យន្តហោះ​ចម្បាំង​របប​សឹក​មីយ៉ាន់​ម៉ាមួយគ្រឿង ត្រូវកង​កម្លាំងប្រដាប់​អាវុធ​បាញ់​ទម្លាក់​នៅ​តំបន់​ Sagaing

យោងតាមការចេញផ្សាយរបស់សារព័ត៌មាន​ Mizzima កាលពីថ្ងៃទី១០ខែមិថុនា កងកម្លាំងប្រដាប់​អាវុធ​ PLA (People’s Liberation Army) ក្នុងប្រទេសមីយ៉ាន់ម៉ា បានបាញ់ទម្លាក់យន្តហោះចម្បាំងដែលជាកម្មសិទ្ធិរបស់របបយោធាអំឡុងពេលប្រយុទ្ធគ្នានៅក្រុង Pale តំបន់ Sagaing បណ្ដាលឲ្យស្លាប់អ្នកបើកបរយន្តហោះ។

យន្តហោះនេះត្រូវបានបញ្ជូនពីទីក្រុង Naypyidaw ដើម្បីផ្តល់ការគាំទ្រផ្លូវអាកាសសម្រាប់កងទ័ពរដ្ឋាភិបាលការពារប៉ុស្តិ៍ប៉ូលិស Kankyi Daunt តែត្រូវបានបាញ់ និងធ្លាក់នៅជិតវត្តមួយ​កន្លែង។

ក្រុមតស៊ូក្នុងតំបន់ រួមទាំងកងកម្លាំង PLA បានបញ្ជាក់ពីឧប្បត្តិហេតុនេះ ហើយបានរាយការណ៍ថា បានរកឃើញសាកសពអ្នកបើកយន្តហោះនៅកន្លែងធ្លាក់ ខណៈនេះ​ជា​យន្តហោះ​ទី​បី​ហើយដែល​ដាក់​ពង្រាយ​ពី​ក្រុង Tada-U ដើម្បី​គាំទ្រ​របប​យោធា​ក្នុង​ជម្លោះ​ដែល​កំពុង​បន្ត​នេះ។

គួរបញ្ជាក់ថា ការប្រយុទ្ធគ្នាបានកាន់តែខ្លាំងនៅក្នុងតំបន់នេះ ចាប់តាំងពីថ្ងៃទី​២ខែមិថុនា ដោយកងកម្លាំង PLA ​បន្ត​វាយប្រហារ​ជុំវិញប៉ុស្តិ៍ប៉ូលិស ខណៈ​​​របប​សឹក​​វិញ​កំពុង​​វាយប្រហារតាមអាកាស​ជា​ច្រើន​លើក​ច្រើន​សា។

ដោយសារការធ្លាក់យន្តហោះ និងហានិភ័យនៃការវាយប្រហារតាមអាកាសកាន់តែច្រើន ក្រុមអ្នកតស៊ូ​ប្រឆាំង​​នឹង​របប​សឹក​បានដកថយពីកន្លែងធ្លាក់យន្តហោះនៅពេលនេះ។ ទោះ​បី​ជា​យ៉ាង​ណា ការ​វាយ​ប្រយុទ្ធ​គ្នា​នឹងនៅ​តែ​កើត​ឡើង ដោយសារ​ពួក​គេ​បន្ត​ព្យាយាម​ដណ្តើម​យក​ប៉ុស្តិ៍​ប៉ូលិស​ឲ្យបាន៕

អត្ថបទ៖ ប៊ុន សុភាព