ឆ្នាំក្រោយ វៀតណាម បាញ់បង្ហោះផ្កាយរណបរ៉ាដា ចូលទៅក្នុងតារាវិថី

តាមការចុះផ្សាយរបស់ VN Express, ផ្កាយរណបបច្ចេកវិទ្យារ៉ាដាដំបូងបង្អស់របស់វៀតណាមឈ្មោះ LOTUSat-1 ត្រូវបានគេរំពឹងថានឹងបញ្ចប់រួចរាល់នៅខែមីនា ហើយរង់ចាំការបាញ់បង្ហោះទៅកាន់តារាវិថីនៅដើមឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

LOTUSat-1 គឺជាផ្កាយរណបអង្កេតផែនដី ដែលមានសមត្ថភាពថតរូបភាពក្នុងកម្រិតច្បាស់ទោះក្នុងអាកាសធាតុបែបណាក៏ដោយ ព្រោះថាវាប្រើបច្ចេកវិទ្យាចាប់សញ្ញា synthetic aperture radar (SAR)។

ទិន្នន័យរូបភាពពីផ្កាយរណបនេះ នឹងជួយឲ្យវៀតណាមទទួលបានព័ត៌មានត្រឹមត្រូវ ដើម្បីឆ្លើយតបនិងកាត់បន្ថយផលប៉ះពាល់នៃគ្រោះធម្មជាតិ ក៏ដូចជាបម្រែបម្រួលអាកាសធាតុ គ្រប់គ្រងធនធានធម្មជាតិ និងតាមដានបរិស្ថាន ដើម្បីបម្រើដល់ការអភិវឌ្ឍសេដ្ឋកិច្ចសង្គម។

បណ្ឌិត Le Xuan Huy អគ្គនាយករងនៃមជ្ឈមណ្ឌលអវកាសវៀតណាម និយាយថា ដោយមានការជួយជ្រោមជ្រែងពីប្រទេសជប៉ុន, ការអភិវឌ្ឍផ្កាយរណប LOTUSat-1 ក្រោមគម្រោង “ការការពារគ្រោះមហន្តរាយធម្មជាតិ និងបម្រែបម្រួលអាកាសធាតុ ដោយប្រើប្រាស់ផ្កាយរណបអង្កេតផែនដី” នេះគឺបានចាប់ផ្តើមឡើងនៅឧទ្យាន Hoa Lac High-Tech Park ក្នុងទីក្រុងហាណូយ តាំងពីខែកញ្ញាឆ្នាំ២០១២ មកម្ល៉េះ។

តាមការបញ្ជាក់ពីលោក Huy, ​ផ្កាយ​រណបនេះ នឹងបំពេញបេសកកម្ម ​ក្នុង​គន្លង​គោចរ​រយៈ​ពេល៥ឆ្នាំ។

សូមបញ្ជាក់ វៀតណាមនិងជប៉ុន បានចាប់ផ្តើមកិច្ចសហប្រតិបត្តិការក្នុងវិស័យបច្ចេកវិទ្យាអវកាសតាំងពីឆ្នាំ ២០០៦មក។ ដោយមានការគាំទ្រពីជប៉ុន, វៀតណាមបានស្រាវជ្រាវ និងផលិតផ្កាយរណបខ្នាតតូច “Made in Vietnam” ចំនួន ៣ គ្រឿងរួមមាន PicoDragon, Nano Dragon និង MicroDragon ហើយត្រូវបានបាញ់បង្ហោះដោយជោគជ័យទៅកាន់តារាវិថី៕

អត្ថបទ៖ សុខ សុវណ្ណ

ចុចអាន៖ Geespace បាញ់បង្ហោះផ្កាយរណបប្រាំបួនដំបូងដោយជោគជ័យ