ព័ត៌មានអន្ដរជាតិ

ប្រធានាធិបតីប៉េរូ អស់តំណែង ដោយសារលាក់អត្តសញ្ញាណទៅទាក់ទងអ្នកជំនួញចិន

បានផុស

៥ ខែ មុន

នៅ

ថ្ងៃសៅរ៍ ២១ កុម្ភៈ ២០២៦

ដោយ

សភាប្រទេសប៉េរូទើបតែបោះឆ្នោតដកសេចក្តីទុកចិត្តប្រធានាធិបតី Jose Jeri ដោយបញ្ចប់អាណត្តិខ្លីត្រឹមតែ ៤ខែប៉ុណ្ណោះ ដោយសារតែកិច្ចប្រជុំមិនច្បាស់លាស់ជាមួយជនជាតិចិន។ ការសម្រេចបោះឆ្នោតទម្លាក់លោក Jose Jeri ត្រូវបានអនុម័តដោយសំឡេងគាំទ្រយ៉ាងច្រើនលើសលប់ចំនួន ៧៥ ទល់នឹង២៤ ។

ព្រឹត្តិការណ៍នេះដែរ បានបន្តរុញច្រានប្រទេសប៉េរូឲ្យធ្លាក់កាន់តែជ្រៅទៅក្នុងវិបត្តិនយោបាយដ៏យូរអង្វែង ហើយនេះគឺជាការផ្លាស់ប្តូរថ្នាក់ដឹកនាំលើកទី៨ ក្នុងរយៈពេលតិចជាងមួយទសវត្សរ៍ប៉ុណ្ណោះ។

ប្រធានាធិបតីប៉េរូ លោក Jose Jeri ថ្លែងសក្ខីកម្មនៅចំពោះមុខគណៈកម្មាធិការសភា (រូបភាព៖Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយរបស់ CNN មូលហេតុធំមច្បងនៃភាពតានតឹងដ៏ខ្លាំងក្លានៃកៅអីប្រធានាធិបតី កើតចេញពីរឿងអាស្រូវដែលមានឈ្មោះថា «Chifagate»។ ចំណុចសំខាន់នៃហេតុការណ៍នេះគឺរូបភាពដែលស្រង់ចេញពីកាមេរ៉ាសុវត្ថិភាព ដែលបានបង្ហាញពីទីតាំងលាក់កំបាំងរបស់ប្រមុខរដ្ឋនៅទីតាំងក្រៅផ្លូវការ។

កាលពីថ្ងៃទី ២៦ ខែធ្នូ ឆ្នាំ២០២៥ លោក Jerí ត្រូវគេចាប់បានថា កំពុងទៅភោជនីយដ្ឋានមួយក្នុងរដ្ឋធានីលីម៉ាដោយពាក់មួក និងអាវធំដើម្បីលាក់អត្តសញ្ញាណរបស់គាត់។ បន្ទាប់មក នៅថ្ងៃទី៦ខែមករា ឆ្នាំ២០២៦ គាត់បានពាក់វ៉ែនតាម្តងទៀត រួចធ្វើដំណើរទៅកាន់ហាងឯកជនមួយផ្សេងទៀត។ គោលដៅដែលគាត់បានជួបនៅក្នុងការណាត់ជួបសម្ងាត់ទាំងនេះ គឺទៅជួបជាមួយ លោក Zhihua Yang អ្នកជំនួញជនជាតិចិនដែលមានផលប្រយោជន៍សេដ្ឋកិច្ចជាច្រើននៅក្នុងប្រទេសប៉េរូ។ កិច្ចប្រជុំទាំងពីរមិនត្រូវបានកត់ត្រាទុកក្នុងកាលវិភាគការងារសាធារណៈរបស់ប្រធានាធិបតីទេ។

ដោយប្រឈមមុខនឹងភស្តុតាងដែលមិនអាចប្រកែកបាន លោកបានទទួលស្គាល់កំហុសរបស់ខ្លួនថា ដោយឱនសុំទោស និងនិយាយថា៖«ខ្ញុំទទួលស្គាល់កំហុសរបស់ខ្ញុំ ហើយសុំទោសជាសាធារណៈចំពោះការបង្ហាញខ្លួនក្នុងស្ថានភាពបិទបាំងបែបនេះ។ វាបានបង្កឲ្យមានការសង្ស័យអំពីអាកប្បកិរិយារបស់ខ្ញុំ និងការបង្កើតរឿងរ៉ាវមិនពិត ដែលគ្មានមូលដ្ឋានអ្វីទាំងអស់»។

ទោះបីជាលោកបានបញ្ជាក់ថា មិនមានប្រតិបត្តិការលាក់កំបាំង ឬអំពើពុករលួយណាមួយបានកើតឡើងក៏ដោយ ការពន្យល់នេះមិនគ្រប់គ្រាន់ដើម្បីបញ្ចុះបញ្ចូលសភា និងមតិសាធារណៈដែលខឹងសម្បារនោះទេ។ បរិបទនៃហេតុការណ៍នេះកាន់តែមានភាពរសើបរឹតតែខ្លាំង ខណៈដែលប្រទេសប៉េរូកំពុងស្ថិតនៅក្រោមសម្ពាធយ៉ាងខ្លាំងពីសហគមន៍អន្តរជាតិ។

យ៉ាងណាមិញ មកទល់នឹងបច្ចុប្បន្ននេះ អាសនៈប្រធានាធិបតីប៉េរូគឺទំនេរនូវឡើយទេ ខណៈក្រុមនយោបាយនឹងត្រូវប្រណាំងប្រជែងពេលវេលាដើម្បីជ្រើសរើសអ្នកជំនួសបណ្តោះអាសន្ននៅថ្ងៃទី ១៨ខែកុម្ភៈ ដើម្បីដឹកនាំប្រទេសទៅកាន់ការបោះឆ្នោតទូទៅដែលគ្រោងធ្វើនៅថ្ងៃទី ១២ខែមេសា ឆ្នាំ២០២៦៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖