អ៊ីស្រាអែល ដាក់ឱសានវាទលើតំបន់ហ្គាហ្សា

លោកវរសេនីយ៍ទោ Jonathan Conricus អ្នកនាំពាក្យកងកម្លាំងការពារអ៊ីស្រាអែល (IDF) បាននិយាយថា អ៊ីស្រាអែលនឹងមិនធ្វើប្រតិបត្តិការជើងគោកនៅតំបន់ហ្គាហ្សាទេ ប្រសិនបើក្រុមហាម៉ាស់ចុះចាញ់ដោយគ្មានលក្ខខណ្ឌ និងព្រមដោះលែងចំណាប់ខ្មាំងទាំងអស់របស់ខ្លួន។

យ៉ាង​ណា​មិញ ប្រសិនបើ​ការ​វាយលុកជើងគោក​​កើត​មាន​ឡើង រដ្ឋមន្ត្រី​ការពារជាតិ​អ៊ីស្រាអែល លោក Yoav Gallant ប៉ាន់​ប្រមាណ​ថា វា​អាច​ចំណាយ​ពេល​ដល់​ទៅ ៣ ខែឯណោះ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយអូស្ត្រាលី (ABC) នៅថ្ងៃចន្ទ ទី២៣ ខែតុលា លោក Jonathan បានគេចចេញពីសំណួរមួយអំពីមូលហេតុដែលអ៊ីស្រាអែលហាក់ដូចជាពន្យារពេលប្រតិបត្តិការមូលដ្ឋានរបស់ខ្លួន។ ផ្ទុយ​ទៅ​វិញ អ្នក​នាំ​ពាក្យ​រូប​នេះ​បែរជាប្តេជ្ញា​ថា​ យោធា​អ៊ីស្រាអែល​នឹង «រុះរើ​ក្រុម​ហាម៉ាស់ទាំង​ស្រុង» និង «នាំ​ប្រជាជន​របស់​របស់ខ្លួនត្រឡប់​ទៅ​ផ្ទះ»។

លោក Jonathan និយាយថា “ប្រសិនបើក្រុមហាម៉ាស់ចេញពីកន្លែងលាក់ខ្លួនរបស់ពួកគេ ក្នុងចំណោមជនស៊ីវិល និងប្រគល់ចំណាប់ខ្មាំងទាំង ២១២នាក់ ហើយព្រមចុះចាញ់ដោយគ្មានលក្ខខណ្ឌ នោះសង្រ្គាមនឹងបញ្ចប់” ។ លោកបានសន្និដ្ឋានថា ប្រសិនបើពួកសកម្មប្រយុទ្ធប៉ាឡេស្ទីនមិនគោរពតាមលក្ខខណ្ឌទាំងនេះទេ «យើងប្រហែលជាត្រូវចូលទៅវាយប្រហារមិនខានទេ» ៕

ប្រែសម្រួល៖ សន្យា

ប្រភព៖ RT

ចុចអាន៖ សេចក្តីរាយការណ៍៖ អាមេរិក ណែនាំឲ្យអ៊ីស្រាអែល ពន្យារពេលការវាយលុកហ្គាហ្សា តាមជើងគោកសិន