ណាតូ ចង់​ពង្រឹង​សមត្ថភាព​យោធា​របស់​សមាជិក​ខ្លួន​ឲ្យ​ខ្លាំង​ជាង​មុន ៣០%

អង្គការ​ណាតូ គ្រោងនឹងស្នើសុំប្រទេសជាសមាជិករបស់ខ្លួន​ឲ្យ​បង្កើនសមត្ថភាពយោធារបស់ពួកគេចំនួន ៣០​% ក្នុងគោលបំណងពង្រឹងជំហរការពាររបស់សម្ព័ន្ធមិត្ត ចំពេលមានការវិវត្តនៃបញ្ហាប្រឈមផ្នែកសន្តិសុខពិភពលោក។

យោង​តាម​ការ​ចុះផ្សាយ​របស់​សារព័ត៌មាន Newsmax កាល​ពី​ថ្ងៃ​ទី​២០​ខែ​មីនា គំនិតផ្តួចផ្តើមនេះគឺជាផ្នែកមួយនៃយុទ្ធសាស្ត្រទូលំទូលាយរបស់អង្គការណាតូក្នុងការពង្រឹងយន្តការរារាំង និងការការពារខ្លួន ជាពិសេសដោយសារ​តែបញ្ហា​ភូមិសាស្ត្រនយោបាយនាពេលថ្មីៗនេះ។ គោលដៅសមត្ថភាពដែលបានស្នើឡើង បានទទួលការយល់ព្រម ៨០% ពី​សមាជិក​រួចហើយ ដោយកិច្ចខិតខំប្រឹងប្រែងកំពុង​ព្យាយាមសម្រេច​ឲ្យ​បាននូវឯកច្ឆន្ទពេញលេញ នៅមុនកិច្ចប្រជុំកំពូល​ណាតូ​​ក្នុង​ទីក្រុងឡាអេ​នា​ខែមិថុនា​ខាង​មុខ។

អគ្គលេខាធិការអង្គការណាតូ លោក Mark Rutte សង្កត់ធ្ងន់ថា ការបង្កើនការត្រៀមខ្លួន និងប្រសិទ្ធភាព គឺ​ល្អ​ច្រើនជាងការបង្កើន​តែ​តួ​លេខ ដោយ​វាទាមទារល្បឿន មាត្រដ្ឋាន ភាពបត់បែន និងសមត្ថភាពចម្រុះ។

បន្ថែម​ពី​នេះ លោក Rutte បានគូសបញ្ជាក់ពីភាពចាំបាច់នៃការទទួលយក «ផ្នត់គំនិតសម័យសង្រ្គាម» ដើម្បីពន្លឿនការផលិត និងការចំណាយលើវិស័យការពារជាតិ ដោយស្នើថា ណាតូ​មានគោលបំណងកំណត់គោលដៅចំណាយថ្មី ៣% នៃ GDP នៅឆ្នាំ​២០៣០ ពោលគឺកើនឡើងពីស្តង់ដារ ២% បច្ចុប្បន្ន។

រដ្ឋជាសមាជិកនីមួយៗកំពុងឆ្លើយតបទៅនឹងការ​អំពាវនាវ​ទាំងនេះជាមួយនឹងការប្តេជ្ញាចិត្ត​ដ៏​ខ្លាំង​ក្លា។ គួរកត់សម្គាល់ថា ប្រទេសលីទុយអានី និងអេស្តូនី បានសន្យាបង្កើនការចំណាយលើវិស័យការពារជាតិដល់ទៅ ៥% នៃ GDP ដែលឆ្លុះបញ្ចាំងពីការយកចិត្តទុកដាក់ដ៏រឹងមាំក្នុងការពង្រឹងសមត្ថភាពយោធារបស់ពួកគេ ដើម្បីឆ្លើយតបទៅនឹងកង្វល់សន្តិសុខក្នុងតំបន់៕

ដោយ៖ ឈាង