វៀតណាម ប្រាប់ UN ថា ពិភពលោកកំពុងប្រឈមបញ្ហាភូមិសាស្ត្រ​នយោបាយ តែអាស៊ានវិញជាតំបន់សាមគ្គីភាព

នាយករដ្ឋមន្ត្រីវៀតណាមលោក Pham Minh Chinh បាននិយាយកាលពីថ្ងៃសុក្រថា អាស៊ានបានលេចចេញជាតំបន់នៃសាមគ្គីភាព និងកិច្ចសហប្រតិបត្តិការ ស្របពេលដែលពិភពលោកកំពុងប្រឈមមុខនឹងភាពតានតឹងផ្នែកភូមិសាស្ត្រនយោបាយដ៏ខ្លាំងក្លា និងមិនធ្លាប់មានចាប់តាំងពីសម័យសង្គ្រាមត្រជាក់មក ។

លោក Pham Minh Chinh បាននិយាយក្នុងសុន្ទរកថានៅសម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ ក្នុងទីក្រុងញូវយ៉កថា អាស៊ានបានអះអាងនូវចំណុចកណ្តាលរបស់ខ្លួនក្នុងការរក្សាសន្តិភាព និងវិបុលភាពក្នុងតំបន់ និងបានជំរុញឲ្យមានការអត់ធ្មត់នៅក្នុងជម្លោះសមុទ្រចិនខាងត្បូងផងដែរ ។

លោក Pham Minh Chinh បានលើកឡើងថា វៀតណាមប្តេជ្ញាធ្វើការជាមួយប្រទេសនានាទាំងក្នុង និងក្រៅតំបន់ ដើម្បីការពារសន្តិភាព ស្ថិរភាព សន្តិសុខ សុវត្ថិភាព និងសេរីភាពនៃការធ្វើនាវាចរណ៍នៅសមុទ្រចិនខាងត្បូង ស្របតាមច្បាប់អន្តរជាតិ និងអនុសញ្ញា​ស្តីពី​ច្បាប់​សមុទ្ររបស់​អង្គការសហប្រជាជាតិ ​(UNCLOS) ឆ្នាំ​១៩៨២ ។

ដោយមិនសំដៅទៅលើប្រទេសណាមួយនោះ លោកនាយករដ្ឋមន្ត្រីវៀតណាមបញ្ជាក់ទៀតថា “វាក៏ចាំបាច់ផងដែរក្នុងការអនុវត្តការអត់ធ្មត់ និងបដិសេធពីសកម្មភាពឯកតោភាគី និងដោះស្រាយជម្លោះ ក៏ដូចជាការខ្វែងគំនិតគ្នាដោយសន្តិភាព រួមទាំងដំណើរការការទូត និងផ្លូវច្បាប់” ។

គួរ​កត់​សម្គាល់​ថា ដែនទឹកមួយចំនួន​នៃ​សមុទ្រ​ចិន​ខាង​ត្បូង​ក៏បង្កឲ្យមានជម្លោះ​ក្តៅ​ដ៏គគុក​រវាង​ប្រទេស​ចិន និង​សមាជិក​អាស៊ាន ស្របពេលដែលទីក្រុងហាណូយ និងប៉េកាំងក៏មានការទាមទារដែនសមុទ្រត្រួតស៊ីគ្នានៅក្នុងដែនទឹកដែលមានជម្លោះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ហេតុអ្វីលោក Zelensky មិនបានជួបតទល់មុខគ្នាជាមួយរដ្ឋមន្ត្រីការបរទេស រុស្ស៊ី នៅកិច្ចប្រជុំ UN?