អាកាសចរណ៍ម៉ាឡេស៊ីផ្អាកយន្តហោះ Airbus ប្រភេទថ្មី ក្រោយមានបញ្ហាសុវត្ថិភាព

ក្រុមហ៊ុនអាកាសចរណ៍ម៉ាឡេស៊ីបានផ្អាកយន្តហោះ Airbus A330neo ប្រភេទថ្មីរបស់ខ្លួនត្រឹមតែប៉ុន្មានថ្ងៃបន្ទាប់ពីបានហោះហើរលើកដំបូង ដោយសារតែបញ្ហាបច្ចេកទេស ដែលជាការធ្លាក់ចុះប្រតិបត្តិការមួយផ្សេងទៀតសម្រាប់ក្រុមហ៊ុនអាកាសចរណ៍ជាតិ នេះបើយោងតាមប្រព័ន្ធផ្សព្វផ្សាយក្នុងស្រុកបានរាយការណ៍។

នាយកប្រតិបត្តិ ក្រុមហ៊ុនអាកាសចរណ៍ លោក Izham Ismail ដែលត្រូវបានដកស្រង់សម្តីដោយកាសែត New Straits Times បាន​និយាយថា៖​«មូលហេតុ​ចម្បងគឺមកពីរោងចក្រ ហើយវាកំពុងប៉ះពាល់ដល់កេរ្តិ៍ឈ្មោះ និងម៉ាកយីហោ​របស់ Malaysia Airlines»។

លោក Ismail បាននិយាយថាកំហុសបច្ចេកទេសជាមួយយន្តហោះថ្មីគឺ «មិនអាចទទួលយកបានទេ» និងថា «សម្រាប់ខ្ញុំវាជាការអាម៉ាស់ សុវត្ថិភាពគឺសំខាន់បំផុត ខ្ញុំនឹងមិនប្រថុយលើអ្វីទាំងអស់សម្រាប់សុវត្ថិភាព»។

កាសែតនេះ បាននិយាយថា ជើងហោះហើរដំបូងរបស់យន្តហោះពី Kuala Lumpur​នៃ​ប្រទេស​ម៉ាឡេស៊ី​ទៅកាន់​ទីក្រុង​ Melbourne របស់​ប្រទេស​អូស្រ្តាលី កាលពីថ្ងៃទី​១៩ខែធ្នូ ត្រូវបានរំខានដោយបញ្ហាបច្ចេកទេស។​

គួរបញ្ជាក់ថាក្រុមហ៊ុនអាកាសចរណ៍នេះបានទទួលរងការបរាជ័យជាច្រើននៅឆ្នាំនេះ ជាមួយនឹងការកាត់បន្ថយផ្លូវ​ហោះ​ហើរ ​និងបញ្ហាកម្លាំងពលកម្ម។ នៅឆ្នាំ២០២២ ខ្លួនបានយល់ព្រមទិញយន្តហោះ Airbus A330neo ចំនួន ២០ គ្រឿង​ដើម្បីជំនួសយន្តហោះប្រភេទ widebody របស់ខ្លួន ខណៈយន្តហោះ A330neo ដំណើរការដោយម៉ាស៊ីន Rolls-Royce Trent ៧០០ ត្រូវបានគេចាត់ទុកថាសន្សំសំចៃប្រេងជាង។

លោក Izham បានប្រាប់កាសែត New Straits Times ថា «យើងត្រូវការក្រុមហ៊ុន Airbus និង Rolls-Royce ដើម្បីស៊ើបអង្កេតមូលហេតុដើមនៃបញ្ហាទាំងនេះនៅលើយន្តហោះម៉ាកថ្មីនេះ»។ ក្រុមហ៊ុន Rolls-Royce ក៏បានឲ្យដឹងដែរថាខ្លួនរកឃើញសមាសធាតុដែលមានកំហុស ខណៈដែលក្រុមហ៊ុន Airbus បានត្រៀមខ្លួនជាស្រេចដើម្បីជួយដល់ក្រុមហ៊ុនអាកាសចរណ៍ម៉ាឡេស៊ី៕

អត្ថបទ៖ ប៊ុន សុភាព