ណេតាន់យ៉ាហ៊ូ៖ គ្មាន​ឡើយ​នូវ​រដ្ឋ​ប៉ាឡេស្ទីន នេះ​គឺ​ជា​ទឹកដី​របស់​យើង

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសកាលពីថ្ងៃព្រហស្បតិ៍​ទី​១១​ខែ​កញ្ញា​ថា រដ្ឋប៉ាឡេស្ទីន«នឹងមិនត្រូវបានបង្កើតឡើងឡើយ» ខណៈដែលប្រទេសមួយចំនួនរៀបចំដើម្បីទទួលស្គាល់​រដ្ឋ​ប៉ាឡេស្ទីននៅក្នុង​កិច្ច​ប្រជុំ​អង្គការសហប្រជាជាតិនា​ចុងខែ​នេះ។

ថ្លែងនៅក្នុងពិធីមួយដែលបង្ហាញពីការពង្រីកការតាំងទីលំនៅ​ក្នុង​ទីក្រុង Ma’ale Adumim នៃ​តំបន់ West Bank ដែល​អ៊ីស្រាអែល​កាន់កាប់ លោក ណេតាន់យ៉ាហ៊ូ បាននិយាយថា ទីក្រុងនេះនឹងកើនឡើង​​ប្រជាជន​ទ្វេ​ដង​រហូត​ដល់ ៧០ ០០០​នាក់ក្នុងរយៈពេល​៥​ឆ្នាំ។

លោក ណេតាន់យ៉ាហ៊ូ បានរៀបរាប់​ថា «យើងបាននិយាយថានឹងមិនមានរដ្ឋប៉ាឡេស្ទីនទេ…។ កន្លែងនេះជារបស់យើង យើងនឹងថែរក្សាមរតករបស់យើង ទឹកដីរបស់យើង និងសន្តិសុខរបស់យើង»។

ប្រទេស​បារាំង កាណាដា និង​ចក្រភព​អង់គ្លេស​ សុទ្ធតែ​បាន​ប្រកាស​ពី​ផែនការ​ទទួល​ស្គាល់​រដ្ឋ​ប៉ាឡេស្ទីន​នៅ​មហាសន្និបាត​អង្គការ​សហប្រជាជាតិ​ក្នុង​ខែ​កញ្ញា ជា​ទង្វើ​​មួយ​ដែល​អ៊ីស្រាអែល​ថ្កោលទោស។ ក្រសួងការបរទេសអ៊ីស្រាអែល បានប្រកាស​ថា វិធានការ​បែប​នេះ ប្រៀប​ដូចជា​ការ​«ផ្តល់រង្វាន់ដល់ក្រុមហាម៉ាស» និងធ្វើ​ឲ្យប៉ះពាល់ដល់កិច្ចខិតខំប្រឹងប្រែង ដើម្បីឈានដល់បទឈប់បាញ់នៅក្នុងតំបន់ហ្គាហ្សា និងដោះលែងចំណាប់ខ្មាំងដែលនៅតែ​ឃុំ​​ខ្លួន​ដោយពួកសកម្មប្រយុទ្ធ។

ទីក្រុង Ma’ale Adumim ស្ថិតនៅចម្ងាយ ៧​ម៉ាយភាគខាងកើតនៃទីក្រុងហ្សេរុយសាឡឹម បច្ចុប្បន្នមានប្រជាជនអ៊ីស្រាអែលប្រហែល ៤០ ០០០​នាក់។ រដ្ឋាភិបាលរបស់លោក ណេតាន់យ៉ាហ៊ូ ថ្មីៗនេះបានអនុម័តគម្រោង​​បង្កើត​លំនៅដ្ឋានថ្មីជាង ៧ ០០០​កន្លែង​​នៅទីនោះ ដែលរង​ការរិះគន់ពីអង្គការសហប្រជាជាតិ។

តុលាការយុត្តិធម៌អន្តរជាតិ បានសម្រេច​ថា ការតាំងទីលំនៅរបស់អ៊ីស្រាអែលនៅក្នុងទឹកដី West Bank របស់​ប៉ាឡេស្ទីន​ចាប់​តាំង​ពី​ឆ្នាំ​១៩៦៧ គឺខុសច្បាប់ ខណៈដែលក្រុមប្រឹក្សាសន្តិសុខអង្គការសហប្រជាជាតិបានថ្កោលទោសម្តងហើយម្តងទៀតនូវសកម្មភាពតាំងទីលំនៅចុង​ក្រោយ​បំផុត​របស់​អ៊ីស្រាអែល​ក្នុងឆ្នាំ​២០១៦។

អ្នកនាំពាក្យរបស់អាជ្ញាធរប៉ាឡេស្ទីនលោក Nabil Abu Rudeineh កាលពីថ្ងៃព្រហស្បតិ៍បានទទូចថា រដ្ឋប៉ាឡេស្ទីនដែលមានទីក្រុងហ្សេរុយសាឡឹមខាងកើតជារដ្ឋធានីរបស់ខ្លួន គឺជាគន្លឹះនៃសន្តិភាពនៅក្នុងតំបន់។ លោកបានចាត់ទុក​ដំណោះស្រាយរដ្ឋពីរថា​ជា​រឿង​ដែល​«ជៀសមិនរួច»។ លោក Rudeineh បានថ្កោលទោសការតាំងទីលំនៅរបស់អ៊ីស្រាអែលថាខុសច្បាប់ក្រោមច្បាប់អន្តរជាតិ ហើយបានចោទប្រកាន់លោក ណេតាន់យ៉ាហ៊ូ ថា «រុញតំបន់ទាំងមូលឆ្ពោះទៅរកភាព​វិនាសសាបសូន្យ»។

លោកបានកត់សម្គាល់ថា រដ្ឋជាសមាជិកអង្គការសហប្រជាជាតិចំនួន១៤៩ បានទទួលស្គាល់ប៉ាឡេស្ទីន ហើយ​លោក​បានអំពាវនាវ​ឲ្យ​ប្រទេសទាំងអស់ដែលមិនទាន់បានធ្វើដូច្នេះ ​ឲ្យ​ទទួលស្គាល់រដ្ឋប៉ាឡេស្ទីនជាបន្ទាន់៕

ដោយ៖ ឈាង