ស្លាប់២នាក់ និង១២​នាក់​រងរបួស ក្រោយគ្រោះរញ្ជួយដី៦,៥រ៉ិចទ័រនៅម៉ិកស៊ិក

គ្រោះរញ្ជួយដីដ៏ខ្លាំងក្លាមួយដែលមានកម្រិត៦,៥រ៉ិចទ័រ បានវាយប្រហារភាគខាងត្បូង និងភាគកណ្តាលនៃប្រទេសម៉ិកស៊ិក នា​ព្រឹកព្រលឹមថ្ងៃសុក្រ​ទី​៣​ខែ​មករា​ឆ្នាំ​២០២៦​នេះ ដោយបណ្តាល​ឲ្យ​មនុស្សយ៉ាងហោចណាស់​២​នាក់ស្លាប់ និង​១២​នាក់ទៀតរងរបួស។

យោង​តាម​ BBC ការរញ្ជួយនេះបានកើតឡើងនៅម៉ោង៧:៥៨ព្រឹក (ម៉ោងក្នុងតំបន់) ដែលមានចំណុចកណ្តាលនៅជិតទីក្រុង San Marcos ក្នុងរដ្ឋ Guerrero ប្រហែល១៥គីឡូម៉ែត្រពីតំបន់ទេសចរណ៍ឆ្នេរសមុទ្រ Acapulco។ ប្រជាពលរដ្ឋ និងភ្ញៀវទេសចរទាំងក្នុងទីក្រុង Acapulco និងទីក្រុងម៉ិកស៊ិក បាននាំគ្នាសម្រុកចេញមកលើដងផ្លូវ ក្រោយពេលប្រព័ន្ធព្រមានគ្រោះរញ្ជួយដីបានបន្លឺឡើងប៉ុន្មានវិនាទី មុនពេលការរញ្ជួយចាប់ផ្តើម។

ជនរងគ្រោះដែលបាន​បាត់បង់ជីវិត រួមមានស្ត្រីអាយុ​៥០ឆ្នាំម្នាក់ក្នុងរដ្ឋ Guerrero ដោយសារផ្ទះបាក់រលំលើ និងបុរសអាយុខ្ទង់៦០​ឆ្នាំម្នាក់ទៀតនៅទីក្រុងម៉ិកស៊ិក ដែលបានដួលស្លាប់ក្នុងពេលកំពុងជម្លៀសខ្លួនចេញពីផ្ទះល្វែង។ អភិបាលក្រុងម៉ិកស៊ិក លោកស្រី Clara Brugada បានបញ្ជាក់ថា ទោះបីជាទីក្រុងមិនមានការខូចខាតរចនាសម្ព័ន្ធទ្រង់ទ្រាយធំក៏ដោយ ប៉ុន្តែក្រុមការងារសង្គ្រោះកំពុងត្រួតពិនិត្យអគារចំនួន៣៤ និងផ្ទះចំនួន៥ខ្នង ដែលអាចមានហានិភ័យ។ បន្ថែមពីនេះ ក៏មានការដាច់ចរន្តអគ្គិសនីនៅតាមសង្កាត់មួយចំនួនក្នុងរដ្ឋធានី និងមានការបាក់ដីនៅតាមដងផ្លូវហាយវ៉េក្បែរទីក្រុង Acapulco ផងដែរ។

គ្រោះរញ្ជួយដីនេះ ក៏បានធ្វើឲ្យរអាក់រអួលដល់សន្និសីទសារព័ត៌មានលើកដំបូងនៃឆ្នាំថ្មីរបស់ប្រធានាធិបតី លោកស្រី Claudia Sheinbaum ផងដែរ។ វីដេអូបានបង្ហាញពីសកម្មភាពលោកស្រីប្រធានាធិបតីដែលបានណែនាំអ្នកសារព័ត៌មានដោយស្ងប់ស្ងាត់​ឲ្យ​ចាកចេញពីវិមានជាតិ ខណៈដែលសម្លេងស៊ីរ៉ែនកំពុងបន្លឺឡើង។ បន្ទាប់ពីការរញ្ជួយលើកដំបូង ភ្នាក់ងាររញ្ជួយដីជាតិម៉ិកស៊ិកបានកត់ត្រានូវការរញ្ជួយបន្ទាប់បន្សំ​ជាង៥០០ដង។ អាជ្ញាធរបានអំពាវនាវ​ឲ្យ​ប្រជាពលរដ្ឋបន្តការប្រុងប្រយ័ត្ន និងត្រៀម«កាតាបសង្គ្រោះបន្ទាន់» ឲ្យរួចរាល់ ព្រោះតំបន់នេះជាតំបន់ដែលមានសកម្មភាពរញ្ជួយដីខ្លាំងបំផុតមួយនៅលើពិភពលោក៕

ប្រែសម្រួល៖ ឈាង