ថៃ​ឲ្យ​សាលារៀន​ត្រៀមបិទទ្វារ ខណៈព្យុះត្រូពិចកំពុងវាយ​ប្រហារ

អ្នកគ្រប់គ្រងសាលានៅទូទាំងប្រទេសថៃ ត្រូវបានផ្តល់សិទ្ធិអំណាចពេញលេញដើម្បីប្រកាសបិទជាបន្ទាន់ ប្រសិនបើតំបន់របស់ពួកគេប្រឈមនឹងស្ថានភាពអាសន្នពីព្យុះត្រូពិច Kajiki។ សេចក្តីណែនាំនេះត្រូវបានចេញដោយការិយាល័យគណៈកម្មការអប់រំមូលដ្ឋាន (OBEC) ដែលផ្តល់អាទិភាពដល់សុវត្ថិភាពសិស្ស និងគ្រូ នៅពេលព្យុះចូលមកដល់។

យោង​តាម​ការ​ចុះផ្សាយ​របស់ Khaosod នាថ្ងៃទី២៥ខែសីហា​ឆ្នាំ​២០២៥ ការព្រមាននេះផ្តោតជាពិសេសទៅលើខេត្តដែលមានហានិភ័យខ្ពស់ដែលរំពឹងថានឹងទទួលឥទ្ធិពលនៃព្យុះ រួមទាំងតំបន់នៅភាគឦសាន និងខាងជើង ដូចជា Bueng Kan, Nong Khai, Chiang Rai និង Chiang Mai។ OBEC បានជំរុញ​ឲ្យ​សាលារៀនទាំងនេះត្រៀមលក្ខណៈសម្រាប់ទឹកជំនន់ភ្លាមៗ និងការរអិលបាក់ដីដោយវាយតម្លៃហានិភ័យនៃការធ្វើដំណើរ ត្រួតពិនិត្យសុវត្ថិភាពអគារ និងរៀបចំជម្រកសង្គ្រោះបន្ទាន់។

បន្ថែមពីលើការអនុញ្ញាត​ឲ្យ​បិទ OBEC បានបង្កើតបណ្តាញសម្របសម្រួល​គ្រាអាសន្ន២៤ម៉ោងក្នុង​មួយថ្ងៃ​ ដែលអនុញ្ញាត​ឲ្យ​មន្ត្រីសាលាទាក់ទងនាយកប្រតិបត្តិកំពូលដោយផ្ទាល់សម្រាប់ជំនួយបន្ទាន់។

សូម​ជម្រាប​ថា នាយកដ្ឋានឧតុនិយាយថៃ បានចេញការព្រមានឲ្យពលរដ្ឋទូទាំងប្រទេសមានការប្រុងប្រយ័ត្នខ្ពស់ ព្រោះតែភាពធ្ងន់ធ្ងរនៃព្យុះ Kajiki ខណៈគ្រួសារមួយចំនួន បានជម្លៀសទៅកាន់ទីទួលសុវត្ថិភាព រួចទៅហើយ។ ព្យុះនេះបានទៅដល់ប្រទេសថៃ កាលពីថ្ងៃអាទិត្យទី២៥ខែសីហាឆ្នាំ២០២៥ វាយប្រហារខេត្តចំនួន៥៨ ខណៈទីក្រុងបាងកក ក៏ត្រូវរងគ្រោះដែរ ដល់ថ្ងៃទី២៧ខែសីហា៕

ដោយ៖ ឈាង

ចុចអាន៖ ថៃ រងគ្រោះធ្ងន់ ដោយសារព្យុះសង្ឃរា Kajiki វាយប្រហារពេញទំហឹង