យោធា អ៊ីស្រាអែល ចាប់ខ្លួនអ្នកនាំពាក្យក្រុមហាម៉ាស់

យោងតាមការចុះផ្សាយរបស់សារព័ត៌មាន CNN បានឲ្យដឹងថា ស្ថាបនិកកំពូលម្នាក់ និងជាអ្នកនាំពាក្យរបស់ក្រុមហាម៉ាស់គឺលោក Hassan Yousef ត្រូវបានយោធាអ៊ីស្រាអែលចាប់ឃុំខ្លួនកាលពីព្រហស្បតិ៍ ទី១៩ ខែតុលា នៅក្នុងការវាយឆ្មក់នៅតំបន់ West Bank ។

ទោះយ៉ាងណា គេមិនទាន់ដឹងមូលហេតុច្បាស់លាស់ចំពោះការចាប់ខ្លួនលោក Yousef នៅឡើយទេ ប៉ុន្តែកាលពីថ្ងៃពុធ ទី១៨ ខែតុលា អ្នកនាំពាក្យរូបនេះបានចូលរួមក្នុងការតវ៉ាមួយនៅតំបន់ West Bank ដោយសម្តែងការកោតសរសើរយ៉ាងស្មោះស្ម័គ្រចំពោះប្រជាជនប៉ាឡេស្ទីន និងជំរុញឲ្យមានឯកភាពក្នុងចំណោមបក្សពួកប៉ាឡេស្ទីនទាំងអស់ ។

សារព័ត៌មាន CNN បានចុះផ្សាយទៀតថា នៅពេលនោះ យ៉ាងហោចណាស់មានជនជាតិប៉ាឡេស្ទីនចំនួន ១២០ នាក់ត្រូវបានចាប់ខ្លួន ហើយជនជាតិប៉ាឡេស្ទីនសរុបចំនួន ៨៥០ នាក់ហើយត្រូវបានចាប់ឃុំខ្លួននៅតំបន់ West Bank ចាប់តាំងពីថ្ងៃទី៧ ខែតុលា ។

ស្របពេលជាមួយគ្នានេះ ការចាប់ខ្លួនអ្នកទាំង ១២០ នាក់នោះក៏រួមមានសមាជិកសភា ឥស្សរជនលេចធ្លោ អ្នកកាសែត និងអតីតអ្នកទោសដែលធ្លាប់ជាប់ឃុំខ្លួននៅក្នុងពន្ធនាគារអ៊ីស្រាអែលផងដែរ ។

គួរបញ្ជាក់ថា នេះមិនមែនជាលើកទី ១ ទេដែលលោក Yousef ត្រូវចាប់ឃុំខ្លួននោះ ពោលយោធាអ៊ីស្រាអែលធ្លាប់ចាប់ខ្លួនអ្នកនាំពាក្យរូបនេះជាច្រើនលើកច្រើនសាររួចមកហើយ ហើយលោកក៏បានចំណាយពេលសរុប ២៤ ឆ្នាំនៅក្នុងគុកអ៊ីស្រាអែលផងដែរ លើការចោទប្រកាន់ផ្សេងៗគ្នាដូចជា ការញុះញង់ឲ្យមានបាតុកម្មចូលទៅក្នុងក្រុងហ្សេរុយសាឡឹមជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ ទាហាន អ៊ីស្រាអែល នឹងវាយលុកចូលតំបន់ហ្គាហ្សាឆាប់ៗនេះ