ព័ត៌មានអន្ដរជាតិ
អាជ្ញាធរតំបន់ហ្គាហ្សាចោទ អ៊ីស្រាអែល ថា លួចវះយកគ្រឿងក្នុងសាកសពពលរដ្ឋ ប៉ាឡេស្ទីន
អាជ្ញាធរនៅក្នុងតំបន់ហ្គាហ្សាកាលពីថ្ងៃពុធបានចោទចំៗទៅកាន់ប្រទេសអ៊ីស្រាអែលថាបានលួចវះយកសរីរាង្គ និងគ្រឿងក្នុងរបស់សាកសពពលរដ្ឋប៉ាឡេស្ទីន ហើយក៏បានជំរុញឲ្យសហគមន៍អន្តរជាតិបើកការស៊ើបអង្កេតលើករណីដ៏ព្រៃផ្សៃមួយនេះផងដែរ ។
ការិយាល័យប្រព័ន្ធផ្សព្វផ្សាយរបស់រដ្ឋាភិបាលដែលមានមូលដ្ឋាននៅតំបន់ហ្គាហ្សាបាននិយាយនៅក្នុងសេចក្តីថ្លែងការណ៍មួយថា “ឆ្លងតាមការពិនិត្យសាកសពកន្លងមកនេះបានបង្ហាញថា រូបរាងនៃអ្នកស្លាប់បាត់បង់ជីវិតគឺមើលសឹងតែមិនស្គាល់ថាជានរណា ដោយសារតែការលួចវះយកសរីរាង្គសំខាន់ៗរបស់សាកសពទាំងនោះអស់ទៅហើយ” ។
សេចក្ដីថ្លែងការណ៍បានបន្ថែមថា កងទ័ពអ៊ីស្រាអែលក៏បានប្រគល់សាកសពទាំងនោះមកកាន់ទឹកដីប៉ាឡេស្ទីនរួចហើយផងដែរ ប៉ុន្តែមិនបានបញ្ជាក់ពីឈ្មោះ ឬអត្តសញ្ញាណ ក៏ដូចជាទីកតាំងដែលកងទ័ពដឹកយកសាកសពទាំងនោះមកដែរ ។
អាជ្ញាធរបានអះអាងទៀតថា នេះគឺជាទង្វើដ៏ស្មោកគ្រោកជាទីបំផុតរបស់កងទ័ពអ៊ីស្រាអែល ហើយអាជ្ញាធរសូមអំពាវនាវទៅដល់អង្គការអន្តរជាតិដែលកំពុងប្រតិបត្តិការនៅតំបន់ហ្គាហ្សា រួមទាំងគណៈកម្មាធិការអន្តរជាតិនៃកាកបាទក្រហមផងដែរ ថាតើបន្តនៅស្ងៀមដល់ពេលណាទៀត គួរតែចាត់វិធានការឆ្ពោះទៅកាន់ការកាត់ទោសអ៊ីស្រាអែល ពាក់ព័ន្ធនឹងឧក្រិដ្ឋកម្មដ៏ផ្សៃព្រៃបែបនេះ ។
ទាក់ទិននឹងបញ្ហានេះដែរ យោងតាមអ្នកឆ្លើយឆ្លងព័ត៌មាន Anadolu ដែលឈរជើងប្រចាំនៅតំបន់នោះបាននិយាយថា ក្រសួងសុខាភិបាលនៅហ្គាហ្សាបានទទួលសាកសពប្រហែល ៨០ នាក់តាមរយៈច្រកព្រំដែន Kerem Shalom នៅភាគខាងត្បូងហ្គាហ្សាស្ទ្រីប ហើយបច្ចុប្បន្នក្រុមការងារក៏កំពុងដុតដៃដុតជើងយកសាកសពទៅកន្លែងបញ្ចុះនៅក្នុងផ្នូរដ៏ធំផងដែរ ។
អ្នកឆ្លងឆ្លើយព័ត៌មានរូបនេះបានបន្ថែមថា កងទ័ពអ៊ីស្រាអែលបានដឹកសាកសពទាំងនោះនៅក្នុងកុងតឺន័រដ៏ធំមួយ ខណៈសាកសពមួយចំនួនបានបែកសាច់ចេញពីគ្នា ហើយអ្នកខ្លះទៀតបានស្អុយរលួយអស់ទៅហើយ ស្របពេលដែលរហូតមកដល់ពេលនេះ អាជ្ញាធរអ៊ីស្រាអែលក៏មិនទាន់ធ្វើអត្ថាធិប្បាយលើការចោទប្រកាន់ទាំងនេះនៅឡើយផងដែរ ។
គួរបញ្ជាក់ថា អ៊ីស្រាអែលបានបើកការវាយប្រហារតាមផ្លូវអាកាស និងដីគោកលើតំបន់ហ្គាហ្សាស្ទ្រីប ជាការសងសឹកចំពោះការវាយឆ្មក់របស់ក្រុមហាម៉ាសក្នុងព្រឹត្តិការណ៍ ៧ តុលា ដោយបានសម្លាប់ជនជាតិប៉ាឡេស្ទីនដល់ ២១,១១០ នាក់ហើយ ដែលភាគច្រើនជាកុមារ និងស្ត្រី និងជាង ៥៤,០០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕
ប្រែសម្រួលដោយ ៖ ជីវ័ន្ត
ប្រភព ៖ Anadolu
ចុចអាន ៖ អាមេរិក ដឹកយន្តហោះ និងកប៉ាល់ ២៥០ គ្រឿងទៅ អ៊ីស្រាអែល ចំពេលមានសង្គ្រាមនៅហ្គាហ្សា
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង