តុលាការកំពូល ថៃ ដកសិទ្ធិអតីតតំណាងរាស្ត្រម្នាក់មិនឲ្យឈរឈ្មោះបោះ​ឆ្នោតអស់មួយជីវិត ក្រោយប៉ះពាល់ស្ថាប័នព្រះមហាក្សត្រ

តុលាការ​កំពូលថៃបាន​សម្រេច​ដក​សិទ្ធិឈរ​បោះឆ្នោតលើកញ្ញា Pannika Wanich អតីត​សមាជិក​តំណាងរាស្ត្ររបស់គណបក្សអនាគតឆ្ពោះទៅមុខ ជាពិសេសគឺដកសិទ្ធិមិនឲ្យកាន់មុខ​តំណែង​នយោបាយអស់មួយជីវិត ពីបទបង្ហោះសារប្រមាថស្ថាប័នព្រះមហាក្សត្រ ។

នៅថ្ងៃទី២០ ខែកញ្ញា ឆ្នាំ២០២៣ តុលាការកំពូលថៃបានសម្រេចលើសំណុំរឿងកញ្ញា Pannika Wanich ដែលជាអតីតអ្នកតំណាងរាស្ត្ររបស់គណបក្សអនាគតឆ្ពោះទៅមុខ ពីបទរំលោភបំពានលើបទដ្ឋានក្រមសីលធម៌យ៉ាងធ្ងន់ធ្ងរ បន្ទាប់ពីបាន​បង្ហោះ​សារប្រមាថស្ថាប័នព្រះមហាក្សត្រ និងថែមទាំងបាន​ដកហូត​សិទ្ធិឈរឈ្មោះបោះឆ្នោត​អស់មួយជីវិត និងគ្មាន​សិទ្ធិ​កាន់មុខ​តំណែង​នយោបាយណាមួយទៀតឡើយ ។

សាលក្រមនេះ គឺផ្តើមចេញកាលពីថ្ងៃទី១១ ខែមិថុនា ឆ្នាំ២០១៩ របស់លោក Srisuwan Janya អគ្គលេខាធិការនៃសមាគមអ្នកការពាររដ្ឋធម្មនុញ្ញថៃដែលបានដាក់ពាក្យបណ្តឹង​ទៅកាន់ការិយាល័យគណៈកម្មាធិការជាតិប្រឆាំងអំពើពុករលួយ ដើម្បី​ស៊ើប​អង្កេត​ កញ្ញា Pannika ក្នុងករណីបង្ហោះរូបភាព និងសារជាច្រើននៅលើបណ្តាញសង្គម Facebook ដែលធ្វើឲ្យមហាជនយល់ក្នុងន័យប្រមាថដល់ស្ថាប័នព្រះមហាក្សត្រ ដែល​ជាសកម្មភាព​បំពាន​យ៉ាង​ធ្ងន់ធ្ងរ​លើ​បទដ្ឋានក្រម​សីលធម៌ ។

កញ្ញា ផាន់នីកា កើតនៅថ្ងៃទី២៨ ខែមករា ឆ្នាំ១៩៨៨ បានបញ្ចប់ថ្នាក់បរិញ្ញាបត្រផ្នែកទំនាក់ទំនងអន្តរជាតិ ពីមហាវិទ្យាល័យវិទ្យាសាស្ត្រនយោបាយ នៃសាកលវិទ្យាល័យជូឡាឡុងកន និងបរិញ្ញាបត្រជាន់ខ្ពស់ពីសាលាសេដ្ឋកិច្ច និងវិទ្យាសាស្ត្រនយោបាយពីទីក្រុងឡុងដ៍ ចក្រភពអង់គ្លេស ។ ក្រោយ​បញ្ចប់​ការ​សិក្សា កញ្ញា​បាន​ត្រឡប់​មក​ធ្វើ​ការ​នៅ​ទូរទស្សន៍ Voice TV អំឡុង​ឆ្នាំ ២០១១ ដល់ឆ្នាំ ២០១៧ និងបានចូល​កាន់​តំណែង​ជា​អ្នក​នាំ​ពាក្យ​គណបក្ស​អនាគតឆ្ពោះទៅមុខនៅ​ឆ្នាំ​ ២០១៨ ។

គួរបញ្ជាក់ថា គណបក្សអនាគតឆ្ពោះទៅមុខត្រូវបានតុលាការធម្មនុញ្ញថៃសម្រេចរំលាយកាលពីថ្ងៃទី២១ ខែកុម្ភៈ ឆ្នាំ២០២០ ខណៈបច្ចុប្បន្នបក្សនេះបានបង្កើតថ្មីដោយដាក់ឈ្មោះថា គណបក្សចលនាឆ្ពោះទៅមុខ ដែលមានអតីតមេដឹកនាំលោក Pita Limjaroenrat ៕

ប្រែសម្រួលដោយ ៖ គង់ សំអាន

ប្រភព ៖ Thai PBS

ចុចអាន ៖ បុរសម្នាក់ អាចចូលអង្គុយកៅអីលោក Pita ជាមេបក្ស ចលនាឆ្ពោះទៅមុខ