ថៃ គ្រោង​ចេញ​ច្បាប់​អាជីវកម្ម​ហិរញ្ញវត្ថុ​ថ្មី ដើម្បី​ទាក់ទាញ​ការ​វិនិយោគ​បន្ថែម

អនុរដ្ឋមន្ត្រីក្រសួងហិរញ្ញវត្ថុថៃ បាននិយាយកាលពីថ្ងៃសុក្រទី១៩ ខែកក្កដាថា ប្រទេសថៃគ្រោងនឹងដាក់ចេញនូវច្បាប់អាជីវកម្មហិរញ្ញវត្ថុថ្មីមួយ ដើម្បីទាក់ទាញមូលនិធិបរទេស និងសម្រួលដល់វិស័យវិនិយោគ។

លោក Paopoom Rojanasakul បានប្រាប់ថា ច្បាប់នេះនឹងបង្កើតភ្នាក់ងារ “ច្រកចេញចូលតែមួយ” ដែលទទួលខុសត្រូវក្នុងការកំណត់បទប្បញ្ញត្តិ និងចេញអាជ្ញាប័ណ្ណសម្រាប់ផ្នែកហិរញ្ញវត្ថុសំខាន់ៗ ដើម្បីគាំទ្រដល់គោលបំណងរបស់ប្រទេសថៃក្នុងការក្លាយជាមជ្ឈមណ្ឌលហិរញ្ញវត្ថុពិភពលោក។

លោកបានបន្ថែម​ថា វិស័យសំខាន់ៗគឺ វិស័យធនាគារ មូលបត្រ និស្សន្ទវត្ថុ ទ្រព្យសកម្មឌីជីថល និងការធានារ៉ាប់រង ហើយរដ្ឋាភិបាលនឹងដាក់សេចក្ដីព្រាងច្បាប់នេះទៅកាន់សភានៅចុងឆ្នាំ២០២៤។

ចំណែក​ឯ លោក សេដ្ឋា ថាវីស៊ីន នាយករដ្ឋមន្ត្រី​ថៃ ក៏​បាន​ឲ្យ​ដឹង​ដែរ​ថា ការក្លាយជាមជ្ឈមណ្ឌលហិរញ្ញវត្ថុ នឹងផ្លាស់ប្តូររចនាសម្ព័ន្ធសេដ្ឋកិច្ចប្រទេសថៃ ដោយមិនចាំបាច់ប្រើថវិកាវិនិយោគ ហើយនឹងផ្តល់ផលចំណេញយ៉ាងច្រើនតាមរយៈការទាក់ទាញមូលនិធិ ធនធានមនុស្ស និងចំណេះដឹងចូលក្នុង​ប្រទេស៕

ដោយ៖ ឈាង