កងទ័ពជើងទឹកថៃ គំរាមសងសឹកមីយ៉ាន់ម៉ា ចំពោះការបាញ់​ទូក​នេសាទនិងចាប់មនុស្ស

កាលពីថ្ងៃសៅរ៍មានសេចក្តីរាយការណ៍ថា កងទ័ពជើងទឹកមីយ៉ាន់ម៉ា បានបើកការបាញ់ប្រហារលើ​​ក្រុម​ទូក​នេសាទថៃ ដែលបណ្តាលឲ្យអ្នកនេសាទម្នាក់លង់ទឹកស្លាប់ ហើយឃាត់ខ្លួន​​អ្នក​នេសាទ ៣១នាក់ទៀត ខណៈក្រោយមក កងទ័ពជើងទឹកថៃបានប្រកាសត្រៀមរួចជាស្រេចអស់ហើយ ដើម្បីសងសឹកវិញ ជុំវិញហេតុការណ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការកងទ័ពជើងទឹកថៃ ឧត្តមនាវីឯក Jirapol Wongwit ព្រមានថា កងទ័ពជើងទឹកថៃនឹងសួរទៅភាគីមីយ៉ាន់ម៉ាអំពីឧបទ្ទវហេតុនេះ ដើម្បីរកឲ្យឃើញថាតើ ហេតុការណ៍កើតឡើងនៅឯណា និងថាតើការវាយប្រហារនោះ ជាប្រតិកម្មហួសហេតុពេកឬក៏យ៉ាងណា។ ប្រសិនបើកប៉ាល់ថៃចូលនេសាទក្នុងដែនទឹករបស់ខ្លួនសោះ តែបែរជាត្រូវគេវាយប្រហារនោះ កងទ័ពជើងទឹកថៃ អាចឆ្លើយតបវិញតាមរបៀបនោះដែរហើយ។

ស្របពេលជាមួយគ្នានោះ អ្នកនាំពាក្យក្រសួងការបរទេសថៃ លោក Nikorndej Balankura ក៏និយាយដែរថា ស្ថានទូតថៃប្រចាំប្រទេសមីយ៉ាន់ម៉ា បានស្នើដល់ក្រសួងការបរទេសមីយ៉ាន់ម៉ា រួចហើយ ឲ្យពន្យល់អំពីឧប្បត្តិហេតុនេះ។

ទោះបីជាយ៉ាងណាក៏ដោយ អំឡុងកិច្ចប្រជុំគណរដ្ឋមន្ត្រីកាលពីថ្ងៃអាទិត្យ នាយករដ្ឋមន្ត្រី Paetongtarn Shinawatra បានគូសបញ្ជាក់ថា លោកស្រីមិនចង់បានអំពើហិង្សាទេ ហើយកំពុងរង់ចាំមើលលទ្ធផលនៃការស៊ើបអង្កេតជាមុនសិន។

ក្នុងហេតុការណ៍កាលពីថ្ងៃសៅរ៍ មានសេចក្តីរាយការណ៍មិនច្បាស់ថា ទូក​នេសាទថៃចំនួន២​គ្រឿង​ក្នុងចំណោម១៥ ត្រូវបានបណ្តេញចេញ បន្ទាប់ពីពួកគេ​ធ្វើ​​ដំណើរ​ក្នុងចម្ងាយ​ចន្លោះ​ពី ៧.៤ ទៅ ១០.៦​​គីឡូម៉ែត្រ នៅក្នុងដែនទឹករបស់ប្រទេសមីយ៉ាន់ម៉ា។

អ្នកនេសាទ​៣​នាក់បានលោតចូលទឹកក្នុងអំឡុងពេលកើតហេតុ ដោយម្នាក់បានលង់ទឹកស្លាប់ ខណៈ២​នាក់ត្រូវបានជួយសង្គ្រោះដោយកងទ័ពជើងទឹកថៃ។

ក្រោយមក នាយកដ្ឋានជលផលក្នុងខេត្ត Ranong ភាគខាងត្បូងប្រទេសថៃ ដែលមានព្រំប្រទល់ដែនសមុទ្រជាមួយប្រទេសមីយ៉ាន់ម៉ា បានជំរុញឲ្យទូក​នេសាទថៃប្រុងប្រយ័ត្ននៅពេលធ្វើដំណើរជិតព្រំដែន៕

អត្ថបទ៖ សុខ សុវណ្ណ

ចុចអាន៖ កងទ័ព​ជើង​ទឹក​មីយ៉ាន់ម៉ា បាញ់​ទូក​នេសាទ​ថៃ បណ្ដាល​ឲ្យ​ស្លាប់​ម្នាក់ និង​ចាប់​ឃាត់​ខ្លួន​​៣១​នាក់