ទីបំផុត អ៊ីស្រាអែល យល់ព្រមលើបទឈប់បាញ់ជាមួយ ក្រុមហេសបូឡា

ដោយមានការសម្របសម្រួលពីសំណាក់សហរដ្ឋអាមេរិកនិងបារាំង នៅទីបំផុត គណរដ្ឋមន្ត្រីអ៊ីស្រាអែល បានយល់ព្រមលើបទឈប់បាញ់មួយជាមួយក្រុមហេសបូឡាលីបង់ ដែលបើយោងតាមប្រធានាធិបតីអាមេរិកចូ បៃដិន, បទឈប់បាញ់នេះបានចូលជាធរមាននៅម៉ោង៤ព្រឹកថ្ងៃពុធទី២៧ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទឈប់បាញ់នេះមានចែងថា កងទ័ពអ៊ីស្រាអែល នឹងត្រូវដកចេញពីភាគខាងត្បូងប្រទេ​សលីបង់ ហើយក្រុមហេសបូឡា ក៏នឹងដកថយចេញពីភាគខាងជើងនៃទន្លេ Litani ដូចគ្នា។

ដំណើរការនេះ នឹងចំណាយពេល៦០ថ្ងៃ ហើយកងទ័ពលីបង់ នឹងត្រូវដាក់ពង្រាយទៅភាគខាងត្បូង ដើម្បីតាមដានបទឈប់បាញ់ខណៈក្រុមការងារអន្តរជាតិដឹកនាំដោយសហរដ្ឋអាមេរិក ដែលរួមមានទាំងកងរក្សាសន្តិភាពបារាំង ក៏នឹងត្រូវដាក់ពង្រាយដើម្បីត្រួតពិនិត្យការអនុវត្តបទឈប់បាញ់នេះផងដែរ។

លើសពីនេះ កងទ័ពលីបង់នឹងតម្រូវឲ្យពង្រីកតួនាទីរបស់ខ្លួននៅក្នុងប្រទេសលីបង់ ជាពិសេសនាភាគខាងត្បូង ដែលទីនោះនឹងក្លាយជាស្ថាប័នប្រដាប់អាវុធតែមួយគត់ ហើយគ្រប់គ្រងសកម្មភាពពាក់ព័ន្ធនឹងអាវុធនៅក្នុងប្រទេសនេះ។

មិនត្រឹមប៉ុណ្ណឹង ជនស៊ីវិលលីបង់និងអ៊ីស្រាអែល ក៏នឹងត្រូវអនុញ្ញាតឲ្យវិលត្រឡប់ទៅផ្ទះរបស់ពួកគេវិញជាបណ្តើរៗផងដែរ។

ទោះបីជាយ៉ាងណាក៏ដោយ អ្នកជំនាញមួយចំនួនបានលើកឡើងថា បទឈប់បាញ់នេះគ្រាន់តែជាកិច្ចព្រមព្រៀងបណ្តោះអាសន្នប៉ុណ្ណោះ ពោលគឺមិនដឹងថា ភាគីទាំងសងខាងអនុវត្តវាបានយូរប៉ុនណានោះទេ ដោយសារតែវាមិនមានការឯកភាពផ្នែកនយោបាយពីសំណាក់ប្រទេសអ៊ីរ៉ង់ ដែលគេដឹងថា ជាអ្នកនៅពីក្រោយខ្នងចាំជួយគាំទ្រចលនាសកម្មប្រយុទ្ធ។

គេនៅតែសង្ឃឹមថា កិច្ចព្រមព្រៀងនេះនឹងឈានឆ្ពោះទៅរកការបញ្ចប់អំពើហិង្សារយៈពេលជាងមួយឆ្នាំ ដែលផ្តើមឡើងនៅពេលក្រុមហេសបូឡា បើកការវាយប្រហារលើអ៊ីស្រាអែលកាលពីថ្ងៃទី៨ខែតុលាឆ្នាំ២០២៣ ដើម្បីបង្ហាញពីសាមគ្គីភាពជាមួយក្រុមហាម៉ាស នៅតំបន់ហ្គាហ្សា។

ចាប់តាំងពីខែតុលាឆ្នាំ២០២៣មក អ៊ីស្រាអែលបានសម្លាប់ប្រជាជនលីបង់ចំនួន ៣ ៧៦៨នាក់ និងបង្ខំឲ្យ១.២លាននាក់ទៀតត្រូវជម្លៀសខ្លួន ដោយសារតែសង្គ្រាមដ៏សាហាវ៕

អត្ថបទ៖ សុខ សុវណ្ណ

ចុចអាន៖ ហេសបូឡា រើសបានមេក្រុមថ្មី, ជាអ្នកទើបរត់គេចពីការធ្វើឃាតរបស់ អ៊ីស្រាអែល