ព័ត៌មានអន្ដរជាតិ

នាយករដ្ឋមន្ត្រីថៃ សេដ្ឋា ថាវីស៊ីន នឹងឈប់សម្រាកពីការងាររយៈពេល ៤ ថ្ងៃ

បានផុស

៣ years មុន

នៅ

ថ្ងៃសៅរ៍ ១៦ ធ្នូ ២០២៣

ដោយ

ប្រភពពីវិមានរដ្ឋាភិបាលថៃបាននិយាយកាលពីថ្ងៃសុក្រថា លោកនាយករដ្ឋមន្រ្តី សេដ្ឋា ថាវីស៊ីន នឹងដាក់ច្បាប់ឈប់សម្រាកទៅលំហែកាយរយៈពេល ៤ ថ្ងៃ ចាប់ពីថ្ងៃទី ១៩ ដល់ថ្ងៃទី២២ ខែធ្នូនេះ ក្រោយពេលវិលត្រឡប់មកកិច្ចប្រជុំកំពូល ជប៉ុន-អាស៊ាន នៅទីក្រុងតូក្យូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើមឡើយលោក សេដ្ឋា ថាវីស៊ីន ដែលជារដ្ឋមន្ត្រីក្រសួងហិរញ្ញវត្ថុផងដែរនោះ បានដាក់សំណើដំបូងទៅកាន់ខុទ្ទកាល័យ ស្របតាមបទប្បញ្ញត្តិរបស់នាយករដ្ឋមន្ត្រីឆ្នាំ ២០១២ ដោយសុំឈប់សម្រាកពីថ្ងៃទី១៨ ដល់ថ្ងៃទី២២ ខែធ្នូ ប៉ុន្តែក្រោយមកគាត់បានប្តូរពេលឈប់សម្រាកវិញ ពោលពីម៉ោង ១ រសៀលថ្ងៃទី១៩ ខែធ្នូ ដល់ម៉ោង ១២ ថ្ងៃត្រង់ថ្ងៃទី២២ ខែធ្នូ ។

បច្ចុប្បន្នលោកនាយករដ្ឋមន្ត្រីកំពុងចូលរួមកិច្ចប្រជុំកំពូល ជប៉ុន-អាស៊ាន ក៏ដូចជាដើម្បីរំឭកខួបលើកទី ៥០ នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសជប៉ុន និងអាស៊ាន ចាប់ពីថ្ងៃសៅរ៍ទី១៦ ដល់ថ្ងៃចន្ទទី១៨ ខែធ្នូ ។

ស្របពេលជាមួយគ្នានេះ លោកនាយករដ្ឋមន្ត្រី សេដ្ឋា ថាវីស៊ីន គ្រោងនឹងត្រឡប់មកមាតុប្រទេសវិញនៅថ្ងៃចន្ទ ទី១៨ ខែធ្នូ ដោយសារតែនៅព្រឹកថ្ងៃអង្គារ ទី១៩ ខែធ្នូ លោកនឹងធ្វើជាប្រធានកិច្ចប្រជុំគណៈរដ្ឋមន្ត្រី ហើយឈប់សម្រាកចាប់ពីរសៀលថ្ងៃអង្គារ ទី១៩ ខែធ្នូនោះតែម្ដង ។

យោងតាមប្រភពព័ត៌មានបានឲ្យដឹងថា លោក សេដ្ឋា ថាវីស៊ីន នឹងទៅសម្រាកលំហែកាយជាមួយក្រុមគ្រួសារនៅភូកេត ខណៈយោងតាមលោក Somkid Chuakong អគ្គលេខាធិការរងរបស់នាយករដ្ឋមន្ត្រីបានថ្លែងថា លោក សេដ្ឋា ថាវីស៊ីន ត្រូវការពេលសម្រាក បន្ទាប់ពីជាប់ដៃធ្វើការងារលំបាកៗ និងមិនសូវមានពេល ចាប់តាំងឡើងជានាយករដ្ឋមន្ត្រីក្នុងពេលជាង ៣ ខែមកនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ អ៊ីស្រាអែល ទម្លាក់ខិត្តប័ណ្ណផ្ដល់រង្វាន់ ៤០ ម៉ឺនដុល្លារសម្រាប់ព័ត៌មានឈានដល់ការចាប់ខ្លួនមេក្រុមហាម៉ាស