ប្រធានាធិបតីមីយ៉ាន់ម៉ា ព្រមានពីហានិភ័យ នៃការពុះចែកប្រទេស

ប្រព័ន្ធផ្សព្វផ្សាយរដ្ឋ បានរាយការណ៍កាលពីថ្ងៃព្រហស្បតិ៍ទី៩ខែវិច្ឆិកាថា ប្រធានាធិបតីដែលគាំទ្រដោយយោធាមីយ៉ាន់ម៉ាបាននិយាយថា ប្រទេសនេះ កំពុងមានហានិភ័យនៃការពុះចែក ប្រសិនបើយោធាមិនអាចបង្ក្រាបការវាយលុករួមគ្នា ដោយក្រុមប្រដាប់អាវុធជនជាតិភាគតិចនៅតាមព្រំដែនជាមួយប្រទេសចិនបានទេនោះ។

ការប្រយុទ្ធគ្នា បានអូសបន្លាយអស់រយៈពេលជិតពីរសប្តាហ៍មកហើយនៅទូទាំងរដ្ឋ Shan ភាគខាងជើងក្បែរព្រំដែនចិន ដែលបង្ហាញពីអ្វីត្រូវបានអ្នកវិភាគនិយាយថា ជាឧបសគ្គយោធាដ៏ធំបំផុត ចាប់តាំងពីខ្លួនដណ្តើមបានអំណាចក្នុងឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Myint Swe និយាយថា “ប្រសិនបើរដ្ឋាភិបាលមិនគ្រប់គ្រងប្រកបដោយប្រសិទ្ធភាពចំពោះឧប្បត្តិហេតុ ដែលកើតឡើងនៅក្នុងតំបន់ព្រំដែនបាននោះ ប្រទេសនេះនឹងត្រូវបែងចែកទៅជាផ្នែកផ្សេងៗជាក់ជាមិនខាន”។

ស្របពេលជាមួយគ្នានោះ កងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា កងទ័ពរំដោះជាតិ Ta’ang និងកងទ័ព Arakan សុទ្ធតែនិយាយថា ពួកគេបានរឹបអូសទីតាំងយោធារាប់សិបកន្លែង និងបានបិទផ្លូវពាណិជ្ជកម្មសំខាន់ៗទៅកាន់ប្រទេសចិនទៀតផង។

យោធាក៏ទទួលស្គាល់ដែរថា ខ្លួនបាត់បង់ការគ្រប់គ្រងនៃមជ្ឈមណ្ឌលពាណិជ្ជកម្មដ៏សំខាន់មួយ ប៉ុន្តែមិនធ្វើអត្ថាធិប្បាយទេ លើវឌ្ឍនភាពនៃការប្រយុទ្ធគ្នានារយៈពេលជាច្រើនថ្ងៃមកនេះនោះទេ ។

លោក Myint Swe បានធ្វើការកត់សម្គាល់បែបនេះ នៅក្នុងកិច្ចប្រជុំរបស់ក្រុមប្រឹក្សាការពារជាតិនិងសន្តិសុខ ដែលមានការចូលរួមពីប្រមុខយោធាលោក Min Aung Hlaing និងមន្ត្រីយោធាកំពូលផ្សេងទៀត។

គួរបញ្ជាក់ថា លោក Myint Swe ក៏ធ្លាប់កាន់តំណែងជាអនុប្រធានាធិបតី ក្រោមរដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី ដែលត្រូវយោធាទម្លាក់នៅឆ្នាំ២០២១ផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ យោធា មីយ៉ាន់ម៉ា រងបរាជ័យធ្ងន់ធ្ងរបំផុត ចាប់តាំងពីរដ្ឋប្រហារ