គ្រោះទឹកជំនន់នៅ ឥណ្ឌូណេស៊ី ផ្ដាច់ជីវិតមនុស្ស ១៩ នាក់

ក្រុមមន្ត្រីបាននិយាយថា ទឹកជំនន់ភ្លាមៗ និងការបាក់ដីនៅលើកោះស៊ូម៉ាត្រា ប្រទេសឥណ្ឌូណេស៊ីបានបណ្តាលឲ្យមនុស្សយ៉ាងតិច ១៩ នាក់ស្លាប់ និង ៧ នាក់ផ្សេងទៀតបាត់ខ្លួន ។ នេះបើយោងតាមការចេញផ្សាយរបស់សារពត៌មាន  Al Jazeera កាលពីថ្ងៃទី១០ ខែមីនា ។

យោងតាមប្រធានទីភ្នាក់ងារគ្រប់គ្រងគ្រោះមហន្តរាយជាតិរបស់ប្រទេសឥណ្ឌូណេស៊ីបាននិយាយកាលពីថ្ងៃអាទិត្យថា ភក់ ថ្ម និងដើមឈើដែលបាក់រលំ បានរអិលចុះពីលើភ្នំ និងបានលេបត្របាក់ភូមិនានានៅក្នុងស្រុក Pesisir Selatan នៃខេត្ត West Sumatra កាលពីល្ងាចថ្ងៃសុក្រ បន្ទាប់ពីមានភ្លៀងធ្លាក់ខ្លាំង ។

ក្រុមអ្នកជួយសង្គ្រោះបានរកឃើញ សាកសពមនុស្សចំនួន ៦ នាក់នៅក្នុងទីក្រុង Pesisir Selatan ហើយសាកសពចំនួន ៣ នាក់ទៀតរកឃើញនៅក្នុងស្រុកជិតខាងនៃ Padang Pariaman ដែលនាំឲ្យចំនួនអ្នកស្លាប់មកដល់ពេលនេះកើនឡើងដល់ ១៩ នាក់ហើយ ។

ស្របពេលជាមួយគ្នានេះ យ៉ាងហោចណាស់អ្នកភូមិ ២ នាក់បានរងរបួស និង ៧ នាក់ផ្សេងទៀតកំពុងបាត់ខ្លួន ក្នុងនោះមនុស្សជាង ៨០,០០០ នាក់បានភៀសខ្លួនទៅកាន់ជម្រកបណ្តោះអាសន្នរបស់រដ្ឋាភិបាល ខណៈកិច្ចខិតខំប្រឹងប្រែងជួយសង្គ្រោះទាញយកអ្នកស្លាប់ និងបាត់ខ្លួនត្រូវបានរារាំងដោយការដាច់ចរន្តអគ្គិសនី ផ្លូវត្រូវបានបិទ ដោយសារភក់ក្រាស់ៗ និងកម្ទេចកម្ទី ។

គួរបញ្ជាក់ថា ទឹកជំនន់ភ្លាមៗ និងការរអិលបាក់ដីគឺជារឿងធម្មតាទៅហើយនៅក្នុងប្រទេសឥណ្ឌូណេស៊ី ដោយសារមនុស្សរាប់លាននាក់រស់នៅក្បែរតំបន់ទំនាបទឹកជំនន់ ជាពិសេសក្នុងរដូវវស្សា ៕

អត្ថបទ ៖ ប៊ុន សុភាព