រដ្ឋមន្ត្រីការពារជាតិថៃ ថា បើចង់ចាប់ចោរប្លន់មាសនៅ Narathiwat បាន ត្រូវតែសហការជាមួយ ម៉ាឡេស៊ី 

រដ្ឋមន្ត្រីការពារជាតិថៃ Nattaphon Narkphanit បញ្ជាក់ថា ប្រតិបត្តិការតាមចាប់ខ្លួនក្រុមចោរប្លន់មាសនៅខេត្ត Narathiwat គឺត្រូវតែមានការកិច្ចសហប្រតិបត្តិការឆ្លងដែនជាមួយប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post កាលពីថ្ងៃអង្គារទី៧ខែតុលាឆ្នាំ២០២៥ លោក Nattaphon អះ​អាងថា ក្រុមចោរបានរត់ចេញពីថៃចូលទៅប្រទេសជិតខាងបាត់ទៅហើយ។ ពួកគេគឺជាបក្សពួកមកពីក្រុមបដិវត្តន៍ផ្តាច់ខ្លួន BRN។ ថៃនឹងសហការជាមួយម៉ាឡេស៊ី ដើម្បីចាប់ពួកគេនិងយករបស់មានតម្លៃមកវិញ។

កាលពីល្ងាចថ្ងៃអាទិត្យទី៥ខែតុលា ក្រុមចោរ បានប្លន់ហាងមាស Yaowarat Krungthep ក្នុងផ្សារទំនើប Big C នៅស្រុក Su-ngai Kolok នៃខេត្ត Narathiwat។ 

តាមរបាយការណ៍សមត្ថកិច្ច, ពួកគេមានគ្នា១០នាក់ ចូលប្លន់គ្រឿងអលង្ការមានតម្លៃជាង ១លានដុល្លារអាមេរិក រួចក៏ធ្វើដំណើរតាមផ្លូវក្នុងឃុំ Sakor នៃស្រុក Waeng ឆ្លងដែនចូលទៅក្នុងប្រទេសម៉ាឡេស៊ី។

ក្រោយមក មន្ត្រីខេត្ត Narathiwat បញ្ជាក់ថា ពួកគេគឺជាក្រុមបះបោរភាគខាងត្បូង ដោយធ្វើសកម្មភា​ពចែកជា៣ក្រុម ដូចជាក្រុមលួចរថយន្ត ក្រុមប្លន់មាស និងក្រុមបាចដែកគោលតាមផ្លូវដើម្បីរារាំងប៉ូលិស។

ក្រោយហេតុការណ៍នោះ ក្រុមផ្តាច់ខ្លួនបានបន្តទៅវាយប្រហារនៅខេត្ត Pattani ម្តងដោយចាប់ចងនិងប្លន់យកកាំភ្លើងពីឆ្មាំសន្តិសុខនៅឯសាកលវិទ្យាល័យ Fatoni ក្នុងស្រុក Yarang រួចក៏បំផ្ទុះទូ ATM របស់ធនាគារ Islamic Bank នៅក្បែរនោះ។

មិនបន្ធូរដៃទេ ក្រុមផ្តាច់ខ្លួនថែមទាំងបំផ្ទុះគ្រាប់បែកចំនួន៣គ្រាប់ នៅមុខមជ្ឈមណ្ឌលយុវជនក្រុង Yala ក្នុងស្រុក Muang នៃខេត្ត Yala ផងដែរ ប៉ុន្តែមិនមានការបញ្ចេញរបាយការណ៍អំពីមនុស្សស្លាប់ឬរបួសនោះទេ៕

អត្ថបទ៖ សុខ សុវណ្ណ

ចុចអាន៖ ក្រុមបះបោរភាគខាងត្បូងថៃ មិនបន្ធូរដៃ ដោយបំផ្ទុះគ្រាប់បែក ៣គ្រាប់ទៀត នៅខេត្ត Yala