កូរ៉េខាងជើង ​ផ្អាក​​កិច្ចព្រមព្រៀង​យោធា​ជាមួយ​កូរ៉េខាងត្បូង​ ទាំងស្រុង​

នៅក្នុងជម្លោះថ្មី ប្រទេសកូរ៉េខាងជើង បានលុបចោលកិច្ចព្រមព្រៀងអាយុកាល៥ឆ្នាំ ជាមួយទីក្រុងសេអ៊ូល ដែលមានគោលបំណងកាត់បន្ថយភាពតានតឹងផ្នែកយោធា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងរ៉ាវថ្មីនេះ បានចាប់ផ្តើមនៅពេលទីក្រុងព្យុងយ៉ាង អះអាងថា ខ្លួនបានបាញ់បង្ហោះផ្កាយរណបចារកម្មដោយជោគជ័យ ទៅកាន់ទីអវកាសកាលពីថ្ងៃអង្គារទី២១ខែវិច្ឆិកា។

នេះជាហេតុនាំឲ្យកូរ៉េខាងត្បូង ផ្អាកផ្នែកខ្លះនៃកិច្ចព្រមព្រៀងខាងលើ ដោយនិយាយថា ខ្លួននឹងបន្តការហោះហើរឃ្លាំមើលនៅតាមព្រំដែនសាជាថ្មី។

ប៉ុន្តែឥឡូវនេះ កូរ៉េខាងជើងក៏បានប្តេជ្ញាដែរថា ខ្លួននឹងផ្អាកទាំងស្រុងនូវកតិកាសញ្ញានេះ ហើយបញ្ជូនកងកម្លាំងនិងឧបករណ៍ខ្លាំងៗជាងមុន ទៅកាន់ព្រំដែន។

ទីក្រុងព្យុងយ៉ាង​ បាននិយាយក្នុងសេចក្តីថ្លែងការណ៍មួយថា “ចាប់ពីពេលនេះតទៅ កងទ័ពរបស់យើង នឹងមិនត្រូវបានចងភ្ជាប់ដោយកិច្ចព្រមព្រៀងយោធាខាងជើង-ខាងត្បូង ថ្ងៃទី១៩ខែកញ្ញាទៀតទេ”។

កូរ៉េខាងជើង ថែមទាំងសន្យាទៀតថា ខ្លួននឹងដកវិធានការដែលធ្វើឡើងដើម្បីការពារជម្លោះយោធានៅគ្រប់វិស័យ រួមទាំងដី សមុទ្រ និងផ្លូវអាកាសទាំងអស់ ហើយដាក់ពង្រាយកងកម្លាំងប្រដាប់អាវុធដ៏មានឥទ្ធិពល និងឧបករណ៍យោធាប្រភេទថ្មី នៅក្នុងតំបន់ព្រំដែន។

សូមបញ្ជាក់ជាថ្មី ទីក្រុង​ព្យុងយ៉ាង ​បាន​បាញ់​រ៉ុកកែត​មួយគ្រាប់ ​ដែល​គេ​ជឿ​ថា នាំ​ផ្កាយ​រណប​ចារកម្ម Malligyong-1 ហើយ​បាន​សាទរ​ការ​បាញ់​បង្ហោះ​នេះ​ថា​ជា “ជោគជ័យ”៕

ប្រែសម្រួល៖ Vann Vann

ប្រភព៖ BBC

ចុចអាន៖ កូរ៉េខាងជើង បាញ់បង្ហោះផ្កាយរណបចារកម្មយោធា ចូលទៅក្នុងលំហ ដោយជោគជ័យ