កងទ័ពថៃ បើកឆាកប្រយុទ្ធជាមួយក្រុមជួញដូរគ្រឿងញៀនមីយ៉ាន់ម៉ា នៅតំបន់ត្រីកោណមាស

កងទ័ពថៃនិងក្រុមជួញដូរគ្រឿងញៀនមីយ៉ាន់ម៉ា បានបើកឆាកប្រយុទ្ធគ្នាយ៉ាងខ្លាំងក្លានៅតំបន់ត្រីកោណមាស ដោយជាលទ្ធផល ទាហានថៃរឹបអូសបានថ្នាំមេតំហ្វេតាមីនជិត ៣លានគ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Amarin TV, ការប្រយុទ្ធគ្នានេះកើតឡើងនៅចំណុចឃុំកោះឆាង នៃស្រុក ម៉ែសៃ ខេត្តឈៀងរ៉ៃ កាលពីថ្ងៃពុធទី១៣ខែសីហាឆ្នាំ២០២៥ ពេលដែលក្រុមជួញដូរគ្រឿងញៀន ជិះទូកឆ្លងទន្ល Ruak ចេញពីតំបន់ Tachilek នៃប្រទេសមីយ៉ាន់ម៉ា ចូលដីថៃរួចក៏ជួបនឹងទាហានកំពុងល្បាត។

ក្រោយការបាញ់តដៃដ៏ក្តៅគគុកប្រមាណ៥នាទី ឈ្មួញគ្រឿងញៀនដែលមានគ្នា៤នាក់ ក៏ដកថយទៅមីយ៉ាន់ម៉ាវិញ ដោយបន្សល់ទុកថ្នាំមេតំហ្វេតាមីន ២ ៨០០ ០០០គ្រាប់ឲ្យទាហានថៃរឹបអូសយក។

ក្នុងការប្រយុទ្ធគ្នានេះ មិនបណ្តាលឲ្យនរណាម្នាក់រងរបួសទេ ហើយក្រោយមក ថៃ ក៏ដាក់ពង្រាយកងកម្លាំង ដើម្បីបន្តល្បាតនិងតាមដានស្ថានការណ៍ ទប់ស្កាត់ការជួញដូរគ្រឿងញៀនជាបន្តទៀត។

សូមជម្រាបថា «ត្រីកោណមាស» គឺជាតំបន់ភូមិសាស្ត្រដ៏ល្បីល្បាញមួយនៅតំបន់អាស៊ីអាគ្នេយ៍ ដែលមានព្រំប្រទល់ប្រសព្វគ្នារវាងប្រទេសចំនួនបីគឺមីយ៉ាន់ម៉ា ថៃ និងឡាវ។

ត្រីកោណមាស ស្ថិតនៅចំណុចប្រសព្វនៃទន្លេមេគង្គនិងទន្លេ Ruak ដែលជាតំបន់ភ្នំព្រៃឈើដ៏ក្រាស់ និងដាច់ស្រយាល។ តំបន់នេះធ្លាប់ល្បីរន្ទឺទូទាំងពិភពលោកថាជា ប្រភពផលិត និងជួញដូរអាភៀន និងគ្រឿងញៀនដ៏ធំបំផុតមួយ។

បច្ចុប្បន្ន ប្រទេសទាំងបីបានខិតខំប្រឹងប្រែងយ៉ាងខ្លាំងក្នុងការបង្ក្រាបការដាំដុះអាភៀន។ ទោះបែបនេះ ការផលិតនិងការជួញដូរគ្រឿងញៀននៅតែបន្តកើតឡើងក្នុងតំបន់ ជាពិសេសនៅភាគខាងកើតនៃរដ្ឋ Shan ប្រទេសមីយ៉ាន់ម៉ា៕

អត្ថបទ៖ សុខ សុវណ្ណ

ចុចអាន៖ តំណាងរាស្រ្តថៃ ទទូចឲ្យរដ្ឋ មេត្តាគិតគូរដល់ជនរងគ្រោះនៅខេត្តភាគខាងត្បូង ខ្លះផង