ព័ត៌មានអន្ដរជាតិ

អាល្លឺម៉ង់គ្រោងបង្កើនទ័ពបន្ថែមចំនួន ៦០ ០០០នាក់ ដើម្បីបំពេញតាមតម្រូវការណាតូ

បានផុស

១ ខែ មុន

នៅ

ថ្ងៃសុក្រ ៦ មិថុនា ២០២៥

ដោយ

Chheang

រដ្ឋមន្ត្រីការពារជាតិ លោក Boris Pistorius បានប្រកាសថា អាល្លឺម៉ង់នឹងត្រូវការទាហានសកម្មបន្ថែមពី ៥០ ០០០នាក់ ទៅ ៦០ ០០០នាក់ ដើម្បីបំពេញគោលដៅការពារជាតិថ្មីរបស់អង្គការណាតូ សំដៅទប់ទល់នឹងការគំរាមកំហែងដែលពួកគេយល់ឃើញថាកើតចេញពីប្រទេសរុស្ស៊ី។ គម្រោងនេះ នឹងបង្កើនបុគ្គលិកយោធារបស់អាល្លឺម៉ង់ដល់ចន្លោះពី ២៥០ ០០០នាក់ ទៅ ២៦០ ០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសរបស់លោក Pistorius បានធ្វើឡើងនៅពេលដែលក្រុមរដ្ឋមន្ត្រីការពារជាតិរបស់អង្គការណាតូបានកោះប្រជុំនៅទីក្រុងប្រ៊ុចសែលកាលពីថ្ងៃទី៥ខែមីថុនា ដើម្បីអនុម័តផែនការការពារជាតិថ្មី ដែលជាការផ្លាស់ប្តូរយុទ្ធសាស្ត្រដ៏សំខាន់បំផុតចាប់តាំងពីសង្គ្រាមត្រជាក់មក។ ផែនការទាំងនេះ ដោះស្រាយកង្វះខាតដ៏សំខាន់នៅក្នុងកងទ័ពដែលត្រៀមប្រយុទ្ធ អាវុធរយៈចម្ងាយឆ្ងាយ គ្រាប់រំសេវ និងប្រព័ន្ធទំនាក់ទំនងដែលមានសុវត្ថិភាព។

លោក Pistorius បានសង្កត់ធ្ងន់លើការប្តេជ្ញាចិត្តរបស់អាល្លឺម៉ង់ ចំពោះតួនាទីរបស់ខ្លួនក្នុងនាមជាមហាអំណាចសេដ្ឋកិច្ចរបស់អឺរ៉ុប និងជាសមាជិកដ៏សំខាន់របស់អង្គការណាតូ ដោយបញ្ជាក់ថា «យើងកំពុងបង្កើនការទទួលខុសត្រូវរបស់យើង»។

ដើម្បីឆ្លើយតបនឹងតម្រូវការបង្កើនចំនួនទ័ព អាល្លឺម៉ង់កំពុងពិចារណាលើការដាក់ឲ្យប្រើប្រាស់ឡើងវិញនូវច្បាប់កំណែនទ័ពពីមុន ដែលធ្លាប់ត្រូវបានផ្អាកក្នុងឆ្នាំ២០១១។ មន្ត្រីការពារជាតិបានស្នើគំរូស្រដៀងនឹងប្រទេសស៊ុយអែត ដែលមនុស្សអាយុ ១៨ឆ្នាំនឹងត្រូវបានវាយតម្លៃសម្រាប់ការបម្រើយោធា ដោយបុគ្គលដែលជ្រើសរើសត្រូវឆ្លងកាត់ការបណ្តុះបណ្តាលជាមូលដ្ឋានរយៈពេល ៦ខែ។

ការបង្កើនចំនួនទ័ពនេះ ធ្វើឡើងស្របទៅនឹងកិច្ចខិតខំប្រឹងប្រែងដ៏ធំរបស់អង្គការណាតូ ដើម្បីបង្កើនសមត្ថភាពការពាររួម។ អគ្គលេខាធិការអង្គការណាតូលោក Mark Rutte បានគាំទ្ររដ្ឋជាសមាជិកឲ្យបង្កើនការចំណាយលើវិស័យការពារជាតិដល់ ៥% នៃផលិតផលក្នុងស្រុកសរុប ដោយបង្ហាញពីតម្រូវការសម្រាប់ការវិនិយោគយ៉ាងទូលំទូលាយនៅក្នុងប្រព័ន្ធការពារអាកាស មីស៊ីល និងប្រព័ន្ធបញ្ជា៕