តើលោក ត្រាំ និង ហ្សេលេនស្គី ពិភាក្សាបញ្ហាអ្វី ក្នុងជំនួបតាមទូរស័ព្ទ?

តាមការចុះផ្សាយរបស់ CNN កាលពីថ្ងៃសុក្រទី១៩ ខែកក្កដា ឆ្នាំ២០២៤, បេក្ខជនមកពីគណបក្សសាធារណរដ្ឋ លោក ដូណាល់ ត្រាំ បាននិយាយទូរស័ព្ទជាមួយប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ដោយក្នុងកិច្ចសន្ទនានោះ ថ្នាក់ដឹកនាំទាំងពីរបានផ្តោតជាសំខាន់លើបញ្ហាសង្គ្រាមរុស្ស៊ី-អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយកិច្ចសន្ទនានោះ លោក ត្រាំ បានបង្ហោះលើបណ្តាញសង្គម Truth Social ថា “ខ្ញុំបាននិយាយទូរស័ព្ទយ៉ាងរលូនជាមួយលោក ហ្សេលេនស្គី។ ក្នុងពេលនោះ អ្នកនយោបាយអ៊ុយក្រែន បានអបអរខ្ញុំចំពោះភាពជោគជ័យសម្រាប់សមាជបក្សសាធារណរដ្ឋ និងថ្កោលទោសចំពោះការប៉ុនប៉ងធ្វើឃាត”។

លោក ត្រាំ បន្តថា “ខ្ញុំសូមកោតសរសើរលោក ហ្សេលេនស្គី ដែរ ចំពោះទំនាក់ទំនងនេះ ព្រោះក្នុងនាមជាប្រធានាធិបតីអាមេរិកថ្មី ខ្ញុំនឹងនាំមកនូវសន្តិភាពដល់ពិភពលោក ហើយបញ្ចប់សង្រ្គាមដែលបានសម្លាប់ជីវិតមនុស្សយ៉ាងច្រើន និងបំផ្លិចបំផ្លាញគ្រួសារស្លូតត្រង់រាប់មិនអស់”។

ងាកទៅលោក ហ្សេលេនស្គី វិញ, លោកក៏បានយល់ព្រមរៀបចំកិច្ចប្រជុំទល់មុខជាមួយលោក ត្រាំ ដែរដើម្បីពិភាកក្សាថាតើ គួរធ្វើអ្វីខ្លះដើម្បីនាំមកនូវសន្តិភាពយូរអង្វែងពិតប្រាកដ។

សូមបញ្ជាក់ថា កិច្ចសន្ទនាតាមទូរស័ព្ទនេះ កើតឡើងត្រឹមមួយថ្ងៃប៉ុណ្ណោះ បន្ទាប់ពីលោក ហ្សេលេនស្គី និយាយក្នុងបទសម្ភាសផ្តាច់មុខជាមួយ BBC នៅទីក្រុងឡុងដ៍ ដែលចេញផ្សាយកាលពីថ្ងៃព្រហស្បតិ៍ទី១៨ ខែកក្កដា ឆ្នាំ២០២៤ ថា ទោះនរណាជាប់ឆ្នោតជាប្រធានាធិបតីអាមេរិកក៏ដោយ ក៏អ៊ុយក្រែនធ្វើការជាមួយដែរ គ្រាន់តែថា បើលោក ដូណាល់ ត្រាំ ជាប់ឆ្នោត អ៊ុយក្រែន នឹងពិបាកធ្វើការជាមួយខ្លាំង។

ចាប់តាំងពីរុស្ស៊ី បើកប្រតិបត្តិការសឹកលើអ៊ុយក្រែនក្នុងខែកុម្ភៈឆ្នាំ២០២២មក លោក ត្រាំ បាននិយាយម្តងហើយម្តងទៀតថា គាត់អាចបញ្ចប់វិបត្តិសង្រ្គាមអ៊ុយក្រែនត្រឹមមួយថ្ងៃប៉ុណ្ណោះ ប៉ុន្តែមកទល់ពេលនេះ គេនៅតែមិនដឹងច្បាស់ថាតើគាត់មានវិធីសាស្រ្តអ្វី។

ទោះបីជាយ៉ាងណាក៏ដោយ នៅក្នុងការជជែកដេញដោល កាលពីខែមុន លោក ត្រាំ បានសង្កត់ធ្ងន់ថា លក្ខខណ្ឌសន្តិភាពរបស់លោកពូទីន ដែលតម្រូវឲ្យកាត់យកដីអ៊ុយក្រែន គឺមិនអាចទទួលយកបានទេ ជាហេតុធ្វើឲ្យគេកាន់តែឆ្ងល់ថាតើ លោក ត្រាំនឹងធ្វើដូចម្តេចទៅ?

អត្ថបទ៖ សុខ សុវណ្ណ

ចុចអាន៖ ប្រធានាធិបតីអ៊ុយក្រែន ត្រៀមធ្វើការជាមួយលោក ត្រាំ រួចហើយ តែថា នឹងពិបាកខ្លាំង