ហ្សេលេនស្គី ផ្តាំទៅម្ចាស់ជំនួយថា ទាល់តែឲ្យនុយក្លេអ៊ែរ ទើបអ៊ុយក្រែន ទប់រុស្ស៊ីជាប់

«ឲ្យអាវុធនុយក្លេអ៊ែរយើងវិញមក ហើយសូមផ្តល់ឲ្យយើងនូវខែលការពារមីស៊ីល ដើម្បីទប់ទល់ជាមួយរុស្ស៊ី»។ នេះគឺជាសម្តីរបស់ប្រធានាធិបតីអ៊ុយក្រែនផ្តាំផ្ញើទៅម្ចាស់ជំនួយ នៅក្នុងកិច្ចសម្ភាសជាមួយអ្នកសារព័ត៌មានអង់គ្លេស Piers Morgan ដែលចាក់ផ្សាយកាលពីថ្ងៃអង្គារទី៤ខែកុម្ភៈឆ្នាំ២០២៥។

តាមការចុះផ្សាយរបស់ RT, ក្នុងកិច្ចសម្ភាសនោះ អ្នកកាសែតអង់គ្លេស បានសួរទៅលោក វ្ល៉ាឌីមៀរ ហ្សេលេនស្គី ថា ហេតុអ្វីបានជាទីក្រុងកៀវមិនបោះបង់គំនិតចូលជាសមាជិកអង្គការណាតូ មុនកិច្ចចរចាសន្តិភាពទាំងដែលដឹងថា លក្ខខណ្ឌនេះតែងត្រូវរុស្ស៊ីប្រឆាំងយ៉ាងដាច់អហង្ការនោះ?

លោក ហ្សេលេនស្គី ឆ្លើយថា «បើអ៊ុយក្រែន មិនបានចូលណាតូទេ អ៊ុយក្រែននឹងមានសិទ្ធិសួរទៅអ្នកគាំទ្រខ្លួននៅលោកខាងលិចវិញថា តើមានអ្វីអាចការពារយើងបានប្រឆាំងនឹងអំពើអាក្រក់នេះ? ឲ្យអាវុធនុយក្លេអ៊ែរយើងវិញមក ហើយសូមផ្តល់ខែលការពារមីស៊ីលមកឲ្យយើងមក។ ដៃគូទាំងឡាយ ត្រូវជួយយើងដើម្បីផ្តល់ហិរញ្ញប្បទានដល់កងទ័ពមួយលាននាក់ ដើម្បីទប់ទល់ជាមួយរុស្ស៊ី»។

ពាក់ព័ន្ធរឿងនុយក្លេអ៊ែរនេះដែរ កាលពីខែមករា លោកហ្សេលេនស្គី បញ្ជាក់ថា លោកពិតជាសោកស្តាយណាស់ ដែលទីក្រុងកៀវត្រូវពឹងផ្អែកលើខ្នងបង្អែកបស្ចិមប្រទេសសម្រាប់ធានាសន្តិសុខរបស់ខ្លួន ហើយមិនមានអាវុធនុយក្លេអ៊ែរ ដើម្បីកំញើញរុស្ស៊ី។

ដោយសំដៅទៅលើអនុស្សរណៈទីក្រុងប៊ុយដាប៉ែស, លោកហ្សេលេនស្គី ថែមទាំងរិះគន់សហរដ្ឋអាមេរិក ចក្រភពអង់គ្លេស និងមហាអំណាចនុយក្លេអ៊ែរផ្សេងទៀតផងដែរ ដែលមិនជួយការពារបូរណភាពទឹកដីរបស់អ៊ុយក្រែន។

អនុស្សារណៈទីក្រុងប៊ុយដាប៉ែស បានធានាអំពីការការពាសន្តិសុខអ៊ុយក្រែន ជាថ្នូរឲ្យប្រទេសនេះបោះបង់ចោលអាវុធនុយក្លេអ៊ែរ។ យ៉ាងណា លោកហ្សេលេនស្គី បានសម្តែងការខកចិត្តថា ទីក្រុងកៀវលែងមាននុយក្លេអ៊ែរទៀតហើយ, ឥឡូវរឿងរ៉ាវពិតជាអាក្រក់ខ្លាំងព្រោះយើងគ្មានអាវុធទាំងនោះ។

សូមជម្រាបថា បន្ទាប់ពីសហភាពសូវៀតដួលរលំ អ៊ុយក្រែនមានក្បាលគ្រាប់នុយក្លេអ៊ែរចំនួន ១ ៧០០គ្រាប់ ក្លាយជាមហាអំណាចនុយក្លេអ៊ែរទីបីលើពិភពលោកនាពេលនោះ។

ទោះបែបនេះក្តី អាវុធទាំងនេះគឺស្ថិតក្រោមការគ្រប់គ្រងរបស់រុស្ស៊ី ហើយក្រោយមក អ៊ុយក្រែន​អះអាង​ថា ខ្លួន​សុខចិត្តបោះចោល​អាវុធ​នុយក្លេអ៊ែរ ​ក្រោម​អនុស្សរណៈ​​ទីក្រុងប៊ុយដាប៉ែសឆ្នាំ១៩៩៤ ដើម្បីទទួលបាន​ការ​ធានា​សន្តិសុខ​ពីសំណាក់​រុស្ស៊ី ចក្រភព​អង់គ្លេស និង​អាមេរិក។

យ៉ាងណាមិញ រុស្ស៊ីតែងប្រកែកថា អ៊ុយក្រែន មិនដែលមាននុយក្លេអ៊ែរឡើយ ហើយអាវុធដែលនៅសេសសល់ក្រោយការដួលរលំសហភាពសូវៀតនោះ គឺជាកម្មសិទ្ធិ​ស្រប​ច្បាប់​របស់ទី​ក្រុងមូស្គូទេ៕

អត្ថបទ៖ សុខ សុវណ្ណ

ចុចអាន៖ រុស្ស៊ី៖ ហ្សេលេនស្គី ពុំ​មាន​សិទ្ធិ​ធ្វើ​កិច្ច​ចរចា​៤ភាគី ដើម្បី​បញ្ចប់​សង្គ្រាម​នោះ​ទេ