UN៖ របបសឹកមីយ៉ាន់ម៉ាធ្វើទារុណកម្មអ្នកជាប់ឃុំធ្ងន់ធ្ងរនិងរំលោភបំពានផ្លូវភេទ

បើយោងតាមការចេញផ្សាយរបស់សារព័ត៌មានCNA នៅថ្ងៃទី១៣ខែសីហា របាយការណ៍ថ្មីរបស់អង្គការសហប្រជាជាតិនិយាយថា រដ្ឋាភិបាលរបបសឹកមីយ៉ាន់ម៉ាកំពុងធ្វើទារុណកម្ម «ជាប្រព័ន្ធ» នៅក្នុងបន្ទប់ឃុំឃាំង រួមទាំងការវាយដំ ការឆក់ខ្សែភ្លើង ការរំលោភបូក និងការដុតផ្នែករាងកាយផ្លូវភេទ សូម្បីតែកុមារ។

ដោយផ្អែកលើសាក្សីជិត ៦០០ នាក់ការស៊ើបអង្កេតដោយយន្តការស៊ើបអង្កេតឯករាជ្យសម្រាប់មីយ៉ាន់ម៉ា (IIMM) ក៏បានរកឃើញថាកុមារដែលមានអាយុក្រោម ២ ឆ្នាំត្រូវបានឃុំខ្លួនក្នុងនាមជាអ្នកទទួលទោសតំណាងឪពុកម្តាយរបស់ពួកគេ ដោយខ្លះទទួលរងការធ្វើទារុណកម្ម និងការរំលោភបំពានផ្លូវភេទ។

របាយការណ៍និយាយថា ការរំលោភបំពានទាំងនេះ ជួនកាលបណ្តាលឱ្យមនុស្សស្លាប់ បានកើនឡើងញឹកញាប់ និងឃោរឃៅទៅៗចាប់តាំងពីរដ្ឋប្រហារឆ្នាំ ២០២១ ក្នុងអំឡុងពេលដែលមនុស្សជិត ៣០,០០០ នាក់ត្រូវបានចាប់ខ្លួន ចំពេលមានការប្រយុទ្ធគ្នារវាងរបបយោធា កងកម្លាំងគាំទ្រលទ្ធិប្រជាធិបតេយ្យ និងក្រុមប្រដាប់អាវុធជនជាតិភាគតិច។

គួរបញ្ជាក់ថាតុលាការឧក្រិដ្ឋកម្មអន្តរជាតិកន្លងមកបានស្នើសុំដីកាចាប់ខ្លួនមេដឹកនាំរបបយោធាលោក មីន អ៊ុងឡាំង (Min Aung Hlaing) ពីបទឧក្រិដ្ឋកម្មប្រឆាំងនឹងជនជាតិរ៉ូហ៊ីងយ៉ាក្នុងឆ្នាំ ២០១៧។ អង្គការសហប្រជាជាតិក៏បានចងក្រងឯកសារអំពីឧក្រិដ្ឋកម្មសង្គ្រាមដោយក្រុមប្រឆាំងមួយចំនួន រួមទាំងការកាត់ទោសប្រហារជីវិតអ្នកជាប់ឃុំ៕

អត្ថបទ៖ ប៊ុន សុភាព