រញ្ជួយ​ដី​អង្រួនរដ្ឋធានី​​ប្រទេស​ប៉េរូ បណ្តាល​ឲ្យ​មនុស្ស​ម្នាក់​ស្លាប់ និង​៥​នាក់របួស

យោងតាមការចេញផ្សាយរបស់សារព័ត៌មាន CNN នៅថ្ងៃទី១៦ខែមិថុនានេះ រញ្ជួយដីកម្រិត ៥.៦ រ៉ិចទ័រ បានវាយប្រហារនៅឆ្នេរសមុទ្រភាគកណ្តាលនៃប្រទេសប៉េរូ​តំបត់​អាមេរិក​កណ្តាល​ ដោយបានអង្រួនរដ្ឋធានី Lima និងទីក្រុង Callao ក្បែរនោះ។

ការរញ្ជួយដីនេះបានកើតឡើងនៅម៉ោង ១១ និង៣៥នាទីព្រឹកថ្ងៃអាទិត្យ (ម៉ោងក្នុងស្រុក) មានចំណុចកណ្តាល ២៣ គីឡូម៉ែត្រភាគនិរតីនៃទីក្រុង Callao ក្នុងមហាសមុទ្រប៉ាស៊ីហ្វិក នេះបើយោងតាមការស្ទង់មតិភូមិសាស្ត្រអាមេរិក (USGS)។

នៅក្នុងគ្រោះរញ្ជួយដីនេះ បុរស​ម្នាក់​អាយុ ៣៦ឆ្នាំ ​ត្រូវ​បាន​ស្លាប់​នៅ​ភាគ​ខាងជើង​ទីក្រុង Lima ដោយបំណែកបាក់រលំ​ពី​អគារ​ដែល​កំពុង​សាងសង់​បាន​ធ្លាក់​មក​លើ​គាត់។ អាជ្ញាធរ​ បាន​បញ្ជាក់​ថា មនុស្ស​៥​នាក់​ទៀត​បាន​រង​របួស និង​កំពុង​ទទួល​ការ​ព្យាបាល​នៅ​មន្ទីរពេទ្យ។

យោងតាម USGS មនុស្សជាង ៧លាននាក់ទំនងជាមា​តញ័រកម្រិតមធ្យម ជាពិសេសនៅរដ្ឋធានី Lima និងតំបន់ជុំវិញ។ ចំណែក ៤​លាន​នាក់​ទៀត​ប្រហែល​ជា​មាន​អារម្មណ៍​ដឹង​ពី​កម្រិត​ញ័រ​កម្រិតស្រាល។ ការរញ្ជួយដីនេះបានបង្កការខូចខាតដល់ផ្លូវថ្នល់ សាលារៀន ផ្ទះសម្បែង និងយានជំនិះ ហើយបាននាំឱ្យមានការផ្អាកព្រឹត្តិការណ៍នានាបណ្តោះអាសន្ន រួមទាំងការប្រកួតបាល់ទាត់ផងដែរ ។

គួរបញ្ជាក់ថាប្រទេសប៉េរូមានទីតាំងនៅលើ Ring of Fire ប៉ាស៊ីហ្វិក ដែលជាតំបន់ជុំវិញមហាសមុទ្រប៉ាស៊ីហ្វិក ដែលមានការរញ្ជួយដីញឹកញាប់ និងការផ្ទុះភ្នំភ្លើង។ រដ្ឋធានី Lima និងខេត្តក្បែរនោះបានប្រឈមមុខនឹងការរញ្ជួយដីខ្លាំងនាពេលកន្លងមក។ មួយក្នុងចំណោមនោះមានរញ្ជួយដីធ្ងន់ធ្ងរបំផុតគឺការរញ្ជួយដី Pisco ឆ្នាំ ២០០៧ ដែលជាការរញ្ជួយដីកម្រិត ៨.០ រ៉ិចទ័រ ដែលបានសម្លាប់មនុស្សជិត ៦០០នាក់ និងបណ្តាលឱ្យមានការខូចខាតធ្ងន់ធ្ងររួមទាំងរដ្ឋធានីLima៕

អត្ថបទ៖ ប៊ុន សុភាព