រញ្ជួយដីនៅចិន សម្លាប់មនុស្សដល់១១៨នាក់ ខណៈក្រុមជួយសង្គ្រោះ តស៊ូក្នុងសីតុណ្ហភាពក្រោមសូន្យអង្សាសេ

ចំនួនមនុស្សស្លាប់ដោយសារការរញ្ជួយដីកម្រិត ៦.២រ៉ិចទ័រនៅខេត្ត Gansu ប្រទេសចិន បានកើនឡើងដល់១១៨នាក់ហើយ ខណៈគេគិតថានឹងមានមនុស្សស្លាប់បន្ថែមទៀត។ 

ស្របពេលជាមួយគ្នានោះ ក្រុមអ្នកជួយសង្គ្រោះ កំពុងរុករកតាមគំនរបាក់បែក ទាំងក្នុងអាកាសធាតុដ៏ត្រជាក់។

អាជ្ញាធរនិយាយថា មនុស្សពីរនាក់ទៀត បានស្លាប់នៅខេត្ត Qinghai ដែលនាំឲ្យមនុស្សស្លាប់នៅទីនោះកើនឡើងដល់១៣នាក់ ហើយមនុស្សប្រហែល១០៥នាក់ ក៏បានស្លាប់ផងដែរនៅក្នុងខេត្ត Gansu ជាមួយអ្នករងរបួសសរុប២៦៦នាក់នៅទូទាំងខេត្តទាំងពីរ។

ក្រុមអ្នកពន្លត់អគ្គិភ័យ ទាហាន និងប៉ូលិសកំពុងស្វែងរកអ្នកនៅរស់រានមានជីវិត ក្នុងសីតុណ្ហភាពចុះដល់ -១៣អង្សាសេ ថ្វីបើអាជ្ញាធរព្រមានថា ការរញ្ជួយដីតូចៗ អាចនឹងកើតឡើងជាបន្តក៏ដោយ។

សីតុណ្ហភាព​ បាន​ធ្លាក់​ចុះ​ដល់​កម្រិត​ត្រជាក់បំផុត ​នៅ​ទូទាំង​ភាគ​ខាងជើង​​ប្រទេស​ចិន ខណៈ​​ខ្យល់​ត្រជាក់​បាន​គ្រប​ដណ្ដប់​ផ្នែក​ជាច្រើន​នៃ​ប្រទេស។

តាមសេចក្តីរាយការណ៍របស់ប្រព័ន្ធផ្សព្វផ្សាយរដ្ឋ, ខេត្ត Shanxi, Hebei និង Liaoning សុទ្ធតែជួបប្រទះសីតុណ្ហភាពចុះទាបជាប់កំណត់ត្រា។

សូមបញ្ជាក់ថា បើគិតលើតួលេខអ្នកស្លាប់និងរបួស គ្រោះមហន្តរាយនៅ Gansu គឺជាការរញ្ជួយដីសម្លាប់មនុស្សច្រើនបំផុត ចាប់តាំងពីការរញ្ជួយដីដ៏បំផ្លិចបំផ្លាញឆ្នាំ២០១០ នៅតំបន់ Yushu នៃខេត្ត Qinghai ដែលបានឆក់យកជីវិតមនុស្សជិត២៧០០នាក់៕

ប្រែសម្រួល៖ Vann Vann

ប្រភព៖ BBC

ចុចអាន៖ រញ្ជួយដីនៅចិន សម្លាប់មនុស្ស ៨៦នាក់