WHO ៖ មានតែផ្ដល់ជំនួយតាមដីគោកប៉ុណ្ណោះ ទើបអាចទប់ស្កាត់គ្រោះ​ទុរ្ភិក្សនៅហ្គាហ្សាបាន

ប្រធានអង្គការសុខភាពពិភពលោក (WHO) បាននិយាយកាលពីថ្ងៃព្រហស្បតិ៍ថា មានតែការពង្រីកផ្លូវកាត់តាមដីគោកចូលទៅក្នុងតំបន់ហ្គាហ្សាប៉ុណ្ណោះ ទើបអាចជួយទប់ស្កាត់គ្រោះទុរ្ភិក្សនៅទីនោះបាន ។ នេះបើយោងតាមការចេញផ្សាយរបស់សារពត៌មាន CNA​ នៅថ្ងៃទី​២២ ​ខែ​មីនានេះ ។

លោក Tedros Adhanom Ghebreyesus ប្រធានអង្គការសុខភាពពិភពលោកបាននិយាយថា កិច្ចខិតខំប្រឹងប្រែងនាពេលថ្មីៗនេះក្នុងការផ្ដល់ជំនួយតាមអាកាស និងសមុទ្រក៏កំពុងប្រតិបត្តិការបន្តបន្ទាប់ផងដែរ ប៉ុន្តែមានតែការពង្រីកផ្លូវឆ្លងកាត់តាមដីគោកបន្ថែមប៉ុណ្ណោះដែលនឹងអនុញ្ញាតឲ្យមានការផ្ដល់ជំនួយទ្រង់ទ្រាយធំដើម្បីទប់ស្កាត់គ្រោះទុរ្ភិក្សបាន ។

ស្របពេលជាមួយគ្នានេះ អង្គការសុខភាពពិភពលោក ក៏បានស្នើឲ្យអ៊ីស្រាអែលបើកច្រកឆ្លងកាត់បន្ថែមទៀត និងពន្លឿនការចូល និងការចែកចាយទឹក ស្បៀងអាហារ ការផ្គត់ផ្គង់វេជ្ជសាស្រ្ត និងជំនួយមនុស្សធម៌ផ្សេងទៀតចូលទៅក្នុងតំបន់ហ្គាហ្សាផងដែរ ។

កន្លងមកអង្គការសហប្រជាជាតិនិយាយថា មានឧបសគ្គដ៏ច្រើនលើសលប់ចំពោះការចល័តជំនួយទៅកាន់ភាគខាងជើងនៃតំបន់ហ្គាហ្សា ដោសារតែគ្មានបទឈប់បាញ់ និងការបិទច្រកព្រំដែនដោយអ៊ីស្រាអែល ខណៈសំណើរបស់អង្គការសុខភាពពិភពលោកក្នុងការផ្គត់ផ្គង់ជំនួយដល់តំបន់នោះ ជារឿយៗត្រូវបានរារាំង ឬបដិសេធ ។

ប៉ុន្តែអ៊ីស្រាអែលនិយាយថា មិនបានដាក់កំហិតលើការផ្ដល់ជំនួយមនុស្សធម៌សម្រាប់តំបន់ហ្គាហ្សានោះទេ ហើយថែមទាំងបានបន្ទោសលើភាពយឺតយ៉ាវនៃការផ្តល់ជំនួយ បូករួមទាំងកង្វះសមត្ថភាព ឬគ្មានប្រសិទ្ធភាពក្នុងចំណោមភ្នាក់ងារអង្គការសហប្រជាជាតិទៀតផង ។

ជំនួយភាគច្រើនដែលចូលមកក្នុងតំបន់ហ្គាហ្សាតាមដីគោក ត្រូវបានរាំងខ្ទប់ដោយអ៊ីស្រាអែលនៅ Kerem Shalom ដែលជាស្ថានីយគយនៅចំណុចព្រំដែនរវាងប្រទេសអេហ្ស៊ីប អ៊ីស្រាអែល និងហ្គាហ្សា ហើយបន្ទាប់មកបាននាំយកមកតាមរយៈទីក្រុងរ៉ាហ្វាភាគខាងត្បូង ដែលជាចំណុចឆ្លងកាត់អ្នកដំណើរដ៏សំខាន់រវាងអេហ្ស៊ីប និងហ្គាហ្សា ។ ទោះយ៉ាងណា កាលពីសប្តាហ៍មុន អ៊ីស្រាអែលក៏បានអនុញ្ញាតឲ្យមានរថយន្តជំនួយចំនួន ៦ គ្រឿងចូលទៅក្នុងតំបន់ហ្គាហ្សាភាគខាងជើងផងដែរ ។

គួរបញ្ជាក់ថា សង្គ្រាមរយៈពេល ៥ ខែកន្លងមកនេះបណ្ដាលឲ្យមានការខ្វះខាតស្បៀងអាហារយ៉ាងធ្ងន់ធ្ងរក្នុងចំណោមប្រជាជនប៉ាឡេស្ទីនចំនួន ២.៣ លាននាក់នៅហ្គាហ្សា ខណៈមានកុមារស្លាប់ជាបន្តបន្ទាប់ ដោយសារផលប៉ះពាល់នៃកង្វះអាហារូបត្ថម្ភ មានជំងឺ កង្វះទឹក និងអនាម័យគ្រប់គ្រាន់ ហើយនៅក្នុងតំបន់មួយចំនួនគឺលើសពីគ្រោះទុរ្ភិក្សទៅទៀត ៕

អត្ថបទ ៖ ប៊ុន សុភាព