អាមេរិក ដឹកគ្រឿងសឹកមកអូស្រ្តាលីរួចហើយ ត្រៀមធ្វើសង្គ្រាមជាមួយ ចិន

ទីភ្នាក់ងារព័ត៌មាន Reuters បានរាយការណ៍កាលពីថ្ងៃព្រហស្បតិ៍ទី១ខែកុម្ភៈថា សហរដ្ឋអាមេរិកបានប្រើប្រាស់សមយុទ្ធរួមគ្នាធំបំផុតមិនធ្លាប់មានកាលពីឆ្នាំមុនជាមួយអូស្ត្រាលី ដើម្បីបង្កើតឃ្លាំងស្តុកសព្វាវុធថ្មីៗនៅក្នុងប្រទេសនោះ ត្រៀមសម្រាប់ជម្លោះជាមួយចិន លើបញ្ហាកោះតៃវ៉ាន់ ហើយគ្រឿងសឹកសង្គ្រាម ក៏ត្រូវបានបញ្ជូនទៅទុករួចហើយដែរ ក្នុងអំឡុងសមយុទ្ធ Talisman Saber កាលពីខែកក្កដា និងសីហា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធនេះធ្វើឡើងនៅក្នុងនិងជុំវិញប្រទេសអូស្ត្រាលី ដោយមានការចូលរួមពីទាហានជាង ៣៤០០០នាក់ មកពីប្រទេសចំនួន ១៣ ហើយផ្តោតជាពិសេសលើការត្រៀមលក្ខណៈប្រយុទ្ធ និងផ្នែកព័ស្តុភារ។

មន្ត្រីអាមេរិកដែលផ្តល់បទសម្ភាសជាមួយ Reuters បានឲ្យដឹងថា គ្រឿងសឹកដែលដឹកមកធ្វើសមយុទ្ធនេះ ក៏រួមមានទាំងរថយន្តនិងយានសណ្តោងចំនួន៣៣០គ្រឿង និងកុងតឺន័រ១៣០ ផងដែរដែលរក្សាទុកនៅភាគអាគ្នេយ៍នៃប្រទេសអូស្ត្រាលី។ ​ក្នុង​ករណី​មាន​ជម្លោះ របស់ទាំងនេះអាចបំពេញការងារបានស្មើនឹងក្រុមហ៊ុនដឹកជញ្ជូនចំនួន៣ ហើយម៉្យាងទៀត ឧបករណ៍នេះអាចប្រើប្រាស់ក្នុងអំឡុងពេលសមយុទ្ធនាពេលអនាគត ឬដើម្បីដោះស្រាយជាមួយគ្រោះមហន្តរាយធម្មជាតិដែលអាចកើតមាន។

មានមន្ត្រីជាច្រើនប្រាប់ទៅ Reuters ថា ចំណុចខ្សោយរបស់អាមេរិកក្នុងករណីផ្ទុះសង្គ្រាមនៅតែវ៉ាន់ គឺជាបញ្ហាព័ស្តុភារនេះឯង។ បើសង្គ្រាមកើតឡើងមែន ចិន អាចទម្លាក់គ្រាប់បែកលើនាវាដឹកប្រេង ឬឃ្លាំងប្រេង ហើយយុទ្ធសាស្រ្តបែបនេះ ចិន អាចមានប្រៀបលើអាមេរិក។

ទោះបីជាយ៉ាងណាក៏ដោយ ស្ថានទូតចិនប្រចាំនៅសហរដ្ឋអាមេរិក មិនធ្វើអត្ថាធិប្បាយដោយផ្ទាល់លើរបាយការណ៍នេះទេ ប៉ុន្តែបានប្រាប់ Reuters ថា ទីក្រុងវ៉ាស៊ីនតោនគួរតែបញ្ឈប់ការពង្រឹងទំនាក់ទំនងយោធាជាមួយទីក្រុងតៃប៉ិ និងបង្កើនភាពតានតឹងនៅច្រកសមុទ្រតៃវ៉ាន់ទៅ។

កាលពីសប្តាហ៍មុន កងទ័ពជើងទឹកសហរដ្ឋអាមេរិក ក៏បានបញ្ជូននាវាចម្បាំង USS John Finn ធ្វើដំណើរឆ្លងកាត់ច្រកសមុទ្រតៃវ៉ាន់ជាលើកដំបូងផងដែរ ក្រោយដែនកោះមួយនេះបោះឆ្នោតជ្រើសបានប្រធានាធិបតីថ្មី។

កងទ័ពជើងទឹកអាមេរិកបាននិយាយក្នុងសេចក្តីថ្លែងការណ៍មួយថា “ការធ្វើដំណើររបស់នាវាពិឃាដ USS John Finn ឆ្លងកាត់ច្រករបៀងក្នុងសមុទ្រតៃវ៉ាន់ គឺបង្ហាញពីការប្តេជ្ញាចិត្តរបស់សហរដ្ឋអាមេរិក ក្នុងការលើកកម្ពស់សេរីភាពនៃការធ្វើនាវាចរណ៍សម្រាប់គ្រប់ប្រជាជាតិ ហើយ​គ្មាន​សមាជិក​អន្តរជាតិ​ណា​មួយ​ត្រូវ​បាន​គំរាមសម្លុត ឬ​ប្រើអំណាចបង្ក្រាប​ឲ្យ​បោះបង់​ចោលសិទ្ធិ និង​សេរីភាព​របស់​ពួកគេ​ឡើយ”។

សូមជម្រាបថា ភាពប្រេះឆារវាងអាមេរិកនិងចិន លើបញ្ហាកោះតៃវ៉ាន់ កាន់តែធ្ងន់ធ្ងរក្នុងរយៈពេលប៉ុន្មានខែចុងក្រោយ ដោយការលក់អាវុធរបស់ទីក្រុងវ៉ាស៊ីនតោន ក៏ដូចជាដំណើរទស្សនកិច្ចរបស់សមាជិកសភាជាន់ខ្ពស់អាមេរិក ទៅកាន់កោះនេះ។

ទីក្រុងប៉េកាំង ចាត់ទុកតៃវ៉ាន់ ជាផ្នែកនៃទឹកដីអធិបតេយ្យរបស់ខ្លួន ហើយថ្កោលទំនាក់ទំនងរបស់សហរដ្ឋអាមេរិកជាមួយទីក្រុងតៃប៉ិ ថាជាការជ្រៀតជ្រែកកិច្ចការផ្ទៃក្នុងរបស់ខ្លួន ខណៈលោកប្រធានាធិបតី ស៊ី ជីនពីង សង្កត់ធ្ងន់ថា ប្រទេសចិន កំពុងព្យាយាមបង្រួបបង្រួមកោះនេះដោយសន្តិវិធី ប៉ុន្តែមិនច្រានចោលការប្រើប្រាស់កម្លាំងបាយឡើយ ដើម្បីសម្រេចគោលដៅ៕

អត្ថបទ៖ សុខ សុវណ្ណ

ចុចអាន៖ ចិន ក្ដៅស្លឹកត្រចៀក ក្រោយ អាមេរិក បើកនាវាចម្បាំងកាត់ច្រកសមុទ្រតៃវ៉ាន់​ជាលើកដំបូង ក្រោយបោះឆ្នោត