តើនរណានឹងឡើងដឹកនាំក្រុមហាម៉ាស ក្រោយការស្លាប់លោក Haniyeh?

មេក្រុមហាម៉ាសលោក Ismail Haniyeh ត្រូវ​បាន​សម្លាប់​​កាល​ពី​ព្រឹក​ព្រលឹម​ថ្ងៃ​ពុធសប្តាហ៍មុន នៅ​ក្នុង​រដ្ឋធានី​តេហេរ៉ង់ នៃប្រទេសអ៊ីរ៉ង់ ពេលលោកទៅ​ចូលរួម​ក្នុង​ពិធី​ស្បថ​ចូល​កាន់​តំណែង​ថ្មី​របស់​ប្រធានាធិបតី​អ៊ីរ៉ង់​ Masoud Pezeshkian។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមរណភាពរបស់គាត់ មានការជជែកដេញដោលគ្នាបែកផ្សែងអំពីថាតើនរណា នឹងត្រូវឡើងតំណែងជំនួស?

ខាងក្រោមនេះ គឺជាបុគ្គល៥រូប ដែលគេមើលឃើញថា ជាអ្នកមានឥទ្ធិពលអាចស្នងតំណែងពីលោក Haniyeh៖

1. Khalil al-Hayya

លោក Khalil al-Hayya គឺជាអនុប្រធានការិយាល័យនយោបាយរបស់ក្រុម ហាម៉ាស នៅតំបន់ ហ្គាហ្សា ហើយគាត់ស្គាល់មេដឹកនាំប្រចាំតំបន់គឺលោក Yahya al-Sinwar ច្បាស់ដូចថ្ងៃ។

នៅឆ្នាំ២០០៦ លោក al-Hayya បានដឹកនាំសភារបស់ក្រុមហាម៉ាស ដែលទើបឈ្នះការបោះឆ្នោត។ ការមិនចុះសម្រុងផ្នែកនយោបាយនិងរដ្ឋបាល អូសបន្លាយពេលច្រើនខែ បានបង្ហាញពីភាពបែកបាក់គ្នារវាងចលនាឥស្លាមនិយមមួយនេះ និងគណបក្ស Fatah របស់ប្រមុខប៉ាឡេស្ទីនលោក Mahmoud Abbas។

2. Musa Abu Marzuk

សមាជិកជាន់ខ្ពស់ផ្នែកនយោបាយរបស់ហាម៉ាសរូបនេះ ត្រូវបានចាត់ទុកថា មានបុគ្គលិកលក្ខណៈស្រដៀងគ្នាបេះបិតជាមួយលោក Haniyeh ជាពិសេសវិធីសាស្រ្តនៃការចរចាតែម្តង។

ជាក់ស្តែង លោក Marzuk បានប្រកាសក្តែងៗគាំទ្រដល់ «បទឈប់បាញ់រយៈពេលវែង» ជាមួយអ៊ីស្រាអែល និងសុខចិត្តទទួលស្គាល់ព្រំដែនប៉ាឡេស្ទីន ដែលគូសវាសបន្ទាប់ពីសង្រ្គាមអារ៉ាប់-អ៊ីស្រាអែលឆ្នាំ១៩៦៧។

ក្នុងទសវត្សរ៍ឆ្នាំ១៩៩០ គាត់បានទៅរស់នៅសហរដ្ឋអាមេរិក ប៉ុន្តែនៅទីនោះត្រូវបានចាប់ខ្លួនដោយចោទប្រកាន់ពីបទរៃអង្គាសប្រាក់ ឲ្យបក្សពួកក្រុមហាម៉ាស ហើយបន្ទាប់មក គាត់បានរស់នៅនិរទេសខ្លួន រួមទាំងក្នុងប្រទេសហ្ស៊កដានី អេហ្ស៊ីប និងកាតាផងដែរ។

3. Zaher Jabarin

ហិរញ្ញិកចាស់វស្សារបស់ហាម៉ាសម្នាក់នេះ គឺជាជំនិតលោក Haniyeh ហើយជួនកាល គេហៅគាត់ថាដៃស្តាំរបស់លោក Haniyeh ទៀតផង។

បន្ទាប់ពីជាប់ឃុំក្នុងពន្ធនាគារអ៊ីស្រាអែល គាត់ត្រូវបានដោះលែងនៅឆ្នាំ២០១១ ក្នុងកិច្ចព្រមព្រៀងដោះដូរអ្នកទោសគ្នាជាមួយទាហានអ៊ីស្រាអែល Gilad Shalit។ លោក Jabarin ក៏មានទំនាក់ទំនងជិតស្និទ្ធិជាមួយប្រទេសតួកគីផងដែរ។

4. Khaled Meshaal

គាត់ជាអ្នកកាន់តំណែងមុនលោក Haniyeh និងបានរស់នៅនិរទេសខ្លួនក្នុងប្រទេស ហ្ស៊កដានី កាតា ស៊ីរី និងប្រទេសផ្សេងៗទៀត តាំងពីឆ្នាំ១៩៦៧មកម្ល៉េះ។

គាត់​ត្រូវ​​គេ​ជំរុញ​ឲ្យឡើងកាន់តំណែងជាប្រមុខដឹកនាំក្រុមហាម៉ាស បន្ទាប់​ពី​អ៊ីស្រាអែល​ ​សម្លាប់​ស្ថាបនិក​របស់ចលនានេះ គឺ​លោក Ahmed Yassin និង​អ្នក​ស្នង​តំណែង Abdelaziz al-Rantisi។

នៅឆ្នាំ១៩៩៧ លោក Meshaal រួចជីវិតពីការប៉ុនប៉ងធ្វើឃាតដោយការបំពុលនៅទីក្រុង Amman នៃប្រទេសហ្ស៊កដានី ដោយចារកម្មអ៊ីស្រាអែល Mossad។

5. Yahya al-Sinwar

លោក Al-Sinwar ដែលត្រូវបានបោះឆ្នោតក្នុងខែកុម្ភៈឆ្នាំ២០១៧ ដើម្បីដឹកនាំក្រុមហាម៉ាសនៅតំបន់ហ្គាហ្សា គឺជាជនអភិរក្សជ្រុលនិយម និងជាមេក្លោងក្នុងការវាយប្រហារថ្ងៃទី៧ខែតុលា។

បុរសវ័យ៦១ឆ្នាំរូបនេះ ជាប់ពន្ធនាគារអ៊ីស្រាអែលអស់រយៈពេល២៣ឆ្នាំ មុនពេលត្រូវបានដោះលែងនៅឆ្នាំ២០១១ ក្នុងប្រតិបត្តិការដោះដូរអ្នកទោស។

កើតនៅ Khan Younis, គាត់បានចូលរួមជាមួយក្រុម ហាម៉ាស ពេលដែលចលនានេះបង្កើតឡើងក្នុងឆ្នាំ ១៩៨៧ រួចមក គាត់ក៏បន្តបង្កើតភ្នាក់ងារសន្តិសុខផ្ទៃក្នុងរបស់ក្រុមនេះ ឈ្មោះថា Majd៕

អត្ថបទ៖ សុខ សុវណ្ណ

ចុចអាន៖ អាមេរិក​ប្រកាស​ថា ការ​ស្លាប់​មេ​ក្រុម​ហាម៉ាស​មិន​ជាប់​ពាក់ព័ន្ធ​នឹង​ខ្លួន​ទេ