ដាណឺម៉ាក ព្រមាន! សមាជិកណាតូ២ នឹងផ្ទុះសង្គ្រាមជាមួយគ្នា ព្រោះផែនការ Greenland របស់ ត្រាំ

ក្រោយលោក ដូណាល់ ត្រាំ បង្ហាញគម្រោងដណ្តើមយកកោះ Greenland មកគ្រប់គ្រងហើយអាចមានជំនួយពីអង្គការណាតូដែរនោះ ស្រាប់តែភាគីដាណឺម៉ាក ព្រមានថា ផែនការរបស់ប្រធានាធិបតីអាមេរិក អាចបង្កឲ្យមានសង្គ្រាមរវាងទីក្រុងវ៉ាស៊ីនតោន ជាមួយរដ្ឋជាសមាជិកអង្គភាពអាត្លង់ទិកខាងជើងមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃព្រហស្បតិ៍ទី១៣ខែមីនាឆ្នាំ២០២៥ លោក ត្រាំ​ បានឆ្លើយសំណួរអ្នកកាសែតអំពីទស្សនៈវិស័យ​ក្នុងការកាត់យកកោះ Greenland ដោយលើកឡើងថា៖ ​«តាមខ្ញុំគិតថ្ងៃណាមួយ រឿងនេះនឹងកើតឡើង។ យើងត្រូវការ Greenland សម្រាប់សន្តិសុខអន្តរជាតិ ហើយ​រឿងនេះក៏អាចមានណាតូ ចូលជួយដែរ»។ 

យ៉ាងណា ជុំវិញផែនការនេះ ធ្វើឲ្យដាណឺម៉ាក ក្តៅស្លឹកត្រចៀក ដោយសមាជិកសភាមួយរូបនិងជាប្រធានគណៈកម្មាធិការការពារជាតិឈ្មោះ Rasmus Jarlov ព្រមានថា ផែនការរបស់លោក ត្រាំ នឹងធ្វើឲ្យអាមេរិក-ដាណឺម៉ាក កើតសង្គ្រាមជាមួយគ្នា។ 

លោកបានបង្ហោះលើបណ្តាញសង្គម X កាលពីថ្ងៃសុក្រថា «គ្មានរឿងអ្វីត្រូវនិយាយឡើយ ពាក់ព័ន្ធការប្រគល់កោះអាក់ទិកមួយនេះទៅឲ្យអាមេរិក។ ដាណឺម៉ាក មិនពេញចិត្តទេរឿងដែលលោក ត្រាំ និងប្រមុខណាតូ ម៉ាក រូត និយាយលេងសើចអំពី Greenland»។

លោកបន្តថា នេះមានន័យថា វានឹងមានសង្គ្រាមរវាងប្រទេសណាតូទាំងពីរ។ ដាណឺម៉ាក មិនព្រងើយកន្តើយដាក់ Greenland ឡើយ។ មានតែសេណារីយ៉ូដែលអាមេរិកប្រើកម្លាំងទ័ពមកឈ្លានពានប៉ុណ្ណោះ ទើបអាចយក Greenland បាន។

សូមជម្រាបជាថ្មី Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ ខណៈបច្ចុប្បន្ន វា​មាន​ប្រជាជន​​​​​​ប្រមាណ​​៥៦ ០០០​នាក់។ 

Greenland ស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ចំនួន​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ កោះដ៏ធំបំផុតរបស់ពិភពលោក​មួយ​នេះ មានរដ្ឋធានីនៅជិតទីក្រុងញូវយ៉ក ជាងរដ្ឋធានីកូប៉ិនហាករបស់ដាណឺម៉ាក ហើយ​សម្បូរ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក៕

អត្ថបទ៖ សុខ សុវណ្ណ

ចុចអាន៖ ត្រាំ ថា នឹងកាត់យក ​Greenland​ ហើយ ​ណាតូ​ ប្រហែល​ចូលជួយ​