អាមេរិក​ហាមប្រាម​បច្ចេកវិទ្យា​ចិន​និង​រុស្ស៊ី​លើ​រថយន្ត​ឆ្លាតវៃ

រដ្ឋបាលលោក ចូ បៃដិន បានបង្កើតច្បាប់ក្នុងការរារាំងការលក់រថយន្តឆ្លាតវៃដែលប្រើបច្ចេកវិទ្យារបស់ចិន ឬរុស្ស៊ីនៅក្នុងទីផ្សារសហរដ្ឋអាមេរិក ដែលនេះជាការជំរុញចុងក្រោយរបស់ប្រធានាធិបតីអាមេរិកមុននឹងចាកចេញដើម្បីដោះស្រាយបញ្ហាសន្តិសុខជាតិទាក់ទងនឹងឧស្សាហកម្មរថយន្ត។

ដូចដែលបានប្រកាសដោយក្រសួង​ពាណិជ្ជកម្ម​សហរដ្ឋអាមេរិក​កាលពីថ្ងៃអង្គារ ការហាមឃាត់លើការលក់ត្រូវបានអនុវត្តចំពោះរថយន្តគំរូ (Model)​ ឆ្នាំ២០២៧ លើក្រុមហ៊ុនផលិតដែលមានទំនាក់ទំនងជាមួយប្រទេសចិន ឬរុស្ស៊ី ទោះបីជាពួកវាត្រូវបាន​ផលិត​នៅ​ក្នុង​សហរដ្ឋអាមេរិកក៏ដោយ។

ការហាមប្រាមកម្មវិធីនឹងចូលជាធរមានសម្រាប់​គំរូឆ្នាំ​២០២៧​ផងដែរ ខណៈពេលដែលការរឹតបន្តឹងនេះនឹងចូលជាធរមានសម្រាប់គំរូ​​ឆ្នាំ​២០៣០។ ក្រសួង​​ពាណិជ្ជកម្ម​អាមេរិក បាននិយាយថា ប៉ុន្តែ បច្ចុប្បន្ន ច្បាប់ចុងក្រោយអនុវត្តតែចំពោះរថយន្តដឹកអ្នកដំណើរដែលមានទម្ងន់តិចជាង ១០០០១ ផោន (៥៥៣៦គីឡូក្រាម) ដែលបានផ្តល់ឲ្យមានភាពស្មុគស្មាញនៃខ្សែសង្វាក់​ផ្គត់ផ្គង់​រថយន្តពាណិជ្ជកម្ម។ ចំពោះបច្ចេកវិទ្យានៅក្នុងរថយន្តពាណិជ្ជកម្មឆ្លាតវៃដូចជាឡានដឹកទំនិញ និងឡានក្រុង នាយកដ្ឋានមានគម្រោងនឹងចេញច្បាប់ដាច់ដោយឡែកមួយ ក្នុងពេលអនាគតដ៏ខ្លីខាងមុខនេះ។

ការហាម​ប្រាម​នេះបានកើតឡើង បន្ទាប់ពីរដ្ឋបាលលោក បៃដិន កាលពីខែមីនាបានស្នើថា ខ្លួនកំពុងពិចារណាវិធីសាស្រ្តជាដំណាក់កាល ដើម្បីហាមឃាត់ការប្រើប្រាស់បច្ចេកវិទ្យាចិន និងរុស្ស៊ីសម្រាប់ប្រព័ន្ធបើកបរស្វ័យប្រវត្តិ និងប្រព័ន្ធទំនាក់ទំនងយានយន្ត។

វាក៏បង្ហាញពីការខិតខំប្រឹងប្រែងចុងក្រោយរបស់រដ្ឋបាលលោក​ បៃដិន ដើម្បីកំណត់ការឈានទៅដល់បច្ចេកវិទ្យាពីគូប្រជែងដូចជាទីក្រុងប៉េកាំង ដោយសារតែការបារម្ភពីសន្តិសុខជាតិ។ នោះក៏រាប់បញ្ចូលទាំងច្បាប់ដ៏វិសេសមួយដើម្បីរឹតបន្តឹងការនាំចេញបន្ទះឈីបកុំព្យូទ័រដែលផលិតដោយសហរដ្ឋអាមេរិក។

ជាមួយគ្នានេះកាលពីដើមខែនេះ នាយកដ្ឋានពាណិជ្ជកម្មក៏បានឲ្យដឹងដែរថា ខ្លួនកំពុងស្វែងរកទស្សនៈរបស់ក្រុមហ៊ុនឯកជនទាក់ទងនឹងច្បាប់ដែលអាចដាក់កម្រិត ឬហាមឃាត់យន្តហោះគ្មានមនុស្សបើករបស់ចិននៅក្នុងសហរដ្ឋអាមេរិក។

ជាការឆ្លើយតប ស្ថានទូតចិននៅទីក្រុងវ៉ាស៊ីនតោនបាននិយាយថា ការរឹតបន្តឹងនេះនឹងធ្វើឱ្យខូចដល់ខ្សែសង្វាក់ផ្គត់ផ្គង់សកល និងប៉ះពាល់ដល់ផលប្រយោជន៍របស់ឧស្សាហកម្ម និងអតិថិជនរបស់សហរដ្ឋអាមេរិក ខណៈនាពេលបច្ចុប្បន្ននេះ មានក្រុមហ៊ុនផលិតរថយន្តអគ្គិសនីរបស់ចិន Build Your Dreams (BYD) មានរោងចក្រនៅរដ្ឋកាលីហ្វ័រញ៉ា ដែលផលិតរថយន្តក្រុង និងរថយន្តផ្សេងទៀត។

គួរបញ្ជាក់ថា ការប្រកួតប្រជែងលើបច្ចេកវិទ្យារបស់ប្រទេសជាគូប្រជែងនេះកើតឡើងនៅពេលដែលទីក្រុងវ៉ាស៊ីនតោនស្វែង​រកការជំរុញឧស្សាហកម្មរថយន្តរបស់អាមេរិក និងខណៈដែលខ្លួនព្យាយាមកាត់បន្ថយការពឹងផ្អែកលើខ្សែសង្វាក់ផ្គត់ផ្គង់របស់ទីក្រុងប៉េកាំង។ សហរដ្ឋអាមេរិកបានដាក់ពន្ធ ១០០% លើរថយន្តអគ្គិសនី (EVs) ពីប្រទេសចិន ដែលឥឡូវនេះនាំមុខគេលើពិភពលោកក្នុងការផលិត។

កាលពីថ្ងៃអង្គារ លោក បៃដិន បានចេញបញ្ជាប្រតិបត្តិមួយ ដើម្បីបង្កើនល្បឿននៃការអភិវឌ្ឍន៍ហេដ្ឋារចនាសម្ព័ន្ធសម្រាប់ AI ដែលជាបច្ចេកវិទ្យាដែលលោកបាននិយាយថានឹងកំណត់អនាគត។ ប៉ុន្តែឥទ្ធិពលនៃផែនការទាំងនោះគឺអាស្រ័យលើប្រធានាធិបតីជាប់ឆ្នោតលោក ដូ ណាល់ត្រាំ ដែលនឹងត្រូវឡើងកាន់តំណែងនៅថ្ងៃចន្ទ ថាតើគាត់អនុវត្តកិច្ចខិតខំប្រឹងប្រែង​របស់​រដ្ឋបាលបៃដិន​ទៅមុខទៀតដែរឬទេ៕

អត្ថបទ៖ ប៊ុន សុភាព