ក្រុមបះបោរភាគខាងត្បូងថៃ មិនបន្ធូរដៃ ដោយបំផ្ទុះគ្រាប់បែក ៣គ្រាប់ទៀត នៅខេត្ត Yala

រឹតតែខ្លាំងទៅហើយ! ក្រុមបះបោរភាគខាងត្បូងថៃ បានបើកការវាយប្រហារជាបន្តទៀតមិនបន្ធូរដៃសោះ ដោយកាលពីរាត្រីថ្ងៃអង្គារទី៧ខែតុលាឆ្នាំ២០២៥ ពួកគេបានបំផ្ទុះគ្រាប់បែកចំនួន៣គ្រាប់ នៅក្នុងខេត្ត Yala។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, ការវាយប្រហារកើតឡើងនាវេលាម៉ោង៩:២៤នាទីយប់ នៅមុខមជ្ឈមណ្ឌលយុវជនក្រុង Yala ក្នុងស្រុក Muang ប៉ុន្តែមិនមានការបញ្ចេញរបាយការណ៍អំពីមនុស្សស្លាប់ឬរបួសនោះទេ។

ទោះបីជាយ៉ាងណាក៏ដោយ មន្ត្រីជំនាញមិនប្រាប់លម្អិតអំពីការវាយប្រហារនេះឡើយ ដោយគ្រាន់តែបង្ហើបថា ពួកគេកំពុងបើកការស៊ើបអង្កេត ហើយព្រមានដល់ពលរដ្ឋកុំទៅកន្លែងកើតហេតុឬចេញពីផ្ទះបើមិនចាំបាច់ និងស្នើសុំឲ្យចូលរួមសហការជាមួយសមត្ថកិច្ច។

ការបំផ្ទុះគ្រាប់បែកថ្មីនេះ គូសបញ្ជាក់ពីស្ថានភាពកាន់តែវឹកវរនៅភាគខាងត្បូងប្រទេសថៃ ដែលកើតមានការវាយប្រហារសឹងរាល់ថ្ងៃទៅហើយ បង្កជាភាពចលាចលនិងអសន្តិសុខ។

កាលពីអធ្រាត្រថ្ងៃចន្ទឈានចូលថ្ងៃអង្គារ ក្រុមផ្តាច់ខ្លួនក៏បំផ្ទុះគ្រាប់បែកក្នុងខេត្ត Pattani ផងដែរ ​ដោយសកម្មប្រយុទ្ធមួយក្រុមមានគ្នា៥ទៅ៦នាក់ បានចាប់ចងនិងប្លន់យកកាំភ្លើងពីឆ្មាំសន្តិសុខនៅឯសាកលវិទ្យាល័យ Fatoni ក្នុងស្រុក Yarang រួចក៏បំផ្ទុះទូ ATM របស់ធនាគារ Islamic Bank នៅក្បែរនោះ។

មុននោះមួយថ្ងៃ ក្រុមចោរ ក៏ចូលប្លន់ហាងមាសដោយប្លន់គ្រឿងអលង្ការតម្លៃជាង ១លានដុល្លារអាមេរិកផងដែរ ក្នុងខេត្ត Narathiwat។

តាមរបាយការណ៍សមត្ថកិច្ច, ពួកគេមានគ្នា១០នាក់ ចូលប្លន់ហាងមាស Yaowarat Krungthep ក្នុងផ្សារទំនើប Big C នៅស្រុក Su-ngai Kolok។ ក្រោយប្លន់បានសម្រេច ពួកគេក៏ធ្វើដំណើរតាមផ្លូវក្នុងឃុំ Sakor នៃស្រុក Waeng ដើម្បីឆ្លងដែនចូលទៅក្នុងប្រទេសម៉ាឡេស៊ី៕

អត្ថបទ៖ សុខ សុវណ្ណ

ចុចអាន៖ ភាគខាងត្បូងថៃក៏រឹតតែវឹកវរដែរ ខណៈក្រុមផ្តាច់ខ្លួនបើកការវាយប្រហារសឹងរាល់ថ្ងៃ