បៃដិន ចេញបញ្ជាដាច់ណាត់ ឲ្យពង្រឹងសន្តិសុខ ការពារសុវត្ថិភាពជូន ត្រាំ ឲ្យបាន

ក្រោយពេលលោក ដូណាល់ ត្រាំ ត្រូវគេប៉ងធ្វើឃាតជាលើកទីពីរ ស្រាប់តែប្រធានាធិបតីសហរដ្ឋអាមេរិក ចូ បៃដិន បានចេញបញ្ជាដាច់ណាត់ឲ្យសេវាសម្ងាត់ ត្រូវចាត់វិធានការបន្ថែមទៀត ​ដើម្បីការពារសុវត្ថិភាពរបស់បេក្ខជនឈរឈ្មោះបោះឆ្នោតខាងគណបក្សសាធារណរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Sky News នៅថ្ងៃចន្ទទី១៦ខែកញ្ញាឆ្នាំ២០២៤, ប្រធានាធិបតីអាមេរិកនិយាយថា លោកធូរចិត្តដែលលោក ត្រាំ មិនកើតអី ពេលត្រូវខ្មាន់កាំភ្លើងប៉ងយកជីវិតទាំងកំពុងលេងវាយកូនហ្គោលនៅទីលានក្នុងទីក្រុង West Palm Beach នៃរដ្ឋ ហ្វ្លរីដា។

ចំណែក តាមការបញ្ជាក់ពីរដ្ឋអាជ្ញាក្រុង West Palm Beach, ខ្មាន់កាំភ្លើងឈ្មោះ Ryan Wesley Routh ​ប្រដាប់ដោយអាវុធ AK-47 បានសំងំក្នុងគុម្ពោតព្រៃដេកចាំបាច់លោកត្រាំពីខាងក្រៅរបងទីលានវាយកូនហ្គោល តែត្រូវសេវាសម្ងាត់មើលឃើញទាន់ រួចក៏មានការផ្ទុះអាវុធ ក្រោយមកក៏ចាប់ខ្លួនជនសង្ស័យបាន។

ទោះបីជាយ៉ាងណាក៏ដោយ លោក ត្រាំ មិនមានត្រូវរបួសទេ ហើយត្រូវនាំទៅកាន់កន្លែងសុវត្ថិភាព។

ភ្លាមៗក្រោយកើតហេតុ លោក បៃដិន បានបញ្ជាឲ្យសេវាសម្ងាត់ ត្រូវប្រើគ្រប់ធនធានដែលមាននិងមធ្យោបាយទាំងអស់ ដើម្បីធានាសន្តិសុខជូនលោក ត្រាំ កុំឲ្យមានការគំរាមកំហែងបែបនេះទៀត។ មិនត្រឹមប៉ុណ្ណឹង លោកបៃដិន ថែមទាំងចេញបញ្ជាឲ្យ FBI បើកការស៊ើបអង្កេតបន្ទាន់ លើករណីនេះផងដែរ។

សូមបញ្ជាក់ជាថ្មី ឧបទ្ទវហេតុនេះកើតឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីលោក ត្រាំ បានរួចរស់ជីវិតពីការប៉ុនប៉ងធ្វើឃាត អំឡុងពេលជួបជុំអ្នកគាំទ្រនៅរដ្ឋ Pennsylvania។

ពេលនោះ លោកត្រាំ ត្រូវរបួសត្រចៀក ដោយគ្រាប់កាំភ្លើងរបស់ Thomas Matthew Crooks ប៉ុន្តែជនសង្ស័យត្រូវអ្នកបាញ់ស៊ីប បាញ់សម្លាប់នៅនឹងកន្លែង៕

អត្ថបទ៖ សុខ សុវណ្ណ

ចុចអាន៖ លោក ត្រាំ ត្រូវគេប៉ងធ្វើឃាតម្តងទៀត