នាយករដ្ឋមន្ត្រីថៃ​បញ្ជា​ឱ្យ​​រដ្ឋមន្ត្រី​២រូប​ចុះ​ទៅ​ពិនិត្យ​កន្លែក​កើត​ហេតុភ្លើងឆេះ​ឡានក្រុង​

នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រា (Paetongtarn Shinawatra) បញ្ជាឱ្យរដ្ឋមន្ត្រីទៅពិនិត្យទីតាំងភ្លើងឆេះរថយន្ត​ក្រុង​ដឹកសិស្ស​សាលា​​និង​គ្រូបង្រៀន​ជាង​​៤០​ ដែលបានសម្លាប់មនុស្សយ៉ាងហោចណាស់២៣នាក់ ដោយ​បាន​កា្លយ​ជា​ហេតុការណ៍ដ៏​រន្ធ​ត់​នៅថ្ងៃទី​១ខែ​តុលា។​

យោង​តាមការ​ផ្សាយ​របស់​សារព័ត៌មាន​ The Nation នៅ​ថ្ងៃទី​២ខែ​តុលា​នេះ នាយករដ្ឋមន្ត្រី​ថៃ​លោកស្រី​ ផែថងថាន ស៊ីណាវ៉ាត្រា បាននិយាយថា លោកស្រីបានណែនាំដល់​រដ្ឋមន្ត្រីពាក់ព័ន្ធ ឱ្យចុះទៅពិនិត្យទីតាំងនៃអគ្គិភ័យឆេះ​រថយន្តក្រុងដឹក​សិស្ស​សាលាដ៏សោកនាដកម្ម ដែលបានបណ្តាលឲ្យមនុស្សយ៉ាងហោចណាស់២៣នាក់ស្លាប់។

រដ្ឋមន្ត្រីទាំងនោះរួមមានឧបនាយករដ្ឋមន្ត្រីពីររូប គឺរដ្ឋមន្ត្រីក្រសួងមហាផ្ទៃ Anutin Charnvirakul និងរដ្ឋមន្ត្រីក្រសួងដឹកជញ្ជូន Suriya Juangroongruangkit ក៏ដូចជាអនុរដ្ឋមន្ត្រីក្រសួងមហាផ្ទៃ Sabida Thaiset ដែលមកពី Uthai Thani ដែលជាខេត្តដូចគ្នាជាមួយ​សិស្សនៅលើឡានក្រុង។

ថ្លែងអំពីឧប្បត្តិហេតុនៅលើបណ្តាញ​សង្គម Instagram ផ្ទាល់ខ្លួនរបស់នាង អ្នកស្រី ផែថងថាន បាននិយាយថា៖«ខ្ញុំដឹងច្បាស់​អំពីឧប្បត្តិហេតុភ្លើងឆេះរថយន្តក្រុងពីខេត្ត Uthai Thani ដែលដឹកសិស្សទៅបំពេញទស្សនកិច្ចទៅកាន់ទីក្រុងបាងកក ហើយបានជួបឧបទ្ទវហេតុនៅលើផ្លូវ Vibhavadi Rangsit បណ្តាលឲ្យមានអ្នកស្លាប់និងរបួស»។

សារ​របស់​​នាយក​រដ្ឋមន្ត្រីថៃ​បន្តថា៖​«ក្នុងនាមជាម្តាយ ខ្ញុំសូមចូលរួមរំលែក​ទុក្ខ​យ៉ាងក្រៀមក្រំបំផុតចំពោះគ្រួសារអ្នករងរបួស និងបានស្លាប់»។

នៅពេលអ្នកសារព័ត៌មានព្យាយាមសួរនាយករដ្ឋមន្ត្រីអំពីគំនិតរបស់​លោកស្រី​ចំពោះស្ថានការណ៍នោះ នាយករដ្ឋមន្ត្រី​មិនបានឆ្លើយតប ហើយដើរចេញពីប្រព័ន្ធផ្សព្វផ្សាយយ៉ាងលឿន​ដោយមិននិយាយអ្វីទាំងអស់។

គេ​សង្កេត​ឃើញ​នាង​ជូត​ទឹកភ្នែក​ដោយ​ក្រដាស​ជូត​មុខ មុន​នឹង​ចូល​ទៅ​ក្នុង​វិមាន​រដ្ឋាភិបាល​យ៉ាង​លឿន។

សេចក្តីរាយការណ៍បញ្ជាក់ថា នៅពេលឮហេតុការណ៍នេះ អ្នកស្រី ​ផែថងថាន ស្រក់ទឹកភ្នែក ខណៈនាងមានអារម្មណ៍សោកស្ដាយយ៉ាងខ្លាំង ដែលកុមារក្នុងវ័យនោះ មិនអាចជួយខ្លួនឯងបាន ក្នុងសោកនាដកម្មបែបនេះ។ ឡានក្រុងដែល​ដឹកកុមារ៣៨​នាក់ចាប់ពីអាយុមត្តេយ្យដល់វ័យ​ជំទង់​និងគ្រូបង្រៀន៦នាក់​បាន​ឆេះ​នៅតាមផ្លូវ​ក្នុង​ដំណើរ​ទស្សនកិច្ច​សិក្សា​ទៅ​ទីក្រុង​បាងកក​កាល​រសៀល​ថ្ងៃទី​១​តុលា​៕