ខេត្តថៃ នៅទល់ដែនឡាវ លិចលង់ធ្ងន់ធ្ងរ ដោយសារឥទ្ធិពលព្យុះ Takiji

ខេត្ត Loei នៃប្រទេសថៃ ដែលស្ថិតជាប់ព្រំដែនឡាវ ត្រូវទឹកជំនន់ ជន់លិចធ្ងន់ធ្ងរ ដោយសារតែឥទ្ធិពលនៃព្យុះសង្ឃរា Takiji។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin TV នៅថ្ងៃអង្គារទី២៦ខែសីហាឆ្នាំ២០២៥, ព្យុះ Takiji បានបង្អុរភ្លៀងធ្លាក់យ៉ាងខ្លាំងពេញមួយយប់ រុញឲ្យទឹកទន្លេ Man និង Hueang ហក់ឡើងខ្ពស់ ធ្វើឲ្យពលរដ្ឋរស់នៅសហគមន៍តាមដងទន្លេត្រូវជម្លៀសទៅកាន់ទីទួលសុវត្ថិភាព។

តំបន់ដែលរងគ្រោះខ្លាំងបំផុតគឺស្រុក Na Haeo និង Dan Sai ដោយនៅទីនោះតំបន់ខ្លះត្រូវទឹកជន់លិច ជម្រៅត្រឹមចង្កេះ កាត់ផ្តាច់ផ្លូវ រំខានដល់ការធ្វើដំណើរនិងដឹកជញ្ជូន។

អតិបាលខេត្តលោក Chaiphot Charoonpong បានព្រមានពលរដ្ឋឲ្យប្រយ័ត្ន និងចេញបញ្ជាដល់ស្ថាប័នពាក់ព័ន្ធទាំងអស់ ឲ្យប្រុងជើងការខ្ពស់។

ទន្ទឹមនោះ នៅខេត្ត Mae Hong Son នាទល់ដែនមីយ៉ាន់ម៉ាឯណោះវិញ ភ្លៀងធ្លាក់យ៉ាងគំហុក ក៏បង្កជាជំនន់ផងដែរក្នុងតំបន់មួយចំនួនដោយជន់លិចដីស្រែចម្ការ ថែមទាំងកាត់ផ្តាច់ផ្លូវធ្វើដំណើរទៀតផង។

ស្រុក Mae Sariang ជាកន្លែងរងគ្រោះជាងគេ ព្រោះទឹកជំនន់ក៏លិចផ្ទះសម្បែងពលរដ្ឋផងដែរ ខណៈអាជ្ញាធរចេញការព្រមានឲ្យប្រុងប្រយ័ត្នចំពោះគ្រោះបំណាក់ដី និងលំហូរភក់ចុះពីភ្នំ។

សូមជម្រាប់ថា គ្រោះធម្មជាតិក្នុងប្រទេសថៃដែលបណ្តាលមកពីឥទ្ធិពលនៃព្យុះ Takiji មិនទាន់ធូរស្រាលឡើយ ពោលគឺវានឹងបង្កផលប៉ះពាល់ធ្ងន់ធ្ងររហូតដល់ចុងសប្តាហ៍នេះ៕

អត្ថបទ៖ សុខ សុវណ្ណ

ចុចអាន៖ ព្យុះ Kajiki ធ្វើឲ្យមានទឹកជំនន់យ៉ាងគំហុកក្នុងប្រទេសឡាវ