ព័ត៌មានអន្ដរជាតិ

ព្យុះ ត្រាមី អាចត្រឡប់ទៅហ្វីលីពីនម្ដងទៀតនៅសប្ដាហ៍ក្រោយ ខណៈអ្នកស្លាប់កើនដល់ ៤៦នាក់

បានផុស

៥ ខែ មុន

នៅ

ថ្ងៃសុក្រ ២៥ តុលា ២០២៤

ដោយ

Chheang

តួលេខអ្នកស្លាប់ព្រោះព្យុះកំណាច ត្រាមី (Trami) នៅក្នុងប្រទេសហ្វីលីពីន បានកើនឡើងដល់ ៤៦នាក់ហើយ ខណៈមានមនុស្សប្រមាណ ២០នាក់ផ្សេងទៀតកំពុងបាត់ខ្លួន។ មន្ត្រីហ្វីលីពីន បានព្រមានថា ព្យុះត្រូពិចនេះ នឹងអាចវិលត្រឡប់ទៅវាយប្រហារហ្វីលីពីនម្ដងទៀតនៅសប្ដាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់រដ្ឋាភិបាលហ្វីលីពីន បានបង្ហាញថា ពលរដ្ឋជិត ២៤ម៉ឺននាក់កំពុងជ្រកកោននៅក្នុងជុំរុំភៀសខ្លួន ហើយមានអ្នកដំណើរ ៧ ៥១០នាក់ត្រូវបានជាប់គាំងខ្លួននៅកំពង់ផែ ខណៈជើងហោះហើរចំនួន ៣៦ ត្រូវបានលុបចោលនៅថ្ងៃសុក្រនេះ។

ភ្នាក់ងារការពារជនស៊ីវិល បានប្រាប់ថា ករណីស្លាប់ និងរបួស ភាគច្រើនកើតឡើងដោយសារតែបំណាក់ដី ទឹកជំនន់ និងឧបទ្ទវហេតុផ្សេងៗ ហើយភាគច្រើនស្ថិតនៅតំបន់ Bicol ដែលមានការជន់លិចខ្លាំងជាងគេ។

លោក Ferdinand Marcos Jr ប្រធានាធិបតីហ្វីលីពីន បានប្រកាសនៅលើបណ្ដាញសង្គម X ថា៖ «ខ្ញុំសូមធ្វើការអំពាវនាវនេះទៅកាន់ប្រជាជនរបស់យើងថា ការជួយសង្គ្រោះកំពុងដំណើរការ។ វានឹងទៅដល់តាមផ្លូវគោក ផ្លូវអាកាស និងសូម្បីតែផ្លូវសមុទ្រ»។

ព្យុះ ត្រាមី បានវាយប្រហារកោះ Luzon ដែលជាកោះធំជាងគេ និងមានមនុស្សរស់នៅច្រើនជាងគេរបស់ហ្វីលីពីន កាលពីថ្ងៃព្រហស្បតិ៍ ជាមួយល្បឿនខ្យល់ជិត ១០០គីឡូម៉ែត្រក្នុង១ម៉ោង ខណៈបរិមាណទឹកភ្លៀងក្នុងរយៈពេល២ថ្ងៃមកនេះ ស្មើនឹងចំនួនទឹកភ្លៀងដែលធ្លាក់ដល់ទៅ២ខែឯណោះ ជាមួយកម្ពស់ទឹក ៣៩១,៣មិល្លិម៉ែត្រ។

ព្យុះនេះ កំពុងធ្វើដំណើរទៅកាន់សមុទ្រចិនខាងត្បូង ហើយសំដៅទៅរកប្រទេសវៀតណាម។ យ៉ាងណា ភ្នាក់ងារឧតុនិយមហ្វីលីពីន បានព្រមានថា ព្យុះ ត្រាមី អាចបក់ត្រឡប់មកវិញ ព្រោះតែសម្ពាធខ្យល់ខ្ពស់ដែលមាននៅសមុទ្រចិនខាងត្បូង៕

ដោយ៖ ឈាង

ចុចអាន៖ វៀតណាម ព្រមានឲ្យពលរដ្ឋត្រៀមជម្លៀស ខណៈព្យុះ ត្រាមី បង្កើនឥទ្ធិពលរឹតខ្លាំង