Los Angeles ជួបគ្រោះរញ្ជួយដី បង្កការភ្ញាក់ផ្អើល

BBC ចុះផ្សាយថា នៅថ្ងៃអង្គារទី១៣ខែសីហាឆ្នាំ២០២៤ គ្រោះរញ្ជួយដីកម្រិត៤.៤រ៉ិចទ័រ បានវាយប្រហារទីក្រុង Los Angeles នៃរដ្ឋ California ដោយធ្វើឲ្យរង្គើដល់ផ្ទះសម្បែង និងបង្កការភ្ញាក់ផ្អើលដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ ការរញ្ជួយដីនេះត្រូវគេប៉ាន់ប្រមាណថាមានកម្រិត ៤.៧រ៉ិចទ័រ ប៉ុន្តែក្រោយមកក៏ត្រូវបន្ទាបមកនៅត្រឹម ៤.៤ រ៉ិចទ័រវិញ។

យោងតាមទីភ្នាក់ងារភូមិសាស្រ្តអាមេរិក ហៅកាត់ USGS, ចំណុចកណ្តាលនៃការរញ្ជួយនេះគឺជិតសង្កាត់ Highland Park ដែលស្ថិតនៅមិនឆ្ងាយប៉ុន្មានពីសញ្ញា Hollywood ដ៏ល្បីល្បាញ ហើយទីក្រុង Pasadena និង Glendale នៅក្បែរនោះ ក៏ដូចជាផ្លូវទាំងអស់ឆ្ពោះទៅកាន់តំបន់ឆ្នេរដូចជា Manhattan Beach និង El Segundo ក៏ញ័រផងដែរ។

ទោះបីជាយ៉ាងណាក៏ដោយ USGS និយាយថា មិនមានការព្រមានពីរលកយក្សស៊ូណាមិទេ ហើយក្រុមមន្ត្រីក៏មិនទាន់ចេញសេចក្តីរាយការណ៍អំពីការខូចខាតណាមួយដែរ។

សូមបញ្ជាក់ថា នេះមិនមែនលើកដំបូងឡើយដែល Los Angeles ជួបគ្រោះរញ្ជួយដី ពោលគឺប៉ុន្មានសប្តាហ៍ចុងក្រោយ តំបន់នេះក៏ជួបប្រទះការរញ្ជួយដីកម្រិត៤និង៥រ៉ិចទ័រប៉ុន្មានលើកដែរ ដោយក្នុងនោះរួមមាននៅទីក្រុង Grapevine និង Bakersfield កាលពីសប្តាហ៍មុន៕

អត្ថបទ៖ សុខ សុវណ្ណ

ចុចអាន៖ ជប៉ុន ជួបគ្រោះរញ្ជួយដីកម្រិតធ្ងន់ ទាញសញ្ញាព្រមានរលកយក្សស៊ូណាមិ