ចិន ជួបគ្រោះមួយទៀត បន្ទាប់ពីបាក់ដីសង្កត់​មនុស្សស្លាប់ ១១ នាក់

គ្រោះរញ្ជួយដីកម្រិត ៧.១ រ៉ិចទ័របានវាយប្រហារនៅតាមតំបន់ភ្នំភាគខាងលិចនៃព្រំដែន ចិន-កៀហ្ស៊ីស៊ីស្ថាន ដែលបង្កឲ្យមានការព្រមានអំពីការខូចខាតទ្រង់ទ្រាយធំដែលអាចកើតមាន ទោះបីជាមិនមានអ្នកស្លាប់ និងរបួសត្រូវបានរាយការណ៍ភ្លាមៗក៏ដោយ ។ ​នេះបើយោងតាមការចេញផ្សាយរបស់សារពត៌មាន South China Morning Post នៅថ្ងៃទី២៣ ​ខែមករានេះ ។

ទីភ្នាក់ងារសារព័ត៌មានរដ្ឋ Xinhua បាននិយាយថា អាជ្ញាធរក្នុងតំបន់បានត្រៀមបញ្ជូនក្រុមជួយសង្គ្រោះប្រហែល ៨០០ នាក់សម្រាប់បេសកកម្មជួយសង្គ្រោះនៅក្នុងគ្រោះមហន្តរាយមួយនេះ ។ គ្រោះរញ្ជួយដីនេះបានកើតឡើងនៅម៉ោង ២ ទៀបភ្លឺថ្ងៃអង្គារនេះក្នុងជម្រៅ ១៣ គីឡូម៉ែត្រនៅតំបន់ Xinjiang របស់ប្រទេសចិនដែលមានចម្ងាយប្រហែល ១៤០ គីឡូម៉ែត្រភាគខាងលិចនៃទីក្រុង Aksu ប្រទេសកៀហ្ស៊ីស៊ីស្ថាន ។

ដោយឡែកយោងតាម AFP បានឲ្យដឹងថា មនុស្សម្នាបានភៀសខ្លួនចេញពីផ្ទះរបស់ពួកគេ ដើម្បីស្វែងរកកន្លែងជ្រកកោននៅតាមដងផ្លូវក្នុងរដ្ឋធានី Bishkek របស់ប្រទេសកៀហ្ស៊ីស៊ីស្ថាន បន្ទាប់ពីគ្រោះរញ្ជួយដីបានបណ្តាលឲ្យរង្គើជញ្ជាំងផ្ទះ ការបាក់ដី​ និងបាក់​ដើមឈឹ ។ ចំណែកអាជ្ញាធរក្នុងប្រទេសកៀហ្ស៊ីស៊ីស្ថានក៏បានរាយការណ៍ពីការរញ្ជួយដីផងដែរ ទោះបីជាមិនមានការបញ្ជាក់ពីអ្នកស្លាប់ ឬការខូចខាតធំណាមួយក៏ដោយ ។

គួរបញ្ជាក់ថា គ្រោះរញ្ជួយដីនេះបានកើតឡើងមួយថ្ងៃប៉ុណ្ណោះ បន្ទាប់ពីការរអិលបាក់ដីបានកប់មនុស្សរាប់សិបនាក់ និងបានសម្លាប់មនុស្សយ៉ាងហោចណាស់ ១១ នាក់នៅភាគនិរតីនៃប្រទេសចិន ហើយបើសរុបគ្រោះរញ្ជួយដីនៅប្រទេសចិនកាលពីខែធ្នូ ឆ្នាំ ២០២៣ បានសម្លាប់មនុស្ស ១៤៨ នាក់ និងរាប់ពាន់នាក់បានផ្លាស់ទីលំនៅ ខណៈនៅតំបន់ភាគខាងលិចនៃប្រទេស រួមមានខេត្ត Gansu, Qinghai, Sichuan និង Yunnan ព្រមទាំងតំបន់ Xinjiang និងទីបេ គឹជាតំបន់ដែលរងការវាយប្រហារដោយ​គ្រោះរញ្ជួយដីញឹកញាប់ជាងគេ ៕

អត្ថបទ៖ ប៊ុន​ សុភាព