ព័ត៌មានអន្ដរជាតិ

ត្រឹម១ខែ ជប៉ុន មានអ្នកស្លាប់ជាង១២០នាក់ដោយសារជំងឺដាច់សរសៃឈាមខួរក្បាលព្រោះក្តៅខ្លាំង

បានផុស

២ years មុន

នៅ

ថ្ងៃពុធ ៧ សីហា ២០២៤

ដោយ

មនុស្សជាង១២០នាក់បានស្លាប់ដោយសារជំងឺដាច់សរសៃឈាមខួរក្បាលនៅតំបន់ទីប្រជុំជនក្នុងទីក្រុងតូក្យូត្រឹមតែរយៈពេលតែមួយខែកក្កដា ខណៈពេលដែលសីតុណ្ហភាពជាមធ្យមរបស់ប្រទេសនេះបានឈានដល់កម្រិតខ្ពស់បំបែកកំណត់ត្រា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៧ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងសុខាភិបាលជប៉ុនក្នុងចំណោមមនុស្ស១២៣នាក់ដែលបានស្លាប់គឺភាគច្រើនជាមនុស្សចាស់ទាំងអស់ ក្នុងនោះមនុស្សពីរនាក់ត្រូវបានរកឃើញថា បានស្លាប់នៅក្នុងផ្ទះ ហើយភាគច្រើនមិនបានប្រើម៉ាស៊ីនត្រជាក់ទេ បើទោះបីជាពួកគេបានដំឡើងម៉ាស៊ីនត្រជាក់ក៏ដោយ។ ចំណែកមនុស្សជាង ៣៧ ០០០ នាក់បានស្វែងរកសេវាព្យាបាលនៅមន្ទីរពេទ្យដោយសារជំងឺនេះនៅទូទាំងប្រទេសជប៉ុនចាប់ពីថ្ងៃទី១ខែកក្កដាដល់ថ្ងៃទី២៨ខែកក្កដា។

សីតុណ្ហភាពជាមធ្យមក្នុងខែកក្កដាគឺ ២,១៦អង្សាសេ ខ្ពស់ជាងមធ្យមភាគក្នុងរយៈពេល៣០ឆ្នាំកន្លងមក ដែលធ្វើឲ្យខែកក្កដាឆ្នាំនេះជាខែក្តៅបំផុតចាប់តាំងពីទីភ្នាក់ងារឧតុនិយមជប៉ុនបានចាប់ផ្តើមរក្សាកំណត់ត្រាតាំងពីឆ្នាំ១៨៩៨។ ជាមួយគ្នានេះ ក្រសួងសុខាភិបាលជប៉ុន បានឲ្យដឹងថា នេះគឺជាចំនួនអ្នកស្លាប់ដោយសារជំងឺដាច់សរសៃឈាមខួរក្បាលច្រើនជាងគេនៅក្នុងសង្កាត់ទាំង២៣ របស់ទីក្រុងតូក្យូក្នុងខែកក្កដា ចាប់តាំងពីមានការស្លាប់ចំនួន១២៧នាក់ត្រូវបានកត់ត្រាក្នុងអំឡុងពេលមានរលកកម្ដៅខ្លាំងឆ្នាំ២០១៨ ។

អាជ្ញាធរសុខាភិបាលជប៉ុន និងអ្នកព្យាករណ៍អាកាសធាតុបានណែនាំម្តងហើយម្តងទៀតឱ្យប្រជាជនស្នាក់នៅក្នុងផ្ទះ ទទួលទានវត្ថុរាវឱ្យបានច្រើន ដើម្បីជៀសវាងការខ្វះជាតិទឹក និងប្រើប្រាស់ម៉ាស៊ីនត្រជាក់ ខណៈមនុស្សចាស់នៅជប៉ុនតែងតែគិតថាម៉ាស៊ីនត្រជាក់មិនល្អសម្រាប់សុខភាព ហើយតែងតែជៀសវាងការប្រើប្រាស់វាដែលធ្វើឱ្យមានហានិភ័យនៃជំងឺដាច់សរសៃឈាមខួរក្បាលកាន់តែច្រើនឡើង។

កាលពីថ្ងៃអង្គារ ក៏មានការព្រមានអំពីជំងឺដាច់សរសៃឈាមខួរក្បាលបានកើតឡើងនៅក្នុងភាគច្រើននៃទីក្រុងតូក្យូ និងភាគខាងលិចនៃប្រទេសជប៉ុន ដោយសីតុណ្ហភាពបានកើនឡើងដល់ប្រហែល៣៤អង្សាសេនៅកណ្តាលទីក្រុងតូក្យូ។យ៉ាងណាទីភ្នាក់ងារឧតុនិយមបានព្យាករណ៍កំដៅបន្ថែមទៀតនៅក្នុងខែសីហា ជាមួយនឹងសីតុណ្ហភាពនឹងបន្តខ្ពស់ដល់៣៥អង្សាសេឬខ្ពស់ជាងនេះ។

អាកាសធាតុក្តៅមិនត្រឹមតែកើតមាននៅប្រទេសជប៉ុននោះទេ សូម្បីនៅប្រទេសកូរ៉េខាងត្បូងក៏មានការរាយការណ៍ពីករណីស្លាប់ដោយសារដាច់សរសៃឈាមក្នុងខួរក្បាលបណ្តាលមកពីកម្ដៅខ្លាំង ដោយមនុស្សចំនួន១១នាក់ស្លាប់ ខណៈរលកកម្ដៅដ៏ខ្លាំងមួយបាននឹងកំពុងមានឥទ្ធិពលប្រទេសនេះ ចាប់តាំងពីសប្តាហ៍មុនជាមួយនឹងសីតុណ្ហភាពកើនឡើងលើសពី៣៥អង្សាសេនៅក្នុងតំបន់ជាច្រើននៃប្រទេស ហើយថែមទាំងកើនឡើងដល់ជិត៤០អង្សាសេនៅទីក្រុង Yangsan ភាគអាគ្នេយ៍នៃប្រទេសនេះ៕