កិច្ចប្រជុំកំពូល ជប៉ុន-អាស៊ាន នឹងចាប់ផ្ដើមនៅល្ងាចនេះ ខណៈប្រធានបទ​រួមមានបញ្ហាប្រឈមក្នុងតំបន់ និងសកល

មេដឹកនាំមកពីប្រទេសជប៉ុន និងសមាគមប្រជាជាតិអាស៊ីអាគ្នេយ៍នឹងបើកកិច្ចប្រជុំកំពូលពិសេសរយៈពេល ៣ ថ្ងៃចាប់ពីថ្ងៃសៅរ៍ ទី១៦ ខែធ្នូនេះតទៅនៅទីក្រុងតូក្យូ ខណៈក្នុងជំនួបនោះក៏ដើម្បីរំឭកខួបលើកទី ៥០ នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសជប៉ុន និងអាស៊ានផងដែរ ។

កិច្ចប្រជុំកំពូលនឹងចាប់ផ្តើមជាមួយនឹងពិធីជប់លៀងនៅពេលល្ងាច ខណៈលោកនាយករដ្ឋមន្ត្រីជប៉ុន Kishida Fumio គ្រោងនឹងថ្លែងសុន្ទរកថាសង្កត់ធ្ងន់លើសារៈសំខាន់នៃការរក្សាសណ្តាប់ធ្នាប់ដោយសេរី និងបើកចំហដោយផ្អែកលើនីតិរដ្ឋ ស្របពេលស្ថានការណ៍អន្តរជាតិកាន់តែធ្ងន់ធ្ងរឡើងៗ រួមទាំងការកើនឡើងនៃសកម្មភាពដែនសមុទ្ររបស់ប្រទេសចិនផងដែរ ។

ទន្ទឹមនោះ លោក Kishida នឹងអំពាវនាវឲ្យមានកិច្ចសហប្រតិបត្តិការលើវិស័យជាច្រើន រួមទាំងសេដ្ឋកិច្ច សន្តិសុខ និងការប្រែប្រួលអាកាសធាតុ ខណៈលោកនាយក​រដ្ឋមន្ត្រី​ក៏​មាន​គម្រោង​ធ្វើ​ការ​ពិភាក្សា​ដាច់​ដោយឡែក​ពី​គ្នា​ជាមួយសមភាគីមួយចំនួនរបស់លោកផងដែរ ។

ទោះយ៉ាងណា មេដឹកនាំទាំងអស់នឹងចាប់ផ្តើមកិច្ចពិភាក្សាសំខាន់ៗនៅថ្ងៃអាទិត្យ ទី១៧ ខែធ្នូ ខណៈប្រធានបទរួមមានបញ្ហាក្នុងតំបន់ និងបញ្ហាប្រឈមសកល ហើយក៏នឹងចេញសេចក្ដីថ្លែងការណ៍រួមនៅពេលបញ្ចប់កិច្ចប្រជុំនោះផងដែរ ។

គួរបញ្ជាក់ថា ជប៉ុននឹងរៀបចំកិច្ចប្រជុំកំពូលជាមួយសមាគមប្រជាជាតិអាស៊ីអាគ្នេយ៍ ស្របពេលដែលប្រទេសក៏កំពុងផ្ទុះរឿងអាស្រូវពុករលួយផ្នែកហិរញ្ញវត្ថុ និងឈានដល់ការដកតំណែងសមជិកគណៈរដ្ឋមន្ត្រីនៅក្នុងជួរគណបក្សសម្ព័ន្ធប្រជាធិបតេយ្យសេរី (LDP) ជាច្រើនរូបផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ នាយករដ្ឋមន្ត្រីថៃ សេដ្ឋា ថាវីស៊ីន នឹងឈប់សម្រាកពីការងាររយៈពេល ៤ ថ្ងៃ