គ្រោះមហន្តរាយនៅ Gansu ក្លាយជាការរញ្ជួយដីសម្លាប់មនុស្សច្រើនបំផុតរបស់ចិន នាប៉ុន្មានឆ្នាំមកនេះ

មនុស្សយ៉ាងតិច១២៧នាក់ បានស្លាប់នៅភាគពាយព្យប្រទេសចិន ក្នុងការរញ្ជួយដីដ៏សាហាវបំផុតរបស់ប្រទេសនេះ ក្នុងរយៈពេលប៉ុន្មានឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីកម្រិត ៦.២រ៉ិចទ័រ បានវាយប្រហារខេត្ត Gansu នៅពាក់កណ្តាលអធ្រាត្រថ្ងៃចន្ទហើយវាក៏អង្រួនខេត្ត Qinghai ដែលស្ថិតនៅជិតនោះផងដែរ។

ទោះបីជាយ៉ាងណាក៏ដោយ តួលេខអ្នកស្លាប់អាចកើនឡើងបន្ថែមទៀត ខណៈមនុស្សជាង ៧០០នាក់ ត្រូវបានរាយការណ៍ថា រងរបួស។

ប្រព័ន្ធផ្សព្វផ្សាយចិនបានដកស្រង់សម្តីប្រធានក្រុមជួយសង្គ្រោះខេត្ត Gansu ដែលសន្មតថា ការខូចខាតទ្រង់ទ្រាយធំគឺបណ្តាលមកពីគុណភាពសំណង់មិនល្អនៅក្នុងភូមិ ដោយផ្ទះជាច្រើនមានសភាពចាស់ទ្រុឌទ្រោម និងជាសំណង់ធ្វើពីដីឥដ្ឋ។

ខេត្ត Gansu ស្ថិតនៅចន្លោះខ្ពង់រាបទីបេ និងតំបន់ Loess ហើយមានព្រំប្រទល់ជាប់ប្រទេសម៉ុងហ្គោលី។ ខេត្តដាច់ស្រយាលនេះ គឺជាតំបន់មួយក្នុងចំណោមតំបន់ដែលមានប្រជាជនក្រីក្រ និងសម្បូរជនជាតិភាគតិចបំផុតរបស់ប្រទេសចិន។

ចំណុចកណ្តាលនៃការរញ្ជួយដី គឺស្ថិតនៅក្នុងតំបន់ស្វយ័ត Linxia Hui ដែលជាបណ្តុំនៃក្រុមមូស្លីមចិនជាច្រើន រួមទាំងប្រជាជន Hui, Bonan, Dongxiang និង Salar ផងដែរ។

នេះគឺជាគ្រោះមហន្តរាយដ៏អាក្រក់បំផុតរបស់ប្រទេសចាប់តាំងពីឆ្នាំ២០១៤មក នៅពេលមនុស្សជាង ៦០០នាក់ ត្រូវបានសម្លាប់ដោយការរញ្ជួយដីនៅភាគនិរតីនៃ ខេត្តយូណាន។

សូមបញ្ជាក់ថា ​ចិន ​ស្ថិត​នៅ​ក្នុង​តំបន់​​ដែល​មានផ្ទាំងតិចតូនិច​មួយ​ចំនួន ត្រូវ​ជួប​គ្នា ហេតុនេះហើយ ទើបធ្វើឲ្យប្រទេសងាយនឹងជួបគ្រោះរញ្ជួយដីណាស់។

ការរញ្ជួយដីនៅ Yushu ក្នុងខេត្ត Qinghai ជាប់ខេត្ត Gansu ក្នុងឆ្នាំ២០១០ បានឆក់យកជីវិតមនុស្សជិត២៧០០នាក់ ហើយការរញ្ជួយដីដ៏បំផ្លិចបំផ្លាញបំផុតរបស់ប្រទេសចិនក្នុងរយៈពេលប៉ុន្មានទសវត្សរ៍ថ្មីៗនេះ គឺនៅឆ្នាំ២០០៨ ក្នុងខេត្ត Sichuan ភាគនិរតី ដែលបណ្តាលឲ្យមនុស្ស៨៧០០០នាក់បាត់បង់ជីវិត៕

ប្រែសម្រួល៖ Vann Vann

ប្រភព៖ BBC

ចុចអាន៖ រញ្ជួយដីនៅចិន សម្លាប់មនុស្សដល់១១៨នាក់ ខណៈក្រុមជួយសង្គ្រោះ តស៊ូក្នុងសីតុណ្ហភាពក្រោមសូន្យអង្សាសេ