មេក្រុមហាម៉ាស់ ថា ជម្លោះបច្ចុប្បន្ននេះគឺកើតឡើងដោយសារតែលោក Netanyahu ម្នាក់គត់

មេដឹកនាំក្រុមហាម៉ាស់លោក Ismail Haniyeh បាននិយាយកាលពីថ្ងៃព្រហស្បតិ៍ថា ជម្លោះបច្ចុប្បន្នរវាងក្រុមប្រដាប់អាវុធរបស់លោកជាមួយនឹងប្រទេសអ៊ីស្រាអែល គឺគ្រប់យ៉ាងកើតឡើង ដោយសារតែលោកនាយករដ្ឋមន្ត្រី Benjamin Netanyahu ម្នាក់គត់ ។

លោក Haniyeh បាននិយាយនៅក្នុងសុន្ទរកថាតាមទូរទស្សន៍ថា “ក្រុមប្រដាប់អាវុធប៉ាឡេស្ទីនហាម៉ាស់មានចក្ខុវិស័យទូលំទូលាយដើម្បីបញ្ឈប់ការវាយប្រហាររបស់អ៊ីស្រាអែលលើតំបន់ហ្គាហ្សាស្ទ្រីប ប៉ុន្តែលោក Netanyahu មិនបានគិតឃើញបែបនេះនោះទេ” ។

មេដឹកនាំក្រុមហាម៉ាស់រូបនេះបន្ថែមថា “ចក្ខុវិស័យរបស់យើងគឺចាប់ផ្តើមជាមួយនឹងការបញ្ឈប់ការឈ្លានពាន ការបើកច្រកព្រំដែន ការដោះដូរអ្នកទោស និងគោលនយោបាយសម្រាប់ការបង្កើតរដ្ឋប៉ាឡេស្ទីនជាដើម ។ ទោះ​ជា​យ៉ាង​ណា​ក៏ដោយ នាយក​រដ្ឋមន្ត្រី​អ៊ីស្រាអែល​កំពុង​ពន្យារ​ពេល និងបំភ្លៃការសន្យារបស់គាត់” ។

ស្របពេលជាមួយគ្នានេះ មេដឹកនាំក្រុមហាម៉ាស់ក៏បានទាមទារឲ្យប្រទេសដែលគាំទ្រអ៊ីស្រាអែល រួមទាំងសហរដ្ឋអាមេរិកផងនោះ បញ្ឈប់ការរារាំងកិច្ចខិតខំប្រឹងប្រែងជាអន្តរជាតិដើម្បីបញ្ឈប់ការឈ្លានពាន ជាពិសេសូមធ្វើឲ្យសម្រេចនៃបទឈប់បាញ់មនុស្សធម៌ផងដែរ ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលជិត ១ ខែទៅហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៥០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជិត ១ ម៉ឺននាក់ និងលើស ៣២,០០០ នាក់ រងរបួស ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ក្រុមហាម៉ាស់ គំរាមវាយប្រហារអ៊ីស្រាអែលឲ្យសាហាវម្តងហើយម្តងទៀតដូចថ្ងៃ៧ តុលា