ព័ត៌មានអន្ដរជាតិ

អាស៊ាននិងប្រទេសជិតខាងមីយ៉ាន់ម៉ាធ្វើសកម្មភាពបញ្ឃប់ភាពឃោរឃៅរបស់របបយោធា

បានផុស

២ ខែ មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

ស្របពេលដែលសង្រ្គាមដ៏ឃោរឃៅរបស់របបយោធាមីយ៉ាន់ម៉ាប្រឆាំងនឹងប្រជាជនរបស់ខ្លួនបានផ្ទុះឡើង និងប្រទេសនេះបានជួបប្រទះនូវគ្រោះរញ្ជួយដីដែលធ្វើឱ្យវិបត្តិមនុស្សធម៌កាន់តែធ្ងន់ធ្ងរ ប្រទេសនានាក្នុងតំបន់ ជាពិសេសសមាគមប្រជាជាតិអាស៊ីអាគ្នេយ៍ ហៅកាត់ថា «អាស៊ាន» និងប្រទេសមួយចំនួននៅជិតខាងមីយ៉ាន់ម៉ា បានកំពុងធ្វើសកម្មភាពថ្មីដែលទំនងជាចង់បញ្ឃប់សកម្មភាពឃោរឃៅរបស់របបនេះ។ នេះបើយោងតាមការចេញផ្សាយរបស់សារព័ត៌មាន The Irrawady នៅថ្ងៃទី១៧ខែមេសានេះ។

(រូបភាព៖ AP) លោក មីន អ៊ុងឡាំង មេដឹកនាំរបបយោធាមីយ៉ាន់ម៉ា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសប្តាហ៍នេះ នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម (Anwar Ibrahim) ដែលជាប្រធានអាស៊ានបច្ចុប្បន្ន គ្រោងនឹងជួបជាផ្លូវការជាមួយមេទ័ពលោក មីន អ៊ុងឡាំង (Min Aung Hlaing) នៅទីក្រុងបាងកក។ កិច្ចប្រជុំនេះគឺដើម្បីពិភាក្សាអំពីជំនួយមនុស្សធម៌ និងសុវត្ថិភាពរបស់បុគ្គលិកជំនួយម៉ាឡេស៊ី បន្ទាប់ពីការរញ្ជួយដី ក៏ដូចជានិយាយអំពី «បទឈប់បាញ់» ដែលត្រូវបានចាត់ទុកជាការប្រឌិតឧបាយកលដោយមេដឹកនាំរបបយោធាប៉ុណ្ណោះ។ ទោះយ៉ាងណាជំនួបនេះមិនមែនជាវិធានការមនុស្សធម៌ទេ វាជាសញ្ញានៃចំណុចស្នូលដែលទំនងជាមានបញ្ហាកាន់តែជ្រៅ។

ជាមួយគ្នានេះ ប្រទេសជិតខាងសំខាន់ៗរបស់មីយ៉ាន់ម៉ា ចិន ថៃ និងឥណ្ឌា និងអាស៊ានដែលមានម៉ាឡេស៊ីធ្វើជាប្រធាននៅឆ្នាំនេះ បានចាប់ផ្តើមផ្លាស់ប្តូរឆ្ពោះទៅរកការចូលរួមបន្តិចម្តងៗជាមួយរបបយោធា។

លោក អាន់វ៉ា បាននាំអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា និងអតីតមេដឹកនាំកម្ពុជា លោក ហ៊ុន សែន មកធ្វើជាទីប្រឹក្សា ដែលអតីតមេដឹកនាំទាំងពីរត្រូវបានគេស្គាល់ថា មានទំនាក់ទំនងមិត្តភាពជាមួយមេដឹកនាំរបបយោធាមីយ៉ាន់ម៉ា។

ការជ្រើសរើសទាំងនេះឆ្លុះបញ្ចាំងពីការប៉ុនប៉ងដើម្បីគ្រប់គ្រងវិបត្តិមីយ៉ាន់ម៉ា ដោយរក្សាការត្រួតត្រាយោធាតាមរយៈកិច្ចព្រមព្រៀង និងការទូតក្នុងតំបន់។

(រូបភាព៖ Getty) នាយករដ្ឋមន្ត្រីម៉ាឡេស៊ីលោក Anwar Ibrahim

លើសពីនេះក៏មានការយល់ស្របថ្មីសន្លាងមួយបានលេចឡើងក្នុងចំណោមប្រទេសជិតខាងមីយ៉ាន់ម៉ា ដែលគាំទ្រក្រុមប្រឹក្សារដ្ឋបាលរដ្ឋ(SAC) របស់របបសឹកមីយ៉ាន់ម៉ា។ ក្នុងការយល់ស្របនោះមានវិធីសាស្រ្តចំនួន៣ គឺការចូលរួមការទូតដើម្បីនាំ លោក មីន អ៊ុងឡាំង ចេញពីសកម្មភាពឃោរឃៅ, ការដាក់សម្ពាធលើកងកម្លាំងបដិវត្តន៍ឱ្យបញ្ឈប់ការវាយលុក និងទទួលយកបទឈប់បាញ់។

សូមបញ្ជាក់ថា ប្រទេសជិតខាង និងប្រទេសអាស៊ានមិនចាប់អារម្មណ៍ក្នុងការគាំទ្រការបះបោរតាមលទ្ធិប្រជាធិបតេយ្យ នោះទេ និងក៏មិនមានការគាំទ្រការរងទុក្ខរបស់ជនស៊ីវិលមីយ៉ាន់ម៉ាដែរ។ យុទ្ធសាស្ត្ររបស់ប្រទេសទាំងនេះគឺដើម្បីស្តារ «សណ្តាប់ធ្នាប់» ឡើងវិញ តាមរយៈការចរចាដែលទុកឱ្យរបបយោធានៅដដែលនិងទាមទារឲ្យពួកបដិវត្តន៍ទទួលយកការគ្រប់គ្រងដោយយោធាជាអចិន្ត្រៃយ៍លើប្រទេស សេដ្ឋកិច្ច និងនយោបាយ៕