លោក Marcos​ ដកតំណែងមេប៉ូលិសដែលធ្លាប់ចាប់ខ្លួនអតីតប្រធានាធិបតី Rodrigo Duterte

ប្រធានាធិបតីហ្វីលីពីន លោក Ferdinand Marcos Jr. បានដកតំណែងមេប៉ូលិស ឧត្តមសេនីយ៍ Nicolas Torre ដែលត្រូវបានគេស្គាល់យ៉ាងច្បាស់ថាបានចាប់ខ្លួនអតីតប្រធានាធិបតី Rodrigo Duterte និងមេដឹកនាំសាសនាដ៏ល្បីល្បាញលោក Apollo Quiboloy ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP​ នៅថ្ងៃទី២៦ខែសីហា។

លោក Torre ដែលទើបតែត្រូវបានតែងតាំងតែនៅក្នុងខែឧសភា ហើយត្រូវបានគេសន្មត់ថានឹងបម្រើការងារដល់ឆ្នាំ ២០២៧ ឥឡូវនេះត្រូវបានជំនួសដោយឧត្តមសេនីយ៍ Jose Melencio Nartatez Jr.។

លេខាធិការប្រតិបត្តិទី ៤០ នៃប្រទេសហ្វីលីពីនលោក Lucas Bersamin មិនបានពន្យល់ពីមូលហេតុដែលលោក Torre ត្រូវបានដកចេញនោះទេ ខណៈដែលរដ្ឋមន្ត្រីក្រសួងមហាផ្ទៃលោក Jonvic Remulla បាននិយាយថា វាគ្រាន់តែជាជម្រើសរបស់ប្រធានាធិបតីក្នុងការដឹកនាំប៉ូលិសក្នុងទិសដៅថ្មី។ លោក​ក៏​បាន​បញ្ជាក់​ផង​ដែរ​ថា Torre មិន​ប្រឈម​នឹង​ការ​ចោទ​ប្រកាន់​ផ្លូវ​ច្បាប់​អ្វីទេ។

របាយការណ៍និយាយថា Torre ប្រហែលជាមានការខ្វែងគំនិតគ្នាជាមួយមន្ត្រី បន្ទាប់ពីលោកបានដកមន្ត្រីប៉ូលិសជាច្រើននាក់ចេញពីការងារ ក្នុងនោះក៏មាន លោកJose Melencio Nartatez Jr. ផងដែរ តែក្រោយមកលោកក៏បានធ្វើការវិញ។

គួររម្លឹកថាលោក Torre បានដឹកនាំប្រតិបត្តិការសំខាន់ៗពីមុនមក ដូចជាការចាប់ខ្លួនអតីតប្រធានាធិបតី Rodrigo Duterte ក្នុងខែមីនា ឲ្យតុលាការឧក្រិដ្ឋកម្មអន្តរជាតិ ជុំវិញការបង្ក្រាបគ្រឿងញៀនដ៏សាហាវរបស់លោក និងការចាប់ខ្លួនមេដឹកនាំសាសនា Apollo Quiboloy ឆ្នាំ ២០២៣ លើការចោទប្រកាន់ពីបទជួញដូរផ្លូវភេទលើកុមារ ដែលអាមេរិកស្នើធ្វើបត្យាប័នលោកទៅសហរដ្ឋអាមេរិក៕

អត្ថបទ៖ ប៊ុន សុភាព