទៀតថា ក្រោមការដឹកនាំរបស់ឥណ្ឌូណេស៊ី អាស៊ានបានអនុវត្តការចូលរួមចំនួន ១៤៥ លើកជាមួយភាគីពាក់ព័ន្ធចំនួន ៧០ នៅក្នុងប្រទេសមីយ៉ាន់ម៉ា ហើយមេដឹកនាំអាស៊ានក៏បានអំពាវនាវជាពិសេសដល់កងកម្លាំងប្រដាប់អាវុធរបស់ប្រទេសនេះឲ្យបញ្ចប់អរិភាពផងដែរ ។

ទន្ទឹមនោះ បន្ទាប់ពីការពិនិត្យឡើងវិញនៃការអនុវត្តកិច្ចព្រមព្រៀងជាឯកច្ឆ័ន្ទ ៥ ចំណុចដើម្បីដោះស្រាយវិបត្តិនៅមីយ៉ាន់ម៉ារួចហើយ មេដឹកនាំអាស៊ានបានគូសបញ្ជាក់ពីជំហាន ដូចជាការអនុម័តបង្កើតយន្តការត្រយកា (Troika) ទៅកាន់ប្រេសិតពិសេសរបស់អាស៊ានស្តីពីបញ្ហាមីយ៉ាន់ម៉ា ។

វិធីសាស្រ្តនេះនឹងអនុញ្ញាតឲ្យអតីតប្រធានអាស៊ាន ប្រធានបច្ចុប្បន្ន និងប្រធាននាពេលអនាគត រួមគ្នាដោះស្រាយវិបត្តិ និងរិះរកវិធីជាបន្តបន្ទាប់ ដោយលើកហេតុផលថា ស្ថានភាពនៅក្នុងប្រទេសមីយ៉ាន់ម៉ាទំនងជាមិនផ្លាស់ប្តូរក្នុងរយៈពេល ១ ឆ្នាំនោះទេ ។

គួរបញ្ជាក់ថា មេដឹកនាំអាស៊ានកំពុងប្រឈមមុខនឹងការដោះស្រាយជម្លោះដ៏រ៉ាំរ៉ៃនៅមីយ៉ាន់ម៉ា បន្ទាប់ពីប្រទេសមួយនេះត្រូវបានធ្លាក់ចូលទៅក្នុងវិបត្តិ ក្រោយយោធាបានធ្វើរដ្ឋប្រហារទម្លាក់រដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី កាលពីខែកុម្ភៈ ឆ្នាំ ២០២១ ៕

ប្រែសម្រួលដោយ ៖ ជីវ័ន្ត

ប្រភព ៖ The Straits Times

ចុចអាន ៖ ប្រមុខ UN ឲ្យយោធា មីយ៉ាន់ម៉ា ស្ដាប់តាមប្រជាជនខ្លួនឯងផង