ព័ត៌មានអន្ដរជាតិ

អ៊ីស្រាអែល វាយរំដោះចំណាប់ខ្មាំងបាន៤នាក់ តែស្លាប់ជនជាតិប៉ាឡេស្ទីនជាង ២០០នាក់

បានផុស

២ years មុន

នៅ

ថ្ងៃអាទិត្យ ៩ មិថុនា ២០២៤

ដោយ

Chheang

ប្រតិបត្តិការវាយប្រហាររបស់អ៊ីស្រាអែលទៅលើតំបន់ហ្គាហ្សា កាលពីព្រឹកថ្ងៃទី៨ ខែមិថុនា បានរំដោះចំណាប់ខ្មាំងចំនួន ៤នាក់ បន្ទាប់ពីវាយឆ្មក់បានសម្រេចលើអគារចំនួន២កន្លែងរបស់ក្រុមហាម៉ាស ដែលស្ថិតនៅជុំរុំភៀសខ្លួន Nuseirat។ យ៉ាងណាមិញ បើតាមក្រសួងសុខាភិបាលហ្គាហ្សា បានឲ្យដឹងថា ការវាយប្រហាររបស់អ៊ីស្រាអែលលើកនេះ ក៏បានធ្វើឲ្យជនជាតិប៉ាឡេស្ទីនស្លាប់ និងរបួសក្នុងចំនួនច្រើនណាស់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យពីមន្ទីរពេទ្យ Al-Aqsa នៅតំបន់ហ្គាហ្សា ដែលបានចុះផ្សាយដោយសារព័ត៌មាន AP បានឲ្យដឹងថា យ៉ាងហោចណាស់មានជនជាតិប៉ាឡេស្ទីនបានស្លាប់ចំនួន ២១០នាក់ និងមនុស្សរបួសធ្ងន់ស្រាលជាង ១០០នាក់ឯណោះ។ អ្នករងគ្រោះ ត្រូវបានដឹកចេញពីជុំរុំ Nuseirat និងជុំរុំ Deir al-Balah។ វាជាការវាយប្រហារមួយក្នុងចំណោមការវាយប្រហារដែលមានមនុស្សស្លាប់ និងឃោរឃៅបំផុតសម្រាប់សង្គ្រាមរយៈពេលប្រមាណជា៨ខែមកនេះនៅហ្គាហ្សា។

ពាក់ព័ន្ធនឹងការវាយប្រហារទ្រង់ទ្រាយធំលើកនេះ ក្រុមយោធាអ៊ីស្រាអែល បានលើកឡើងថា វាគឺជាការប្រយុទ្ធដើម្បីកម្ចាត់ការគំរាមកំហែងនៅក្នុងតំបន់ប៉ុណ្ណោះ។ លោក Yoav Gallant រដ្ឋមន្ត្រីក្រសួងការពារជាតិអ៊ីស្រាអែល បានហៅប្រតិបត្តិការមួយនេះថា ជាប្រតិបត្តិការជួយសង្គ្រោះដ៏មានវីរភាព ហើយក្រុមអ៊ីស្រាអែលនឹងបន្តវាយរហូតដល់ចំណាប់ខ្មាំងត្រូវបានរំដោះទាល់តែអស់។ ទន្ទឹមគ្នានេះដែរ អ៊ីស្រាអែល បានប្រាប់ថា មានកងទ័ពម្នាក់របស់ខ្លួនបានរងរបួសធ្ងន់ធ្ងរនៅក្នុងប្រតិបត្តិការជួយសង្គ្រោះលើកនេះ។

យោធាអ៊ីស្រាអែល បានបញ្ជាក់ទៀតថា ចំណាប់ខ្មាំងដែលត្រូវបានរំដោះ មានបុរស៣នាក់ និងស្ត្រីម្នាក់ ដូចជា នាង Noa Aragmani អាយុ២៥ឆ្នាំ, លោក Almog Meir Jan អាយុ២១ឆ្នាំ, លោក Andrey Kozlov អាយុ២៧ឆ្នាំ និងលោក Shlomi Ziv អាយុ៤០ឆ្នាំ។

ចំណាប់ខ្មាំងដែលអ៊ីស្រាអែលរំដោះពីក្រុមហាម៉ាស

សូមបញ្ជាក់ថា ក្រុមហាម៉ាស បានចាប់ចំណាប់ខ្មាំងប្រហែល ២៥០នាក់ និងធ្វើឲ្យមនុស្សស្លាប់ប្រហែល ១ ២០០នាក់ កំឡុងពេលបើកការវាយប្រហារលើអ៊ីស្រាអែលនាថ្ងៃទី៧ ខែតុលា ឆ្នាំ២០២៣កន្លងទៅ។ ក្រោយបទឈប់បាញ់រយៈពេល១សប្ដាហ៍នៅក្នុងខែវិច្ឆិកា ប្រហែលពាក់កណ្ដាលនៃចំណាប់ខ្មាំងត្រូវបានដោះលែងឲ្យមានសេរីភាព។ អ៊ីស្រាអែល អះអាងថា នៅមានចំណាប់ខ្មាំងប្រមាណជាង ១៣០នាក់ទៀតកំពុងស្ថិតនៅក្រោមកណ្ដាប់ដៃក្រុមហាម៉ាស ដោយក្នុងនោះចំណាប់ខ្មាំងប្រហែល១ភាគ៤ បានបាត់បង់ជីវិតទៅហើយ៕

ដោយ៖ ឈាង

ព័ត៌មានអន្ដរជាតិ២៤ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា