ប្រតិកម្ម​ពិភពលោកដូច​ម្ដេច​ខ្លះ ជុំវិញ​បទ​ឈប់បាញ់​រវាង​អ៊ីស្រាអែល និង​ហេសបូឡា?

នៅ​ទី​បំផុត គណរដ្ឋមន្ត្រីអ៊ីស្រាអែល បានយល់ព្រមលើបទឈប់បាញ់មួយជាមួយក្រុមហេសបូឡាលីបង់ ដែលបើយោងតាមប្រធានាធិបតីអាមេរិក លោក ចូ បៃដិន, បទឈប់បាញ់នេះបានចូលជាធរមាននៅម៉ោង៤ព្រឹកថ្ងៃពុធទី២៧ខែវិច្ឆិកាឆ្នាំ២០២៤។

បទ​ឈប់​បាញ់​ ទទួល​បាន​ការ​សារទរ​ជា​ច្រើន​ពី​ពិភពលោក សម្រាប់​​ការ​បញ្ចប់​អំពើ​ហិង្សា​ដោយ​ប្រដាប់​អាវុធ​រយៈ​​ពេល​ជាង​១​ឆ្នាំ រវាង​ក្រុម​សកម្ម​ប្រយុទ្ធ​ហេសបូឡា​នៅ​លីបង់ និង​​​ប្រទេស​អ៊ីស្រាអែល ដែល​បាន​ផ្ទុះ​ឡើង​កាល​​​ពី​ថ្ងៃ​ទី​៨​ខែ​តុលា​ឆ្នាំ​២០២៣។

សហភាព​អឺរ៉ុប

លោក Josep Borrell ប្រធាន​គោល​នយោបាយ​ការបរទេស​សហភាព​អឺរ៉ុប បានស្វាគមន៍បទឈប់បាញ់ដែលទើបតែបានព្រមព្រៀងគ្នាក្នុងប្រទេសលីបង់ កាលពីថ្ងៃអង្គារ ដោយពណ៌នាថា វាជា «ការធូរស្រាលក្នុងស្ថានភាពបំផ្លិចបំផ្លាញនៅមជ្ឈិមបូព៌ា»។

នៅក្នុងសេចក្តីថ្លែងការណ៍​នៅ​លើ​ប្រព័ន្ធផ្សព្វផ្សាយសង្គម X លោក Borrell បានសរសើរប្រទេសបារាំង និងសហរដ្ឋអាមេរិក ចំពោះកិច្ចខិតខំប្រឹងប្រែងសម្របសម្រួលរបស់ពួកគេ ក្នុងការធានាកិច្ចព្រមព្រៀងនេះ។

លោក Borrell បានគូសបញ្ជាក់ពីតម្រូវការសំខាន់សម្រាប់ការអនុវត្តពេញលេញនៃសេចក្ដី​សម្រេច​ក្រុមប្រឹក្សាសន្តិសុខអង្គការសហប្រជាជាតិ​លេខ​១៧០១ (UNSCR 1701) ដែលបង្ហាញពីវិធានការសម្រាប់រក្សាសន្តិភាព និងសន្តិសុខនៅតាមព្រំដែនលីបង់-អ៊ីស្រាអែល។

សហរដ្ឋ​អាមេរិក និង​បារាំង

ប្រធានាធិបតីអាមេរិក លោក ចូ បៃដិន និង​ប្រធានាធិបតី​បារាំង​ លោក Emmanuel Macron បានចេញសេចក្តីថ្លែងការណ៍រួមមួយ​ថា៖ «ថ្ងៃនេះបន្ទាប់ពីរយៈពេលជាច្រើនសប្តាហ៍នៃការទូតដោយមិនចេះនឿយហត់ អ៊ីស្រាអែល និងលីបង់បានទទួលយកការបញ្ឈប់អរិភាពរវាងអ៊ីស្រាអែល និងលីបង់។ ការប្រកាសនេះ នឹងបង្កើតលក្ខខណ្ឌ ដើម្បីស្តារភាពស្ងប់ស្ងាត់យូរអង្វែង និងអនុញ្ញាត​ឲ្យ​អ្នករស់នៅក្នុងប្រទេសទាំងពីរត្រឡប់ទៅផ្ទះរបស់ពួកគេវិញដោយសុវត្ថិភាពនៅសងខាងនៃ​តំបន់​បន្ទាត់​ព្រំដែន Blue Line»។

អង់គ្លេស

នាយករដ្ឋមន្ត្រីអង់គ្លេស លោក Keir Starmer បានស្វាគមន៍ចំពោះការប្រកាសបទឈប់បាញ់រវាងអ៊ីស្រាអែល និងក្រុម​ហេសបូឡា​នៅ​​លីបង់ ដោយអំពាវនាវ​ឲ្យ​កិច្ចព្រមព្រៀងនេះត្រូវបានប្រែក្លាយទៅជា «ដំណោះស្រាយ​នយោបាយយូរអង្វែង»។

លោកបានបន្ថែមថា៖ «យើងត្រូវតែមើលឃើញការវិវឌ្ឍ​ភ្លាមៗឆ្ពោះទៅរកកិច្ចព្រមព្រៀងឈប់បាញ់នៅហ្គាហ្សា ការដោះលែងចំណាប់ខ្មាំងទាំងអស់ និងការដកចេញនូវការរឹតបន្តឹងលើជំនួយមនុស្សធម៌ដែល​ចាំបាច់​​ខ្លាំង»។

អៀរឡង់

រដ្ឋមន្ត្រីការបរទេសអៀរឡង់ លោក Michael Martin បាននិយាយនៅក្នុងសេចក្តីថ្លែងការណ៍មួយថា៖ «ខ្ញុំស្វាគមន៍ការប្រកាសនៃកិច្ចព្រមព្រៀងឈប់បាញ់រវាងអ៊ីស្រាអែល និងក្រុមហេសបូឡានៅលីបង់។ ភាគីទាំងពីរ ត្រូវតែប្រើប្រាស់បទឈប់បាញ់ ដើម្បីចូលរួមប្រកបដោយអត្ថន័យ សម្រេចបាននូវសន្តិភាពយូរអង្វែង»។

បែលហ្ស៊ិក

រដ្ឋមន្ត្រីការបរទេសបែលហ្ស៊ិក លោកស្រី Hadja Lahbib បាននិយាយ​នៅ​លើ​បណ្ដាញ​សង្គម X ថា៖ «កិច្ចព្រមព្រៀងបទឈប់បាញ់នៅលីបង់ គឺជាជំហានដ៏សំខាន់មួយឆ្ពោះទៅរកការបញ្ឈប់ការកើនឡើង​កម្ដៅ​នៅមជ្ឈិមបូព៌ា។ យើងអំពាវនាវ​ឲ្យ​មានបទឈប់បាញ់នៅក្នុងតំបន់ទាំងមូល រួមទាំងតំបន់ហ្គាហ្សា។ មានតែការចរចាឡើងវិញ ដើម្បី​ឲ្យ​ដំណោះស្រាយ​រដ្ឋ​ពីរ​អាច​នាំ​មក​នូវ​សន្តិភាព។ ជន​ស៊ីវិល​ត្រូវ​តែ​ទទួល​បាន​ការ​​ការពារ»។

ស្លូវេនី

រដ្ឋមន្ត្រីការបរទេសស្លូវេនី លោកស្រី Tanja Fajon បាននិយាយថា៖ «ខ្ញុំស្វាគមន៍ការប្រកាសបទឈប់បាញ់ដ៏សំខាន់។ ខ្ញុំក៏សង្ឃឹមផងដែរចំពោះបទឈប់បាញ់នៅហ្គាហ្សា ជាមួយនឹងការដោះលែងចំណាប់ខ្មាំងទាំងអស់ និងបញ្ចប់ការរងទុក្ខវេទនាដ៏ធំធេងរបស់ប្រជាជន»។

អាល្លឺម៉ង់

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បាន​លើក​ឡើង​នៅក្នុងសេចក្តីថ្លែងការណ៍មួយថា បទឈប់បាញ់រវាងអ៊ីស្រាអែល និងក្រុម​ហេសបូឡា «គឺជារស្មីនៃក្តីសង្ឃឹមសម្រាប់តំបន់ទាំងមូល»។

លោកស្រី​បន្ថែម​ថា៖ «បទឈប់បាញ់រវាងអ៊ីស្រាអែល និងក្រុមហេសបូឡា បង្ហាញពីអ្វីដែលអាចធ្វើទៅបានជាមួយនឹងមធ្យោបាយការទូត។ យើងក៏ត្រូវការជាបន្ទាន់នូវបទឈប់បាញ់នៅតំបន់ហ្គាហ្សាឥឡូវនេះ ដើម្បីឲ្យជនជាតិអាល្លឺម៉ង់ និងចំណាប់ខ្មាំងផ្សេងទៀតត្រូវបានដោះលែង ហើយការឈឺចាប់ និងការស្រេកឃ្លានរបស់ស្ត្រី កុមារ និងបុរស​រាប់​សែន​នាក់​ ឈានដល់ទីបញ្ចប់​នៅ​ទី​បំផុត»។

អេស្ប៉ាញ

រដ្ឋមន្ត្រីការបរទេសអេស្ប៉ាញ លោក Jose Manuel Albares បាន​បង្ហោះ​នៅ​លើ​ X ថា ការប្រកាសបទឈប់បាញ់នៅក្នុងប្រទេសលីបង់ គឺជាដំណឹងល្អសម្រាប់សន្តិភាព និងសន្តិសុខ។

លោក​បាន​បន្ថែម​ថា​៖ «​ឥឡូវ​នេះ យើង​ត្រូវ​តែ​ឈាន​ទៅ​មុខ​ជាមួយ​នឹង​ការ​អនុវត្ត​សេចក្តី​សម្រេច​លេខ១៧០១»។

ហូឡង់

រដ្ឋមន្ត្រីការបរទេសហូឡង់ លោក Caspar Veldkamp បាននិយាយថា៖ «នេះគឺជាជំហានដ៏សំខាន់មួយឆ្ពោះទៅរកការបញ្ចប់អរិភាព និងការបន្ថយការកើនឡើងក្នុងតំបន់»។

គណៈកម្មការ​អឺរ៉ុប

ប្រធានគណៈកម្មការអឺរ៉ុប លោកស្រី Ursula von der Leyen បានថ្លែង​ថា៖ «បទឈប់បាញ់ដែលបានប្រកាសរវាងអ៊ីស្រាអែល និងក្រុម​ហេសបូឡា គឺជាព័ត៌មានដែលលើកទឹកចិត្តយ៉ាងខ្លាំង។ លីបង់នឹងមានឱកាសដើម្បីបង្កើនសន្តិសុខ និងស្ថិរភាពផ្ទៃក្នុង ដោយសារឥទ្ធិពលធ្លាក់ចុះរបស់​ហេសបូឡា»៕

ដោយ៖ ឈាង

ចុចអាន៖ ទីបំផុត អ៊ីស្រាអែល យល់ព្រមលើបទឈប់បាញ់ជាមួយ ក្រុមហេសបូឡា