ឪពុកទេសចរម៉ាឡេស៊ី ទទូចឲ្យថៃ បញ្ជូនកូនរបស់ពួកគេមក ប្រទេសកំណើតវិញ

ដ្បិតរដ្ឋាភិបាលថៃធានារ៉ាប់រងថ្លៃចំណាយព្យាបាលលើទេសចរម៉ាឡេស៊ី២នាក់ ដែលត្រូវអតីតអ្នកប្រដាល់ដុតទាំងរស់នៅកណ្តាលក្រុងបាងកកក៏ដោយ ប៉ុន្តែឪពុករបស់ទេសចរទាំងពីរនាក់នេះ បានទទូចសុំយកកូនទៅព្យាបាលនៅប្រទេសកំណើតរបស់ខ្លួនវិញ ដោយលើកឡើងពីបញ្ហាស្នាក់នៅនិងបារម្ភពីសុវត្ថិភាពនៅក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Star កាលពីថ្ងៃចន្ទទី១១ខែសីហាឆ្នាំ២០២៥ លោក Gan Kin In ដែលត្រូវជាឪពុករបស់ទេសចរឈ្មោះ Gan Xiao Zhen និយាយថា គ្រួសាររបស់លោកក៏ដូចជាគ្រួសាររបស់ទេសចរម៉ាឡេស៊ីម្នាក់ទៀតឈ្មោះ Ong Yik Leong សុទ្ធតែស្នើសុំរបាយការណ៍សុខភាពអំពីស្ថានភាពរបស់ជនរងគ្រោះ ក្នុងអំឡុងពេលសម្ភាសជាមួយអាជ្ញាធរថៃ និងបុគ្គលិកពេទ្យ។

លោកបន្តថា ក្រុម​គ្រួសារទាំងពីរ​សង្ឃឹម​ថា ​ជន​រង​គ្រោះ​អាច​ត្រូវ​បាន​បញ្ជូន​ត្រឡប់​ទៅ​ប្រទេស​ម៉ាឡេស៊ី​វិញ​បាន​ឆាប់​តាម​ដែល​អាច​ធ្វើ​ទៅ​បាន​ដោយ​សារ​បញ្ហា​ការ​ស្នាក់​នៅ​ នៅ​ទីនេះ។ លោករំពឹងថា ​នឹងទទួលបានរបាយការណ៍ពេទ្យ ​ដើម្បីយកទៅ​ពិគ្រោះ​ជាមួយ​វេជ្ជបណ្ឌិត​ផ្ទាល់​នៅ​ប្រទេស​ម៉ាឡេស៊ី​។

សូមជម្រាបជាថ្មីថា ទេសចរម៉ាឡេស៊ី២នាក់ជាគូស្នេហ៍នឹងគ្នា ត្រូវបុរសគ្មានការងារធ្វើម្នាក់វាយនិងដុតពួកគេនៅជិតផ្សារទំនើបមួយលើផ្លូវ Ratchadamri ក្នុងទីក្រុងបាងកក កាលពីរាត្រីថ្ងៃព្រហស្បតិ៍សប្ដាហ៍មុន។

តាមពិតទៅមុនពួកគេមកប្រទេសថៃ ឪពុករបស់ពួកគេមិនបានចង់ឲ្យមកឡើយ និងបានហាមឃាត់ដោយបារម្ភថានៅក្នុងប្រទេសថៃពុំមានសុវត្ថិភាព។

ឪពុករបស់ Xiao Zhen និយាយថា គាត់មានស្រណុកចិត្តឡើយពេលកូនប្រាប់គាត់ ថាទៅលេងថៃ ព្រោះគាត់ដឹងថា មានឧប្បត្តិហេតុជាច្រើនបានកើតឡើងនៅប្រទេសថៃក្នុងឆ្នាំនេះ។

គាត់ក៏​ណែនាំ​កុំ​ឲ្យ​កូនស្រីទៅលេងប្រទេសថៃដែរ ប៉ុន្តែ​កូនស្រី​ថាមិនអី និងធានា​ថា ខ្លួន​នឹង​មាន​សុវត្ថិភាពទៀតផង។ លុះដល់ទីបំផុត នាងក៏ជួបរឿងដ៏រន្ធត់នេះតែម្តង៕

អត្ថបទ៖ សុខ សុវណ្ណ

ចុចអាន៖ ឪពុករបស់ទេសចរម៉ាឡេស៊ី បានប្រាប់កូនដែរថា កុំទៅលេងថៃព្រោះគ្មានសុវត្ថិភាព តែកូនថា មិនអី